▪︎စစ်အာဏာရှင်အမြန်ချုပ်ငြိမ်းရေးဟန်ချက်ညီအစွမ်းကုန်တိုက်ပွဲဝင်ရန် အထူးလိုအပ်နေဟု ကြေညာ
အကြမ်းဖက် စစ်ကောင်စီတပ်မှ အပြစ်မဲ့ ပြည်သူလူထုများအား ပစ်မှတ်ထား တိုက်ခိုက်နေခြင်းနှင့် ပတ်သက်ပြီး အပြစ်ကျူးလွန်သူများအား အပြစ်ကင်းလွတ်ခွင့်မရှိစေရေးအတွက် အရေးယူ ဆောင်ရွက်နိုင်ရေးကို တော်လှန်ရေးအင်အားစုများ အမြန်ဆုံး ပူးပေါင်းဆောင်ရွက်လိုအပ်ကြောင်း ကရင်နီပြည်နယ်အတိုင်ပင်ခံကောင်စီ(KSCC)က ယနေ့ ထုတ်ပြန်သည်။
စစ်ကောင်စီက စစ်ကိုင်းတိုင်း ပဇီကြီးရွာရှိ ပြည်သူလူထုများ အပါအဝင် တစ်နိုင်ငံလုံးမှ အပြစ်မဲ့ ပြည်သူလူထုများအား အစုလိုက်အပြုံလိုက် သတ်ဖြတ်နေမှုနှင့်ပတ်သက်ပြီး KSCCက သဘောထား ထုတ်ပြန်ခဲ့ခြင်းဖြစ်သည်။
စစ်အာဏာရှင် အမြန်ဆုံး ချုပ်ငြိမ်းရေး အတွက် အလုံးစုံညီညွတ်ရေးကို တည်ဆောက်ပြီး ဟန်ချက်ညီညီဖြင့် အစွမ်းကုန် တိုက်ပွဲဝင်သွားကြရန် အထူလိုအပ်နေကြောင်းလည်း KSCCက တိုက်တွန်းခဲ့သည်။
စစ်ကောင်စီတပ်သည် မတ်လ ၃၀ရက်တွင် ချင်းပြည်နယ် ခွာဖိုရွာကို လေကြောင်း တိုက်ခိုက်ခဲ့ရာ ပြည်သူ ၉ဦးသေဆုံးပြီး ဒဏ်ရာရသူများပြားခဲ့သည်။ ယနေ့ ဧပြီ ၁၁ရက်တွင် စစ်ကိုင်းတိုင်း ပဇီကြီးရွာ လေကြောင်း တိုက်ခိုက်မှုတွင် အရပ်သားပြည်သူ အနည်းဆုံး ၅၃ ဦးသေဆုံးပြီး ဒဏ်ရာရသူ များစွာရှိခဲ့သည်။ ယမန်နေ့ ဧပြီ၁၀ ဖလမ်းမြို့နယ် ဝေဘူလမြို့ကို လေကြောင်း တိုက်ခိုက်ရာတွင်လည်း ပြည်သူ ၉ဦးသေဆုံးခဲ့ရသည်။ ထို့ပြင် ကရင်နီပြည်နယ်၌ ဧပြီ ၇ရက် လေကြောင်း တိုက်ခိုက်မှုအတွင်း အရေးပေါ် ကယ်ဆယ်ရေးအဖွဲ့မှ ကျန်းမာရေးစောင့်ရှောက်ပေးနေသူ ၂ဦး အသက်ဆုံးရှုံးခဲ့ရသည်။
အကြမ်းဖက်စစ်ကောင်စီတပ်များသည် တိုင်းပြည်အာဏာကို မတရား သိမ်းယူပြီးနောက် တစ်နိုင်ငံလုံးရှိ ပြည်သူလူထုများအား ပစ်မှတ်ထား အစုလိုက်အပြုံလိုက် လေကြောင်းဖြင့် တိုက်ခိုက်သတ်ဖြတ်နေမှုများ လုပ်ဆောင်ခဲ့ရာ ယခုနှစ်တွင် အရှိန်မြှင့်ကျူးလွန်လာခဲ့သည်ကို တွေ့ရှိရကြောင်း KSCCက ထုတ်ပြန်သည်။
