ချင်းပြည်နယ် မင်းတပ်မြို့နယ်ကို စစ်ကောင်စီတပ်က ယနေ့ညပိုင်းတွင် လေကြောင်းမှ ဗုံးကြဲတိုက်ခိုက်ခဲ့သည်ဟု မင်းတပ် ချင်းကာကွယ်ရေးတပ်(CDF)က ထုတ်ပြန်သည်။
ယနေ့ ဧပြီ ၁၁ရက် ၈နာရီခန့်တွင် မင်းတပ်မြို့နယ် တိုက်နယ်(၁) ဘက်ရှိ ကျေးရွာတစ်ရွာအနီး တိုက်လေယာဉ်ဖြင့် ၄ကြိမ် ဗုံးကြဲတိုက်ခိုက်ခဲ့သည်ဟု ဖော်ပြသည်။
အဆိုပါတိုက်ခိုက်မှုကြောင့် ထိခိုက်ပျက်စီးမှု အခြေအနေကို ဖော်ပြထားခြင်းမရှိပေ။
စစ်ကောင်စီတပ်သည် မင်းတပ်မြို့နယ် ကို လေကြောင်း တိုက်ခိုက်မှု၊ လက်နက်ကြီး ပစ်ခတ်မှုများ ယခုနှစ်အတွင်း မကြာခဏ လုပ်ဆောင်ခဲ့သည်။
ဖေဖော်ဝါရီလအတွင်းက မင်းတပ်အခြေစိုက် ခလရ(၂၇၄)တပ်မမမှ လက်နက်ကြီးများဖြင့် ပစ်ခတ်၍ အရပ်သားသေဆုံးထိခိုက်ရှိခဲ့သည်။ မတ်လအတွင်း၌လည်း စစ်ကောင်စီက မင်းတပ်မြို့နယ်ကိုလေကြောင်းတိုက်ခိုက်မှု ၈ကြိမ် ပြုလုပ်ခဲ့သည်။
ယနေ့နံနက် အစောပိုင်းတွင် စစ်တပ်က ကန့်ဘဘူမြို့နယ်ပဇီကြီးရွာကို ဂျက်တိုက်လေယာဥ်၊ Mi-35 ရဟတ်ယာဥ်များနှင့်တိုက်ခိုက်၍ ဒေသခံပြည်သူ တစ်ရာဝန်းကျင် သေဆုံးဒဏ်ရာရခဲ့သည်။ထိုအပြင် ယနေ့ညနေပိုင်းတွင်လည်း ပဇီကြိးရွာကို လေကြောင်းမှ ထပ်မံတိုက်ခိုက်ခဲ့သေးပြီး သေဆုံးဒဏ်ရာရမှုနှင့် ထိခိုက်ပျက်စီးမှုအခြအနေကိုမသိရသေးပေ။
ထိုနောက်ညပိုင်းတွင် မင်းတပ်မြို့နယ်သို့ စစ်တပ်က လေကြောင်းမှ သွားရောက်တိုက်ခိုက်ခဲ့ခြင်းဖြစ်သည်။
