စစ်ကိုင်းတိုင်း ဗန်းမောက်မြို့နယ် ကြောင်လည်ကျေးရွာအနီးကို စစ်ကောင်စီတပ်က ယမန်နေ့ညသန်းခေါင်တွင် လေကြောင်းမှ ဗုံးကြဲတိုက်ခိုက်ခဲ့ကြောင်း Banmauk Revolutionက အသိပေးသည်။
ဧပြီ ၈ရက် ည ၁၂နာရီတွင် ကြောင်လည်ရွာအနီး ဗုံးကြဲတိုက်ခိုက်ခဲ့ကြောင်း၊ ထိခိုက်ပျက်စီးမှု အခြေအနေ မသိရသေးကြောင်း ဖော်ပြသည်။
၂၀၂၂ နှစ်ကုန်ပိုင်းကလည်းကြောင်လည်ရွာရှိ ဆေးရုံကို စစ်ကောင်စီတပ်က လေကြောင်းက တိုက်ခိုက်ခဲ့၍ ထိခိုက်ပျက်စီးမှုရှိခဲ့သည်။
ထို့ပြင် စစ်ကောင်စီနှင့် ၎င်း၏ လက်အောက်ခံ ရှမ်းနီတပ်(SNA) ပူးပေါင်းအဖွဲ့သည် မတ္တရာရွှေမော်ကို မီးရှို့သွားကြောင်း၊ ဒေသခံ ပြည်သူများလည်း ထွက်ပြေးနေရကြောင်း Banmauk Revolutionက ယနေ့ ထုတ်ပြန်ခဲ့သည်။
ဗန်းမောက်မြို့နယ်အတွင်း လတ်တလော စစ်ရေးအခြေ အနေဖော်ပြနိုင်ရေးအတွက် စုံစမ်းနေဆဲဖြစ်သည်။ ပြီးခဲ့သည့် မတ်လကုန်ပိုင်းကမူ ဗန်းမောက် ပင်ဟင်းခါး ရွာ၊ ရွှေကျောင်းရွာ၊ အလယ်ရွာ ကံရွာများအနီး တိုက်ပွဲ သုံးဆက်ရက်ဖြစ်ပွားခဲ့ပြီး စစ်ကောင်စီတပ်က အထိနာခဲ့သည်။
ဗန်းမောက်နှင့် ဆက်စပ်နေသည့် အင်းတော်မြို့နယ်တွင်လည်း တိုက်ပွဲများပြင်းထန်ခဲ့ပြီး ဧပြီ ၆ရက်နှင့် ၇ ရက်တိုက်ပွဲများ၌ စစ်ကောင်စီတပ် သေဆုံးထိခိုက်များခဲ့ကြောင်း အင်းတော် PDF ရဲဘော်တစ်ဦးက ယမန်နေ့တွင် People’s Spring သတင်းဌာနသို့ဖြေကြားထားသည်။
