စစ်တပ်အာဏာသိမ်းမှုကြောင့် စီးပွားရေးဆိုးဝါးစွာကျဆင်းခဲ့သော မြန်မာနိုင်ငံသည် ၂၀၂၃ခုနှစ်တွင်လည်းစီးပွားရေးတိုးတက်မှုနှေးကွေးနေဆဲဖြစ်ကြောင်း အပြည်ပြည်ဆိုင်ရာနိုင်ငံတကာငွေကြေးရန်ပုံငွေအဖွဲ့(IMF)၏ယနေ့ထုတ်ပြန်သောအစီရင်ခံစာတွင်ဖော်ပြထားသည်။
IMF၏ ခန့်မှန်းတွက်ချက်မှုများအရ စီးပွားရေးတိုးတက်နှုန်းသည် ၂၀၁၈တွင် ၆ ဒသမ ၄ ရာခိုင်နှုန်း၊ ၂၀၁၉ခုနှစ်တွင် ၆ ဒသမ ၈ ရာခိုင်နှုန်း၊ ကိုဗစ်ဖြစ်ခဲ့သော ၂၀၂၀ခုနှစ်တွင် စီးပွားရေးတိုးတက်နှုန်းမှာ ၃ ဒသမ ၂ ရာခိုင်နှုန်းရှိခဲ့သည်။ထိုကြောင့် စစ်တပ်အာဏာမသိမ်းခင် အရပ်သားအစိုးရလက်ထက် ၂၀၂၀ ၌ ကမ္ဘာ့ကပ်ရောဂါ ကိုဗစ်ဖြစ်ခဲ့သော်လည်း နောက်ဆုံး ၃ နှစ်တွင် ပျမ်းမျှ စီးပွားရေးတိုးတက်မှုနှုန်း ၅ ရာခိုင်နှုန်းကျော်ရှိခဲ့သည်။
စစ်တပ်အာဏာသိမ်းပြီးနောက်တွင် ၂၀၂၁၌ စီးပွားရေးတိုးတက်နှုန်းသည် ၁၇ ဒသမ ၉ ရာခိုင်နှုန်းထိ ထိုးကျသွားခဲ့သည်။ ၂၀၂၂ တွင်လည်း အာဏာသိမ်းမှုနောက်ဆက်တွဲနိုင်ငံရေး ၊စီးပွားရေး ပြသာနာများကြောင့် ကမ္ဘာ့ဘဏ်ကပင်မြန်မာ့စီးပွားရေးကို မခန့်တက်တော့ကြောင်းထုတ်ပြန်ခဲ့သည်။
၂၀၂၁ တွင် ၁၈ ရာခိုင်နှုန်းကျဆင်းထားရာမှ ၂၀၂၃တွင်ကျဆင်းခဲ့သောအခြေအနေနှင့်နှိုင်းယှဥ်လျှင် ၃ ဒသမ ၃ ရာခိုင်နှုန်းတိုးတက်လာနိုင်သည်ဟု IMFကဆိုသည်။
“စီးပွားရေးတိုးတက်မှု အနှုတ်လက္ခာပြရာကနေ ပြန်တက်လာတယ်ဆိုရပေ့မယ်။ စီးပွားရေးတိုးတက်မှုနှေးကွေးနေဆဲလိုဆိုရမယ်။ ပုံမှန်အခြေအနေကို ပြန်ရောက်ဖို့ မဖြစ်နိုင်သေးဘူး”ဟု ရန်ကုန်အခြေစိုက်စီးပွားရေးလုပ်ငန်းရှင်တစ်ဦးကပြောသည်။
စစ်အုပ်စုအာဏာသိမ်းထားသောမြန်မာနိုင်ငံတွင်စီးပွားရေးကျဆင်းနေသဖြင့် လုပ်ငန်းလည်ပတ်ရန်အခက်အခဲကြောင့် ဆွစ်ဇာလန်နိုင်ငံမှ ကမ္ဘာကျော်စားသောက်ကုန် ထုတ်လုပ်သော Nestle ကုမ္ပဏီက လုပ်ငန်းများရပ်နား၍ ပြန်တော့မည်ဟု ကြေညာပြီး ၂ ရက်အကြာ၊ ဗြိတိန်အခြေစိုက်နာမည်ကျော် Primark အဝတ်အထည်ကုမ္ပဏီကြီး မြန်မာနိုင်ငံမှာ အထည်အပ်နှံမှုများကို ရပ်ဆိုင်းလိုက်ပြီးနောက် ရွှေပြည်သာ တွင်ရှိသောအထည်ချုပ် စက်ရုံ ၂ ရုံပိတ်သိမ်းလိုက်ရသဖြင့် အလုပ်သမား ၂,၀၀၀ ကျော် အလုပ်လက်မဲ့ဖြစ်သွား၍ ဒုက္ခများနေချိန်တွင်IMF က ၂၀၂၃ မှာ ၂၀၂၁နှင့် နှိုင်းယှဥ်လျှင် စီးပွားရေးအနည်းငယ်ဖွံ့ဖြိုးလာသည်ဟုထုတ်ပြန်လာခြင်းဖြစ်သည်။
လာမည့် ၂၀၂၄တွင်လည်းစီးပွားရေးတိုးတက်နှုန်းမှာဆက်လက်နှေးကွေးနေဦးမည်ဖြစ်ကြောင်းလည်းIMF ကခန့်မှန်းထားသည်။
IMF၏ ထုတ်ပြန်သည့် ညွန်းကိန်းများသည့် စစ်ကောင်စီက ထုတ်ပြန်သည့် အတုအယောင် ကိန်းဂဏန်းများကို အခြေခံတွက်ချက်ထားခြင်းကြောင့်ဖြစ်ပြီး မြေပြင်တွင် စီးပွားရေးလုပ်ငန်းများမှာ လုပ်ငန်းလည်ပတ်နိုင်ရန်ပင် ရုန်းကန်နေရသည်ဟု စီးပွားရေးဆိုင်ရာ အကြံပေးကုမ္ပဏီတစ်ခု၏ မန်နေဂျင်းဒါရိုက်တာတစ်ဦးကလည်းပြောသည်။
စစ်ကောင်စီ ထုတ်ပြန်သောကိန်းဂဏန်းများကို အခြေခံတွက်ချက်ထားသည့်တိုင် အိမ်နီးနိုင်ငံများဖြစ်သည့် ထိုင်း၊ ဘင်္ဂလားဒေ့ရှ်၊ ကမ္ဘောဒီးယား၊ဗီယက်နမ်နိုင်ငံတို့နှင့်နှိုင်းယှဥ်ပါ လွန်စွာနည်းပါးနေသည်ကိုတွေ့ရသည်။
၂၀၂၃တွင်ထိုင်းနိုင်ငံ၏ စီးပွားရေးတိုးတက်နှုန်းမှာ ၃ ဒသမ ၇ ရာခိုင်နှုန်း၊ ဘင်္ဂလားဒေ့ရှ်က ၆ ရာခိုင်နှုန်း၊ ကမ္ဘောဒီးယားက ၆ ဒသမ ၂ ရာခိုင်နှုန်းနှင့် ဗီယက်နမ်နိုင်ငံက ၅ ဒသမ ၈ ရာခိုင်နှုန်းရှိသည်ဟု IMFကဆိုထားသည်။
စစ်တပ်အာဏာသိမ်းထားသောကာလတွင် ငွေကြေးဖောင်းပွမှုနှုန်းများမြင့်တက်နေသလို ၊ ကုန်ဈေးနှုန်းကြီးမြင့်ခြင်းနှင်ြလျှပ်စစ်မီးပျက်သောပြသာနာ ၊အလုပ်လက်မဲ့များပြားလာခြင်း ၊ရာဇဝတ်မှုများထူပြောခြင်း ၊ အဂတိလိုက်စားမှုများပြားခြင်း ၊ အညာကျေးရွာများကိုစစ်တပ်က မီးရှို့နေအကြမ်းဖက်နေသဖြင့် တောင်ယာမလုပ်နိုင်ဘဲ ထွက်ပြေးနေရခြင်း စသောပြသာနာများစွာကိုကြုံတွေ့နေသည်။
