ချင်းရွှေဟော်တိုက်ပွဲ၌ စစ်ကောင်စီတပ်များ ကျန်ခဲ့သည့် လက်နက်ခဲယမ်းများ ရှာဖွေတွေ့ရှိကြောင်း MNDAA အသိပေး

ကိုးကန့်တပ်မတော်(MNDAA)နှင့် စစ်ကောင်စီတပ်တို့ နိုဝင်ဘာလကုန်ပိုင်းက ဖြစ်ပွားခဲ့သည့် ချင်းရွှေဟော်ဒေသ တိုက်ပွဲ၌ စစ်ကောင်စီတပ်များ ကျန်ခဲ့သည့် လက်နက်ခဲယမ်းများကို ရှာဖွေတွေ့ရှိခဲ့ကြောင်း MNDAAက ယနေ့ ထုတ်ပြန်သည်။

“အဲဒါက နိုဝင်ဘာလကုန်လောက်က ဖြစ်ခဲ့တဲ့တိုက်ပွဲလေ။ အဲဒီတိုက်ပွဲဖြစ်ပြီးတော့ စစ်ရေးက အဲဒီတုန်းက နည်းနည်းတင်းမာသေးတယ်လေ။ ဒါပေမဲ့ အခုကျတော့ အဆင်ပြေသွားပြီဆိုတော့ သူတို့က ရှေ့တန်းကို ရှင်းလင်းရေးလုပ်တာ။ ရှင်းလင်းရေးလုပ်တဲ့အချိန်မှာ ဒီလက်နက်ခဲယမ်း ပစ္စည်းတွေရထားတာ”ဟု ကိုးကန့်သတင်းရင်းမြစ်က ပြောသည်။

တိုက်ပွဲ ငြိမ်သွားပြီး စစ်ရေးပြေလျော့သည့်အခြေအနေတွင် MNDAAက နယ်မြေရှင်းလင်းရာ တွေ့ရှိခဲ့သည့် လက်နက်နှင့် ခဲယမ်းများကို စုစည်းထုတ်ပြန်ခဲ့ခြင်းဖြစ်သည်ဟု ဆိုသည်။

မြန်မာ – တရုတ်နယ်စပ် ချင်းရွှေဟော်ဒေသရှိ MNDAA တပ်စခန်းကို စစ်ကောင်စီတပ်နှင့် ကိုးကန့်ပြည်သူ့စစ် ပူးပေါင်းအဖွဲ့က အင်အားအလုံးအရင်းဖြင့် ထိုးစစ်ဆင်လာ၍ နိုဝင်ဘာ ၂၈ရက်နှင့် ၂၉ရက်တို့တွင် တိုက်ပွဲဖြစ်ပွားခဲ့ရာ စစ်ကောင်စီတပ်က သေဆုံးထိခိုက်များခဲ့သည်။

“ကျွန်တော်တို့က စစ်လည်းမဖြစ်ချင်ဘူး ကိုးကန့်တိုင်းရင်းသားအချင်းချင်းလည်း တိုက်ပွဲမဖြစ်ချင်ဘူး အဲဒီလို ရပ်တည်ချက်တော့ရှိတယ်။ ကိုးကန့်အတွင်းမှာ ရှိတဲ့ ပြည်သူ့စစ်တွေပဲဖြစ်ဖြစ် အမျိုးသား တိုင်းရင်းသားတွေပဲဖြစ်ဖြစ် ကျွန်တော်ပြောချင်တာက အရင်တုန်းက ကိုးကန့်တိုင်းရင်းသားအပေါ် မကောင်းမှုတွေ မတရားမှုတွေလုပ်ခဲ့တာရှိပါစေ။အခုလက်ရှိမှာ ကျွန်တော်တို့ဘက်ကို ပူးပေါင်းလာမယ် ကျွန်တော်တို့အပေါ် ရန်ရှာမှုတွေမလုပ်ဘူးဆိုရင် ကျွန်တော်တို့ အနေနဲ့ ခွင့်လွှတ်ပေးမယ် ဒီလို ရပ်တည်ချက်တော့ရှိတယ်”ဟု ကိုးကန့် သတင်းရင်းမြစ်က ပြောသည်။

အကယ်၍ အဖွဲ့အစည်းအား ဆက်လက်ရန်ပြုမည်ဆိုပါက ဖြစ်ပေါ်လာမည့် နောက်ဆက်တွဲ အခြေအနေများကို မိမိကိုယ်တိုင်သာ တာဝန်ယူရမည်ဟု ၎င်းက အသိပေးသည်။

MNDAAနှင့် စစ်ကောင်စီတပ်တို့သည် ပြီးခဲ့သည့် ရက်ပိုင်းအတွင်းကလည်း မုံးကိုးဒေသ၌ တိုက်ပွဲဖြစ်ပွားခဲ့ရာ စစ်ကောင်စီတပ်က ထိုးစစ်ဆင်လာ၍ တိုက်ပွဲဖြစ်ခဲ့ခြင်းဖြစ်သည်ဟု ကိုးကန့် သတင်းရင်းမြစ်က ပြောသည်။