စစ်ကောင်စီတပ်သား ၅ဦးထက်မနည်းထိခိုက်သေဆုံးနိုင်ကြောင်း တောကြီးမြွေပွေးပြောက်ကျားတပ်ဖွဲ့ခေါင်းဆောင် ပြော
မန္တလေးတိုင်း၊ မတ္တရာမြို့တွင် ကင်းပတ်လာသော စစ်ကောင်စီတပ်အား မိုင်းဆွဲတိုက်ခိုက်ရာ ၅ ဦးထက်မနည်း ထိခိုက်သေဆုံးနိုင်ကြောင်း တောကြီးမြွေပွေးပြောက်ကျားတပ်ဖွဲ့ခေါင်းဆောင် ဗိုလ်တီက ပြောသည်။
ယမန်နေ့ (ဧပြီ ၁၂ ရက်) ည၉ နာရီခန့်က မတ္တရာမြို့အဝင် ရုပ်တုအနီးရှိ ပြည်ခိုင်ဖြိုးပါတီရုံးရှေ့လှည့်ကင်းပတ်နေသည့် စစ်ကောင်စီတပ်ဖွဲ့ဝင်များအား မိုင်းအကြီးစားဖြင့် ဖောက်ခွဲတိုက်ခိုက်ခဲ့ရာ စစ်ကောင်စီတပ်သား ၅ ဦးထက်မနည်း ထိခိုက်သေဆုံးနိုင်ကြောင်း တောကြီးမြွေပွေးပြောက်ကျားတပ်ဖွဲ့ခေါင်းဆောင် ဗိုလ်တီက ပြောသည်။
ယင်းစစ်ဆင်ရေးကို မတ္တရာမြို့နယ်အခြေစိုက်တပ်ဖွဲ့ဝင်များနှင့် တောကြီးမြွေပွေးပြောက်ကျား တပ်ဖွဲ့တို့ ပူးပေါင်းဆောင်ရွက်ခဲ့ပြီး ကန့်ဘလူမြို့နယ်၊ ပဇီကြီးကျေးရွာတွင် ကျဆုံးခဲ့ရသော အပြစ်မဲ့ပြည်သူများ၊ ကလေးသူငယ်များအတွက် သွေးကြွေးပြန်ယူသည့်အနေဖြင့် တိုက်ခိုက်ခဲ့ခြင်းဖြစ်ကြောင်း ပါဝင်တိုက်ခိုက်ခဲ့သည့် ပြည်သူ့ကာကွယ်ရေးအဖွဲ့များက ပြောသည်။
“ကန့်ဘလူအတွက် ပြန်လုပ်တာပါ။ မြို့ထဲထိ ဝင်လုပ်ရတာ။”ဟု ဗိုလ်တီက ပြောသည်။
မတ္တရာမြို့နယ်အတွင်းရှိ ပြည်သူများအနေဖြင့် စစ်ကောင်စီက ပြုလုပ်မည့် သွေးစွန်းသင်္ကြန်တွင် ပါဝင်ဆင်နွှဲခြင်း လုံးဝမပြုလုပ်ကြရန် ဒေသတွင်းပြည်သူ့ကာကွယ်ရေးအဖွဲ့များက မေတ္တာရပ်ခံထားသည်။
