စစ်ကိုင်းတိုင်း၊ မြင်းမူမြို့ပေါ်၊ လွတ်လပ်ရေးကျောက်တိုင်ရှေ့တွင် ယနေ့နံနက်ပိုင်းက စစ်ကောင်စီတပ်သား သုံးဦးအား မိုင်းဆွဲတိုက်ခိုက်ရာ နှစ်ဦးသေဆုံးကြောင်း ZERO ပြောက်ကျားတပ်ဖွဲ့ (မြင်းခြံ)ခေါင်းဆောင် ကိုသက်ကြီးက ပြောသည်။
ယနေ့(ဇန်နဝါရီ ၁ရက်) နံနက် ၆ နာရီ ၄၀မိနစ်အချိန်ခန့်က မြင်းမူမြို့ စာသင်ကျောင်းတွင် တပ်စွဲထားသော စစ်ကောင်စီတပ်မှ ပြင်ပသို့ထွက်လာသော စစ်သား သုံးဦးအား လွတ်လပ်ရေးကျောက်တိုင်ရှေ့အရောက်တွင် ပဒေသာမိုင်း နှစ်လုံးဖြင့် လျှပ်တပျက်ဖောက်ခွဲတိုက်ခိုက်ခဲ့ရာ နှစ်ဦး သေဆုံးပြီး တစ်ဦး ဒဏ်ရာအပြင်းထန်ရရှိကြောင်း ZERO ပြောက်ကျားတပ်ဖွဲ့(မြင်းခြံ) ခေါင်းဆောင် ကိုသက်ကြီးက ပြောသည်။
“သူတို့ကခြေကျင်ထွက်လာတာ။ အဲနားမှာ ရဲစခန်းတို့ လွတ်လပ်ရေးကျောက်တိုင်တို့က ကပ်နေတာ။ မနက်သူတို့အပြင်ထွက်တုန်း အစ်အငိုက်လုပ်လိုက်တာပါ။ ပါဆယ်လို့လည်းခေါ်တယ်။ စနစ်တကျထည့်ပြီးတော့ လမ်းဘေးချပြီးတော့ သူတို့ရောက်တဲ့အချိန်မှာ အတိအကျဖောက်ခွဲတိုက်ခိုက်နိုင်ခဲ့တာပါ။”ဟု ကိုသက်ကြီးက ပြောသည်။
အဆိုပါတိုက်ခိုက်မှုကို ZERO ပြောက်ကျားတပ်ဖွဲ့(မြင်းခြံ)နှင့် TRUE Fighter အဖွဲ့တို့က တိုက်ခိုက်ခဲ့ခြင်းဖြစ်ကြောင်း အသိပေးသည်။
မြင်းမူမြို့နယ်တွင် မြို့ပေါ်၌လည်းကောင်း၊ မုံရွာ – လမ်းပိုင်း၌လည်းကောင်း စစ်ကောင်စီတပ်အား ဒေသတွင်းPDFများက မကြာခဏ တိုက်ခိုက်နေသည်။
