စစ်ကိုင်းတိုင်း၊ စစ်ကိုင်းမြို့ပေါ်မှ ဈေးဝယ် ပြန်လာသော ကြွယ်ပုံကျေးရွာမှ စစ်ကောင်စီတပ်သားများနှင့် ပျူစောထီးများကို ဒရုန်းဖြင့် ဗုံးချတိုက်ခိုက်ခဲ့ရာ စစ်သား နှစ်ဦး ဒဏ်ရာရရှိပြီး ဆိုင်ကယ် လေးစီးထား၍ ထွက်ပြေးသွားကြောင်း ယူနီကွန်း ပြောက်ကျားတပ်ဖွဲ့ သတင်းနှင့် ပြန်ကြားရေးတာဝန်ခံက ပြောသည်။
မတ်လ ၃၁ ရက် ညနေ ၅နာရီခန့်က အင်အား ၅၀ ခန့်ဖြင့် စစ်ကိုင်းမြို့ပေါ်ဈေးမှ ရိက္ခာများဝယ်ပြီး ကား၊ ဆိုင်ကယ်၊ ဘေးတွဲဆိုင်များဖြင့် ကြွယ်ပုံကျေးရွာသို့ ပြန်လာသော စစ်သားနှင့်ပျူများကို ဒရုန်းဖြင့် ဗုံးသီး ၁၀ လုံးချပြီး (၄၀) မမဖြင့် တစ်ချက် ပစ်ခတ်တိုက်ခိုက်ခဲ့ခြင်းဖြစ်ကြောင်း ယူနီကွန်းပြောက်ကျားတပ်ဖွဲ့ သတင်းနှင့် ပြန်ကြားရေးတာဝန်ခံက ပြောသည်။
“တခြားအဖွဲ့တွေက မိုင်းဆွဲတာတွေလဲရှိတယ်။ တစ်ချို့တဝက်က မိုင်းဆွဲခံရပြီး လမ်းမှာ ကျန်ခဲ့တာ။ ဒရုန်း နဲ့ ဗုံးကျဲတော့ ဆိုင်ကယ် လေးစီးကို ပစ်ထားခဲ့ပြီးထွက်ပြေးသွားတယ်။ နောက်တနေ့ကျမှလာယူတာ။ ဒရုန်းနဲ့ ၁၀ လုံးချတယ်။ နှစ်လုံးကမကွဲဘူး။ စစ်သားတွေက ကြောက်တော့ အသွားတုန်းက မနက်အစောကြီးခိုးသွားတာ”ဟု အထက်ပါတာဝန်ခံက ပြောသည်။
စစ်အုပ်စုက လက်နက်ငယ်များဖြင့် ပြန်ပစ်ခဲ့ပြီး ကြွယ်ပုံရွာ အထိုင်ချတပ်စခန်းမှလည်း လက်နက်ကြီး နှစ်ချက်ပစ်ကူခဲ့ကြောင်း သိရသည်။
အဆိုပါ စစ်ဆင်ရေးကို Thunder Bird LDF၊ ယူနီကွန်းပြောက်ကျားတပ်ဖွဲ့၊ Phoenix SSG ၊ Fight For Federal ၊ စစ်ကိုင်းမြို့ နယ် ပကဖ၊ စစ်ကိုင်းခရိုင်တပ်ရင်း (၇)တပ်ခွဲ (၄)တို့ပူးပေါင်းတိုက်ခိုက်ခဲ့ခြင်းဖြစ်သည်။
ကြွယ်ပုံရွာသည် စစ်ကောင်စီတပ်၏ လက်နက်တပ်ဆင်ပေးခြင်းခံရသော ပျူရွာတစ်ရွာဖြစ်ပြီး စစ်ကောင်စီတပ်နှင့်ပေါင်းကာ စစ်ကိုင်းနှင့် မြင်းမူနယ်အတွင်းရှိ ကျေးရွာများအား စစ်ကြောင်းထိုးမီးရှို့ခြင်း၊ ပြည်သူများအား ဖမ်းဆီးသတ်ဖြတ်ခြင်းများ ပြုလုပ်နေသည်။
