မွန်ပြည်နယ် ရေးမြို့ ကျောင်းရွာရှိ စစ်ကောင်စီတပ် ယာဉ်တစ်စီးကို တိုက်ခိုက်ခဲ့ရာ နှစ်ဦးသေဆုံးကြောင်း ရေးဘီလူးအဖွဲ့က သတင်းထုတ်ပြန်သည်။
ဒီဇင်ဘာ ၂၇ရက် နံနက်က ရေးမြို့နယ် ကျောင်းရွာသို့ ဝင်လာသည့် ရေးမြို့အခြေစိုက် ခလရ (၅၉၁) တပ်ရင်းမှ စစ်ကားကို တိုက်ခိုက်ခဲ့ခြင်းဖြစ်သည်ဟု ဓာတ်ပုံနှင့်အတူ ဖော်ပြသည်။
“ဒီနေ့ ကျောင်းရွာ ၅၉၁ တပ်က ရွာထဲဝင်လာတဲ့ စစ်ကားကို ကျွန်တော်တို့ ရေးဘီလူးအဖွဲ့ကနေ ဝိုင်းပစ်တာ ဖြစ်ပါတယ်။ စ…(စစ်ကောင်စီတပ်သား)တွေ ခွေးပြေး၊ ဝက်ပြေးကို ပြေးတယ်။ နောက်တစ်ခုက နှစ်ဦး ကားပေါ်မှာကျသွားတယ်။ ကားမရပ်တော့ ကျွန်တော်တို့ လက်နက်တွေ လုဖို့အချိန်မရလိုက်ဘူး ကားမောင်းပြေးသွားတယ်။”ဟု ရေးဘီလူးအဖွဲ့ခေါင်းဆောင်က ပြောသည်။
မွန်ပြည်နယ်မှာ ယခုထက်ကောင်းမွန်သည့် မစ်ရှင် များကို ဆက်လက်လုပ်ဆောင်သွားမည်ဟုလည်း ၎င်းက ဆိုသည်။
ရေးဘီလူးအဖွဲ့သည် ရေးမြို့နယ်အတွင်းရှိ စစ်ကောင်စီတပ်နှင့် ရဲများ၊ သတင်းပေး ဒလန်များကို တိုက်ခိုက်လျက်ရှိရာ ရဲစခန်းမှူး နှစ်ဦးအပါအဝင် စစ်ကောင်စီလက်ပါးစေများကို ရှင်းလင်းထားနိုင်ကြောင်း၊ စစ်ကောင်စီတပ်မှ လက်နက်စုစုပေါင်း ၉လက်ထက်မနည်းရရှိထားကြောင်း ယင်းအဖွဲ့ ၏ ထုတ်ပြန်ချက်များအရ သိရသည်။
