ရှမ်းပြည်နယ်မြောက်ပိုင်း မုံးကိုးခရိုင်တွင် ကိုးကန့်တပ်မတော်(MNDAA)နှင့် စစ်ကောင်စီတပ်တို့ ယမန်နေ့က တိုက်ပွဲပြင်းထန်စွာ ဖြစ်ပွားခဲ့ကြောင်း MNDAAက သတင်းထုတ်ပြန်သည်။
ဒီဇင်ဘာ ၂၁ရက်က စစ်ကောင်စီ၏ တပ်မ(၉၉)လက်အောက်ခံ တပ်ရင်း (၄၂၀) မှ အင်အား ၈၀ နီးပါးသည် MNDAA တပ်မဟာ (၅၁၁)ရှိရာ မုံးကိုးခရိုင် တာမုံးပေါ်ဒေသသို့ ချီတက်လာ၍ မွန်းလွဲ ၁နာရီခွဲခန့်မှစ၍ တိုက်ပွဲဖြစ်ခဲ့သည်ဟု ဆိုသည်။
တိုက်ပွဲသည် ၂နာရီကျော်ကြာမြင့်ခဲ့ပြီး ပြင်းထန်ခဲ့ကြောင်း၊ နှစ်ဖက်တိုက်ပွဲများအတွင်း မုံးကိုးဒေသ၌ တပ်စွဲထားသော စစ်ကောင်စီတပ်မှ ပဋိပက္ခဖြစ်ပွားရာနေရာသို့ လက်နက်ကြီးဖြင့် ပစ်ခတ်တိုက်ခိုက်ခဲ့၍ နေအိမ်အချို့သို့ ကျည်များကျရောက်ခဲ့ကြောင်း အသိပေးထားသည်။
အဆိုပါတိုက်ပွဲ၌ MNDAA ဘက်က ရဲဘော် တစ်ဦး ကျဆုံးခဲ့ပြီးတစ်ဦး ဒဏ်ရာရခဲ့ကြောင်း၊ စစ်ကောင်စီတပ်မှ အသေအပျောက်ကို မသိရသေးကြောင်း ထုတ်ပြန်ခဲ့သည်။
ပြီးခဲ့သည့် နိုဝင်ဘာလကုန်ပိုင်းကလည်း မြန်မာ – တရုတ်နယ်စပ် ချင်းရွှေဟော်ဒေသရှိ MNDAA တပ်စခန်းသို့ စစ်ကောင်စီတပ်က ထိုးစစ်ဆင်တိုက်ခိုက်လာ၍ တိုက်ပွဲပြင်းထန်ခဲ့ပြီး စစ်ကောင်စီတပ်မှ သေဆုံးထိခိုက်မှုများရှိခဲ့သည်။
