ရွှေကူတွင် တိုက်ပွဲဆက်လက်ပြင်းထန်နေ၊ စစ်ကောင်စီတပ် လေကြောင်းမှ အကြိမ်ကြိမ် ပစ်ကူပေးတိုက်ခိုက်နေရ

ကချင်ပြည်နယ် ရွှေကူမြို့အနီး ကျေးရွာများ၌ ကချင်လွတ်လပ်ရေးတပ်မတော်(KIA)၊ ပြည်သူ့ကာကွယ်ရေးတပ်(KPDF) ပူးပေါင်းအဖွဲ့များနှင့် စစ်ကောင်စီတပ်တို့ တိုက်ပွဲဆက်လက်ပြင်းထန်နေကြောင်း ဒေသတွင်း ပြည်သူများက အသိပေးသည်။

ပြီးခဲ့သည့် ရက်ပိုင်းများအတွင်းက ရွှေကူမြို့နယ်ရှိ မံဝိန်း၊ စီသာ၊ စီသောင် စသည့် ဒေသများ၌ တိုက်ပွဲပြင်းထန်ခဲ့ပြီး စစ်ကောင်စီတပ်က လေကြောင်းတိုက်မှုများ လုပ်ဆောင်သကဲ့သို့ ယမန်နေ့ (ဧပြီ ၈ရက်) တွင်လည်း မံခါးရွာအနီး စစ်ကောင်စီတပ်က လေကြောင်း တိုက်ခိုက်ခဲ့သည်ဟု ဆိုသည်။ထို့အပြင် ဧပြီ ၇ရက်ကလည်း မံခါးရွာကို စစ်ကောင်စီတပ်က မီးရှို့ဖျက်ဆီးခဲ့ကြောင်း ဒေသခံတစ်ဦးက ပြောသည်။

“ရွာတွေလည်း အကုန်လုံးနီးပါးဖြစ်သွားပြီ။အကုန်မီးရှို့ကြတယ်။ အခုညနေ(ဧပြီ ၇ရက်ညနေ)က မံခါးရွာကို ရှို့နေတာ။ စီသာရွာလည်း ထပ်ရှို့တယ်” ဟု စစ်ရှောင်နေရသည့် ရွှေကူဒေသခံက People’s Spring သို့ ပြောကြားထားသည်။

ယနေ့ ဧပြီ ၉ရက်မနက်တွင်လည်း ပစ်ခတ်မှုများ ဆက်ရှိနေကြောင်းဒေသခံက ဆိုသည်။

ရွှေကူ KPDF သတင်းနှင့် ပြန်ကြားရေး တာဝန်ခံက ပစ်ခတ်မှုများဆက်ရှိနေကြောင်း အတည်ပြုပေးပြီး စစ်ရေးအခြေအနေများအရ အသေးစိတ်ဖြစ်စဉ်များ လတ်တလော ဖြေကြားရန်မရှိသေးဟု ယနေ့မနက်တွင် ပြောသည်။

ကချင်သတင်းဌာန KNG၏ တိုက်ပွဲသတင်းတွင် ယမန်နေ့က မံခါးရွာအနီး စစ်ကောင်စီက လေကြောင်း တိုက်ခိုက်ခဲ့ကြောင်း၊ မံခါးရွာနီးတိုက်ပွဲ၌ စစ်ကောင်စီတပ်များ သေဆုံးထိခိုက်ရှိခဲ့၍ လေကြောင်း တိုက်ခိုက်လာခြင်းဖြစ်ကြောင်း ဖော်ပြထားသည်။

အဆိုပါ ရွှေကူမြို့နယ်သည် KIA တပ်ရင်း (၁၂) နယ်မြေဖြစ်သည်။

ရွှေကူဒေသ တိုက်ပွဲများ ဆက်တိုက်ဖြစ်ပွားနေကြောင်း KIA သတင်းနှင့် ပြန်ကြားရေးဌာနတာဝန်ခံ ဗိုလ်မှူးကြီးနော်ဘူက People’s Spring သို့ ဧပြီ ၇ရက်တွင် အတည်ပြုပြောကြားထားပြီး စစ်ကောင်စီတပ်က သေဆုံးထိခိုက်မှုများရှိ၍ လေကြောင်း တိုက်ခိုက်မှုများ လုပ်ဆောင်နေကြောင်း အသိပေးသည်။