ရန်ကုန်မြို့ မြောက်ဥက္ကလာပမြို့နယ် (င)ရပ်ကွက်နှင့် (ည) ရပ်ကွက် အုပ်ချုပ်ရေးမှူးရုံး ဗုံးဖြင့်ပစ်ခတ်တိုက်ခိုက်ခံခဲ့ရကြောင်း ဒေသခံပြည်သူများက People’s Spring သတင်းဌာနသို့ ပြောသည်။
ယနေ့ ဧပြီ ၅ ရက်နံနက် ၅ နာရီခွဲခန့်က မြောက်ဥက္ကလာ (င)ရပ်ကွက် သုဓမ္မာလမ်းပေါ်ရှိ စစ်ကောင်စီအုပ်ချုပ်ရေးမှူးရုံးရှေ့တွင် ဗုံးပေါက်ကွဲမှုဖြစ်ပွားခဲ့ခြင်း ဖြစ်သည်။
“(င)ရပ်ကွက်ရုံးဘေးက တာယာဆိုင်ရှေ့မှာ လာခွဲသွားတာ။ အထိအခိုက်မရှိဘူး။ (ရုံးထဲ)အစောင့်တွေတော့ရှိတယ်။ ရုံးဂျူတီ ရာအိမ်မှူးတွေပေါ့”ဟု မြောက်ဥက္ကလာပမှ ဒေသခံပြည်သူတစ်ဦးက People’s Spring သို့ ပြောသည်။
![(မြောက်ဥက္ကလာ (င)ရပ်ကွက်ရုံးအား ညပိုင်းတွေ့မြင်ရစဥ်နှင့် ညရပ်ကွက်ရုံးကိုနေ့ခင်းပိုင်းတွေ့ရစဥ်။ ဓါတ်ပုံ-CJ၊ North Okkalapa Information)](https://i0.wp.com/www.ludunwayoo.com/wp-content/uploads/2023/04/339120154_1608425832963445_100673936254578923_n.jpg?resize=880%2C660&ssl=1)
အဆိုပါ (င)ရပ်ကွက် အုပ်ချုပ်ရေးမှူးရုံးသည် မိန်းလမ်းမကြီးတစ်ခုပေါ်တွင်ရှိသည့် ရုံးတစ်ရုံးဖြစ်ပြီး မြို့ပြတော် လှန်ရေးအဖွဲ့ UG များ၏ တိုက်ခိုက်ခြင်းကို မကြာခဏခံရလေ့ရှိသောကြောင့် ရုံးရှေ့တွင် သဲအိတ်ဘန်ကားများ၊ ဇာပိုက်စိမ်းများဖြင့် ကာရံထားပြီး နေ့ညအစောင့်ချ ထားလေ့ရှိကြောင်း ဒေသခံများက ပြောသည်။
အလားတူဧပြီ ၅ ရက် နံနက် ၅ နာရီခွဲ ဝန်းကျင်မှာပင်မြောက်ဥက္ကလာပမြို့နယ်(ည)ရပ်ကွက် အုပ်ချုပ်ရေးမှူးရုံးကိုလည်း ဗုံး ပစ် တိုက် ခိုက် ခဲ့ကြောင်း မြောက်ဥက္ကလာပမြို့နယ် ပြည်သူ့ကာကွယ်ရေးတပ်ဖွဲ့ တပ်ခွဲ( ၂) က ထုတ်ပြန်သည်။ထိုကြောင့် တစ်ချိန်တည်းတွင် ည ရပ်ကွက်နှင့် င ရပ်ကွက်ရုံးများ ဗုံးတိုက်ခိုက်ခံရခြင်းဖြစ်သည်၊
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
ရဲဘော်များအထိအခိုက်မရှိဆုတ်ခွာနိုင်ခဲ့ပြီး မြောက်ဥက္ကလာပမြို့နယ်အတွင်း အကြမ်းဖက်စစ်ကောင်စီလက်အောက်ခံ အုပ်ချုပ်ရေးပိုင်းဆိုင်ရာများကိုဆက်လက်အရှိန်မြင့်တိုက် ခိုက်သွားမည်ဟု ထုတ်ပြန်ချက်တွင်ဖော်ပြထားသည်။
ဗုံးပေါက်ကွဲသံကျယ်လောင်ခဲ့သော်လည်း ထိ့ခိုက်မှု ကြီးကြီးမားမားမရှိကြောင်းဒေသခံများကပြောသည်။
ထို့အပြင် ယနေ့နံနက် ၅ နာရီ ၄၀ ခန့်ကလည်း ဒဂုံမြို့သစ်အရှေ့ပိုင်းမြို့နယ်တွင် ပေါက်ကွဲမှုတစ်ခုဖြစ်ပွားခဲ့ပြီး အဆိုပါ ပေါက်ကွဲမှုဖြစ်ပွားခဲ့သည့်နေရာအား အတိအကျမသိရသေးပေ။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)