ရွာဦးကျောင်းဆရာတော်ကိုပါ ဖမ်းဆီးသွား
စစ်ကိုင်းတိုင်း၊ ကန့်ဘလူမြို့နယ်တွင် အကြမ်းဖက်စစ်ကောင်စီတပ်က ညောင်ဇင်ကြီးကျေးရွာအား မီးရှို့ဖျက်ဆီးပြီး စိတ်ကျန်းမာရေးမကောင်းသော အမျိုးသားတစ်ဦးအား မီးရှို့သတ်ဖြတ်သွားကြောင်း ဒေသတွင်းသတင်းရင်းမြစ်များက ပြောသည်။
အကြမ်းဖက်စစ်ကောင်စီတပ်က အဆိုပါ ကျေးရွာရှိ နေအိမ် ၃၀ ကျော်နှင့် လယ်ယာသုံးပစ္စည်းများ၊ စပါးများကိုပါ မီးရှို့ဖျက်ဆီးကာ ရွာဦးကျောင်းဆရာတော်ကိုလည်း ဖမ်းဆီးသွားကြောင်း ၎င်းတို့က ပြောသည်။
ယမန်နေ့ (မတ်လ ၂၃ ရက်) ညနေ ၄ နာရီခွဲခန့်က ကန့်ဘလူခရိုင်၊ ထန်းကုန်းတိုက်နယ်၊ညောင်ဇင်ကြီးကျေးရွာကို စစ်ကောင်စီတပ်နှင့်ပျူစောထီးများက အင်အား ၁၅၀ခန့်ဖြင့် ဝင်ရောက်မီးရှို့ဖျက်ဆီးခဲ့ခြင်း ဖြစ်သည်။
![(ညောင်ဇင်ကြီးရွာရှိ မီးရှို့ဖျက်ဆီးခံခဲ့ရသော နေအိမ်များအား တွေ့ရစဥ်။ ဓာတ်ပုံ-ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့)](https://i0.wp.com/www.ludunwayoo.com/wp-content/uploads/2023/03/337241847_583164363758643_9170800868307487479_n.jpg?resize=461%2C1024&ssl=1)
![(ညောင်ဇင်ကြီးရွာရှိ မီးရှို့ဖျက်ဆီးခံခဲ့ရသော နေအိမ်များအား တွေ့ရစဥ်။ ဓာတ်ပုံ-ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့)](https://i0.wp.com/www.ludunwayoo.com/wp-content/uploads/2023/03/337171344_1952594888418880_584950696278375798_n.jpg?resize=692%2C1024&ssl=1)
ထို့နောက် ညောင်ဇင်အရှေ့ကျောင်းရှိ သက်တော် (၆၀)နှစ်အရွယ် ကျောင်းထိုင်ဆရာတော် ဦးသောမလအား ဖမ်းဆီးခေါ်ဆောင်သွားကြောင်း၊ ထို့အပြင် စိတ်ကျန်းမာရေးမကောင်းသည့် အသက် (၃၅) နှစ်အရွယ် ကိုမျိုးမင်းဦး(ခ)ကိုထွန်းမင်းဦးအား မီးရှို့သတ်ဖြတ်သွားကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က ပြော သည်။
စစ်ကောင်စီတပ်နှင့် ပျူများ၏ မီးရှို့ဖျက်ဆီးမှုကြောင့် ညောင်ဇင်ကြီးရွာရှိ နေအိမ် ၃၂လုံး နှင့် ဆိုင်ကယ် ၁၇ စီးအပြင် လယ်ယာသုံးလက်တွန်းထွန်စက် သုံးစီး ၊ ထွန်စက် တစ်စီးနှင့် ဘုန်းကြီးကျောင်းတွင် လာထားကြသော စပါးတင်းရာနှင့်ချီပါ မီးလောင်ဆုံးရှုံးခဲ့ကြောင်း ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့က ပြောသည်။
![(ညောင်ဇင်ကြီးရွာရှိ မီးရှို့ဖျက်ဆီးခံခဲ့ရသော နေအိမ်များအား တွေ့ရစဥ်။ ဓာတ်ပုံ-ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့)](https://i0.wp.com/www.ludunwayoo.com/wp-content/uploads/2023/03/337384827_506395994844945_756345078263794392_n.jpg?resize=720%2C404&ssl=1)
“ ညောင်ဇင်လေးမှာ တပ်စွဲတာ နည်းနည်းကြာပြီ။ ပျူရွာတော့ ပြောမရဘူး။ တချို့ပြည်သူတွေက ထွက်ပြေးနေကြတယ် မနေချင်လို့။ ပျူထဲနေရမှာမို့ အိမ်တွေမီးရှို့မယ်ခြိမ်းခြောက်ပြီးအမြဲပြန် ခေါ်နေတာ။ ဆရာတော်ကိုလည်း ပြန်မလွှတ်သေးဘူး။ဘာကြောင့်ဖမ်းလဲဆိုတာက သူတို့လိုလူစိတ် မရှိတဲ့သူတွေအတွက်တော့ အကြောင်းပြချက်လိုမယ်မထင်ပါဘူး။” ဟု ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့ အဖွဲ့ဝင်တစ်ဦးကပြောသည်။
ထို့အပြင် စစ်ကောင်စီတပ်နှင့်ပျူများသည် ကျေးရွာအတွင်းရှိ ရေမီတာများနှင့် မီးမီတာများကိုပါ ရိုက်ခွဲဖျက်ဆီးခဲ့ပြီး ယမန်နေ့ညနေပိုင်းတွင် ညောင်ဇင်လေးရွာဘက်သို့ ပြန်လည်ဆုတ်ခွာသွားကြောင်း သိရသည်။
“ ညောင်ဇင်ဘုန်းကြီးဖုန်းလဲပေါက်ခွဲတယ်။ ဘုန်းကြီးကိုလည်း ရိုက်နှက်တယ်လို့ သတင်းရတယ်။ သူတို့ထွက်သွားတော့ ရွာသားတွေ အပြေးအလွှား မီးပြန်လာငြှိမ်းကြတယ်လို့ သတင်းရတယ်။” ဟု ဒေသခံတစ်ဦးက ပြောသည်။
![(ညောင်ဇင်ကြီးရွာရှိ မီးရှို့ဖျက်ဆီးခံခဲ့ရသော နေအိမ်များအား တွေ့ရစဥ်။ ဓာတ်ပုံ-ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့)](https://i0.wp.com/www.ludunwayoo.com/wp-content/uploads/2023/03/336918182_229101846266800_9051550768664405658_n.jpg?resize=578%2C1024&ssl=1)
အဆိုပါ စစ်ကြောင်းကြောင့် ညောင်ဇင်ကြီးရွာနှင့်အနီးအနားရှိရွာမှ ဒေသခံ ပြည်သူတစ်သောင်းခန့် ထွက်ပြေးတိမ်းရှောင်နေရကြောင်း သတင်းရရှိသည်။
စစ်ကောင်စီက အာဏာသိမ်းပြီးနောက်ပိုင်း ၂၀၂၁ မေလမှ ၂၀၂၃ ဖေဖော်ဝါရီလကုန်အထိ နေအိမ်ပေါင်း ၆၀,၄၅၉လုံး မီးရှို့ဖျက်ဆီးခံထားရပြီး စစ်ကိုင်းတိုင်းမှာ အများဆုံးဖြစ်ကာ နေအိမ်ပေါင်း ၄၇,၇၇၈လုံး ပျက်စီးဆုံးရှုံးခဲ့ကြောင်း Data For Myanmar အဖွဲ့က ထုတ်ပြန်ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)