▪︎မဟာမိတ်များနှင့်လက်တွဲ၍ စစ်ကောင်စီကိုတိုက်ခိုက်နေကြောင်း ဗမာပြည်သူ့လွတ်မြောက်ရေးတပ်တော်(BPLA)ကွပ်ကွဲရေးမှူး မောင်ဆောင်းခကပြောကြား
ဗမာပြည်သူ့လွတ်မြောက်ရေးတပ်တော်(BPLA)၏ ၂ နှစ်ပြည့်တပ်တော်နေ့အခမ်းအနားသို့ တိုင်းရင်းသားလက်နက်ကိုင်အဖွဲ့များနှင့် NUG ကာကွယ်ရေးဝန်ကြီးဌာနတို့က ဂုဏ်ပြုသဝဏ်လွှာပေးပို့သည်။
ယနေ့(ဧပြီ ၁၇ ရက်)ကျရောက်သော ဗမာပြည်သူ့လွတ်မြောက်ရေးတပ်တော်(BPLA) တပ်တည်ထောင်ခြင်း(၂)နှစ်ပြည့်အခမ်းအနားကို အမှတ်(၁၀၇)စစ်ဒေသနှင့် နိုင်ငံရေးမှူးရုံးတို့၌ ကျင်းပပြုလုပ်ခဲ့ကြောင်း BPLA က သတင်းထုတ်ပြန်သည်။
BPLA သည် (၂)နှစ်အတွင်း စစ်ဒေသနှစ်ခုသတ်မှတ်နိုင်ခဲ့ပြီး မဟာမိတ်များနှင့်လက်တွဲကာ စစ်ကောင်စီကို တိုက်ထုတ်နေကြောင်း ဗမာပြည်သူ့လွတ်မြောက်ရေးတပ်တော်(BPLA)ကွပ်ကွဲရေးမှူး မောင်ဆောင်းခက ပြောသည်။
“လက်ရှိမှာဆိုရင် အပတ်စဥ်(၅)မကြာခင်ပြီးတော့မှာဖြစ်သလို အခြားသော အဆင့်မြင့်သင်တန်းများလည်း ပြုလုပ်လျက်ရှိပါတယ်။ ကျနော်တို့ရဲ့စစ်ရေးရည်မှန်းချက်ဖြစ်တဲ့ ဗမာဒေသမှာရှိတဲ့ တော်လှန်ရေးတပ်ဖွဲ့တွေနဲ့ စနစ်တကျပူးတွဲပြီး အဲ့ဒီဘက်မှာတိုက်ပွဲဖော်ဆောင်နိုင်ဖို့ကိုလည်း ကြိုးစားဆောင်ရွက်နေပါတယ်” ဟု ၎င်းက BPLA ၏ လုပ်ဆောင်နေမှုကို ရှင်းပြသည်။
BPLA သည် စစ်အာဏာရှင်စနစ်အား အခြားသော ညီနောင်မဟာမိတ်တော်လှန်ရေးအင်အားစုများ၊ ပြည်သူ့ကာကွယ်ရေးတပ်ဖွဲ့များနှင့် လက်တွဲညီညီ ခုခံတွန်းလှန် တိုက်ပွဲဝင်လျက် အနာဂတ်ဖက်ဒရယ် တပ်မတော်တွင်ကြီးကြီးမားမားအားဖြည့်ကူညီနိိုင်ပါစေဟု အမျိုးသားညီညွတ်ရေးအစိုးရ NUG ကာကွယ်ရေးဝန်ကြီးဌာနက သဝဏ်လွှာပေးပို့သည်။
ပြည်သူ့ကာကွယ်ရေးတပ်ဖွဲ့များထူထောင်ရာတွင် အဖက်ဖက်မှ ဝိုင်းဝန်းပံ့ပိုးကူညီလက်တွဲခေါ်ယူပေးသော ညီနောင်မဟာမိတ် တော်လှန်ရေးအဖွဲ့အစည်းများအားလုံးကို ဗမာပြည်သူလူထုကိုယ်စားမမေ့ မလျော့ကျေးဇူးတင်ရှိနေမည်ဟု ကာကွယ်ရေးဝန်ကြီးဌာနက ဖော်ပြသည်။
ညီနောင်မဟာမိတ်သုံးဖွဲ့(MNDAA၊ TNLA၊ AA)ကလည်း ဗမာပြည်သူလူထုများနှင့် တိုင်းရင်းသားတော်လှန်ရေးလက်နက်ကိုင်အဖွဲ့အစည်းအချို့၏ ဖေးမမှု၊ ဝန်းရံပံ့ပိုးပေးမှု၊ ယုံကြည်မှုကို ရရှိထားသည့် BPLA သည် တိုက်ပွဲအတွေ့အကြုံအတန်အသင့်ရရှိထားပြီး ယင်းအဖွဲ့အစည်းကို ဦးဆောင်နေကြသူများနှင့် BPLA တပ်ဖွဲ့ဝင်များအားလုံး၏ စည်းလုံးညီညွတ်မှု၊ ကြိုးပမ်းအားထုတ်မှု၊ တော်လှန်ရေးစည်းကမ်းလိုက်နာနိုင်မှုများကို တန်ဖိုးထားအသိအမှတ်ပြုကြောင်း သဝဏ်လွှာပေးပို့သည်။
BPLA အနေဖြင့် မြန်မာပြည်သူတစ်ရပ်လုံးလိုလားသော အနာဂတ်မျှော်မှန်းချက်များကို အချိန်တိုအတွင်း အကောင်အထည်ဖော်နိုင်ပြီး စစ်အာဏာရှင်စနစ် တိုက်ဖျက်ရေးလုပ်ငန်းများတွင် ယခုထက်ပိုမို ဆောင်ရွက်နိုင်ပါစေကြောင်း၊ တိိုင်းပြည်သစ်နှင့် ပြည်သူ့အတွက် တည့်မတ်မှန်ကန်သော ရပ်တည်ချက်များဖြင့် ဦးဆောင်အလုပ်လုပ်ပေးနိုင်သည့် အဖွဲ့အစည်းဖြစ်ပါစေကြောင်း ညီနောင်မဟာမိတ်သုံးဖွဲဲ့က ဆုမွန်ကောင်းတောင်းသည်။
ကရင်အမျိုးသားလွတ်မြောက်ရေးတပ်မတော်(KNLA)ဒုတိယစစ်ဦးစီးချုပ် ဒုတိယဗိုလ်ချုပ်ကြီး ဘောကျော်ဟဲကလည်း BPLA ၏ ၂ နှစ်ပြည့်တပ်တော်နေ့ အခမ်းအနားသို့ ဂုဏ်ပြုသဝဏ်လွှာပေးပို့သည်။
