စစ်ကောင်စီက ဦးစီးကျင်းပမည့် ပြည်သူ့ရင်ပြင်ရှိ သင်္ကြန်မဏ္ဍပ်အနီးတွင် ယနေ့နံနက်ပိုင်းက ဗုံးပေါက်ကွဲမှုထပ်မံဖြစ်ပွားခဲ့ကြောင်း ဒေသခံများက ပြောသည်။
ယနေ့(ဧပြီ ၉ရက်)နံနက်၉နာရီခွဲခန့်တွင် စမ်းချောင်းမြို့နယ်ရှိ ပြည်သူ့ရင်ပြင်၌ ဗုံးနှစ်လုံးပေါက်ကွဲခဲ့ခြင်းဟု ဆိုသည်။
“ဒီမနက် ၉ ခွဲကျော်လောက်က ဆက်တိုက်ပေါက်တာ။သိရသလောက်တော့ ထိခိုက်မှုမရှိဘူး”ဟု စမ်းချောင်းမြို့နယ်နေသူတစ်ဦးက လူထုနွေဦးသို့ ပြောသည်။
ယခုပေါက်ကွဲမှု ဖြစ်စဥ်ကို မည်သည့်အဖွဲ့က ဆောင်ရွက်ခဲ့ခြင်းကို မသိရသေးပေ။
ပြည်သူ့ရင်ပြင်တွင် စစ်ကောင်စီက လမ်းလျှောက်သင်္ကြန်ပြုလုပ်မည်ဟု ယခုလ ၆ ရက်က ကြေညာခဲ့သည်။
ထို့နောက် ယမန်နေ့ညပိုင်းတွင် ပြည်သူ့ရင်ပြင်ရှိ ဗဟိုမဏ္ဍပ်နှင့် စမ်းချောင်းရဲစခန်းရှေ့ သင်္ကြန်ရေကစားမဏ္ဍပ်တို့ကို အဝေးထိန်းဗုံးဖြင့် ဖောက်ခွဲတိုက်ခိုက်ခဲ့ကြောင်း Dark Shadow (YGN UG) အဖွဲ့က အသိပေးထုတ်ပြန်ထားသည်။
စစ်ကောင်စီကကျင်းပသော သင်္ကြန်ပွဲကို လက်မခံကြောင်းနှင့် စစ်ကောင်စီအားပေးထောက်ခံသော သင်္ကြန်ပွဲဖြစ်မြောက်စေရန် ပူးပေါင်းပါဝင်နေသူများကို ပြင်းထန်စွာ အရေးယူသွားမည်ဟု မြို့ပြတော် လှန်ရေးအင်အားစုများက သတိပေးထားသည်။
အလားတူ နိုင်ငံ၏ လက်ရှိစစ်ရေးအခြေအနေ အရ ထွက်ပြေးတိမ်ရှောင်နေရသော စစ်ဘေးရှောင်များ နှင့် တော်လှန်ဒေသများကို မျက်နှာမူ၍ သင်္ကြန်ကာလအတွင်း စုရုံးပျော်ပါးခြင်းကို ရှောင်ရှားကြရန် တိုက်တွန်းမှုများရှိနေသည်။
