မန္တလေးတိုင်း၊ ဝမ်းတွင်းမြို့နယ်တွင် PDFများအား ဓာတ်ပုံနှင့်တကွ လိုက်ရှာနေသည့် ကျေးရွာ (၇)ရွာ အုပ်ချုပ်ရေးမှူး သားအဖအား ရှင်းလင်းခဲ့ကြောင်း WTRF (Wundwin Township Revolution Force)အဖွဲ့ သတင်းနှင့် ပြန်ကြားရေးတာဝန်ခံက ပြောသည်။
ဝမ်းတွင်းမြို့နယ်၊ ညောင်တိုအုပ်စု (၇)ရွာအုပ်ကြီးပြည်အေးဆိုနှင့် သူ၏သား စိုင်းမြင့်အောင်ပြေ (ခ)ပုလုံးတို့ကို ယမန်နေ့(ဒီဇင်ဘာ ၂၄ ရက်) ည ၈ နာရီခန့်က ရှင်းလင်းခဲ့ခြင်းဖြစ်ကြောင်း WTRF အဖွဲ့ သတင်းနှင့် ပြန်ကြားရေးတာဝန်ခံက ပြောသည်။
အဆိုပါ သားအဖနှစ်ယောက်သည် ပျူစောထီးအဖွဲ့ဝင်များလည်းဖြစ်ပြီး ဖခင်ဖြစ်သူ အုပ်ချုပ် ရေးမှူး ပြည်အေးသည် မြို့နယ်အတွင်း အကြီးစားပျူစောထီးခေါင်းဆောင်ဖြစ်ပြီး ကျေးရွာနေပြည်သူများအပေါ် ဗိုလ်ကျအနိုင်ကျင့်နေသူဖြစ်ကြောင်း ၎င်းက ပြောသည်။
ထို့အပြင် မြို့နယ်အတွင်း PDFများကို ဓာတ်ပုံနှင့် တကွ လိုက်ရှာနေကြောင်း၊ ခင်ကြီးရွာ၊ကျင်းရွာ၊တဲစုရွာ၊သဲတောလေးရွာနှင့် သခွတ်မြင့်ကျေးရွာတို့မှ ပြည်သူများကို ပုံပါPDFများ ကျေးရွာများအတွင်းအဝင်မခံရန် လော်စပီကာဖြင့် (၇) ရွာလှည့်၍ သတိပေးနေသူဖြစ်ကြောင်း WTRF အဖွဲ့ သတင်းနှင့် ပြန်ကြားရေးတာဝန်ခံက ပြောသည်။
“သူ့ဆီမှာ ရဲဘော်တွေရဲ့အချက်အလက်(ဓာတ်ပုံ) တွေရှိနေပြီး အဲ့ပုံတွေကို ရွာကလူတွေကို လိုက်ပြပြီး ရွာထဲလာရင်အဝင်မခံဖို့ ၊ လာခဲ့ရင်သူတို့ကိုအကြောင်းကြားဖို့လှည့်ပြောနေတာ။ ညကပစ်ခဲ့တာက သေနက်အတိုပါ။ သူ့အိမ်မှာဝင်ရှင်းခဲ့တာ။ နှစ်ယောက်လုံးသေတယ်။ အဲ့လူက (၇)ရွာ အုပ်ချုပ်ရေးမှူးဆိုတော့ သူတို့ပျူစောထီးအဖွဲ့ထဲမှာ ခေါင်းဆောင်ကြီးတစ်ယောက်ဗျ။ စစ်တပ်နဲ့ပတ်သက်ပြီးလည်း သူကနေရာ တော်တော်ရောက်တယ်။”ဟု ၎င်းက ပြောသည်။
ယနေ့မှစ၍ ဝမ်းတွင်းမြို့နယ်အတွင်း ပြည်သူကိုကိုယ်စားမပြုသည့် အုပ်ချုပ်ရေးမှူးများအားလည်းကောင်း၊ တော်လှန်ရေးသမားများကို ဖမ်းမိရန် နည်းအမျိုးမျိုးဖြင့် စစ်ကောင်စီအား ကူညီပူးပေါင်းပါဝင်နေသူများကိုလည်းကောင်း ရှင်းလင်းမည်ဖြစ်ကြောင်း WTRF အဖွဲ့က သတိပေးပြောကြားသည်။
“အုပ်ချုပ်ရေးမှူးများ နှုတ်ထွက်ဖို့အချိန်တန်ပြီလို့ ကျွန်တော်တို့ WTRFက အသိပေးပါရစေ။အနှေးနှင့်အမြန် ရောက်လာမှာပါ။ ဘာမှမဖြစ်ပါဘူးလို့ထင်ပြီး ဆက်ပြီးရူးမိုက်နေမယ်ဆိုရင်တော့ ဆက်လုပ်ပါ။ ကျေးရွာတိုင်းက အုပ်ချုပ်ရေးမှူးများ၏အချက်အလက် အားလုံးရှိနေပြီးသားပါ။ အားလုံးထွက်ပေးကြဖို့ ပထမဆုံးနဲနောက်ဆုံးအသိပေးပါရစေ။”ဟု WTRFက ထပ်မံသတိပေးသည်။
WTRFအဖွဲ့သည် ဒီဇင်ဘာ၁၀ရက်ကလည်း သဲတောလေး အုပ်ချုပ်ရေးမှူးမောင်ရှိန်အား ရှင်းလင်းခဲ့သည်။
