ယင်းမာပင်မြို့ပေါ်ရှိ စုပေါင်းရုံးနှင့် ရဲစခန်းကို ပစ်ခတ်တိုက်ခိုက်
စစ်ကိုင်းတိုင်း၊ ဆားလင်းကြီးမြို့နယ်တွင် သင်္ကြန်အကြတ်နေ့က ကင်းထောက်ရဲဘော်တစ်ဦး ဖမ်းဆီးသတ်ဖြတ်ခံရပြီးနောက် ညပိုင်းတွင် ယင်းမာပင်မြို့ပေါ်ရှိ စစ်အုပ်စုတပ်စွဲရာ စုပေါင်းရုံးနှင့် ရဲစခန်းကို ပစ်ခတ်တိုက်ခိုက်ခဲ့ကြောင်း ဒေသတွင်း PDF အဖွဲ့များက ပြောသည်။
ဧပြီ ၁၅ ရက် သင်္ကြန်အကြတ်နေ့က ဆားလင်းကြီးမြို့နယ်၊ ညောင်ပင်ကြီးရဲစခန်း တပ်စွဲထားသော စစ်ကောင်စီတပ်ကို ကင်းထောက်သွားခဲ့သည့် မဟာမိတ် YPFတပ်ဖွဲ့့မှရဲဘော် အပုလေး (ခ) နေရဲလင်းသည် စစ်ကောင်စီတပ်၏ ပစ်ခတ်ခြင်းခံခဲ့ရကြောင်း ဆားလင်းကြီးအခြေစိုက် SGZ PDFအဖွဲ့က သတင်းထုတ်ပြန်သည်။
စစ်ကောင်စီတပ်သည် သင်္ကြန်အကြတ်နေ့က ညောင်ပင်ကြီးရဲစခန်းအနီးရှိ ထန်းတောရွာကို မီးရှို့ခဲ့ပြီးနောက် ရဲဘော်တစ်ဦးကို ပစ်ခတ်သတ်ဖြတ်သွားခြင်းဖြစ်ကြောင်း ဒေသခံများက ပြောသည်။
“ရဲဘော်တစ်ဦးက မီးရှို့နေချိန် ရောက်လာတော့ ပစ်သတ်သွားတာလို့ ကြားတယ်”ဟု ဒေသခံတစ်ဦးက ပြောသည်။
ထိုနေ့ညပိုင်းတွင် ဒေသတွင်းမဟာမိတ်များပူးပေါင်းကာ ယင်းမာပင်စုပေါင်းရုံးနှင့် ရဲစခန်းအား (၆၀)မမ ၊(၈၀)မမ နှင့် (၁၂၀)မမ လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း Salingyi Border Task Force – SBTF အဖွဲ့၏ သတင်းနှင့် ပြန်ကြားရေးတာဝန်ခံက ပြောသည်။
အဆိုပါ စစ်ဆင်ရေးကို ယင်းမာပင် – ဆားလင်းကြီးလက်နက်ကြီးမဟာမိတ်တပ်ပေါင်းစုများဖြစ်သော Salingyi Border Task Force – SBTF၊ Eagle Defense Force-EDF၊ Fighter Brotherhood Guerrilla Army၊ Black Shadow၊ Real Hero၊ ချင်းတွင်းညီနောင်စသည့်အဖွဲ့များ ပူးပေါင်းတိုက်ခိုက်ခဲ့ကြောင်း အသိပေးထားသည်။
မုံရွာ အနောက်မြောက်တိုင်းစစ်ဌာနချုပ်(နမခ)မှ စစ်ကောင်စီတပ်သည် ဧပြီ ၁၂ရက်က ညောင်ပင်ကြီးစခန်းသို့ ရောက်ရှိလာပြီး ထိုနေ့ညပိုင်းကတည်းက လက်နက်ကြီးများဖြင့် ပစ်ခတ်ခဲ့၍ ဆားလင်းနယ်ရှိ ကျေးရွာများမှ ပြည်သူများ ထွက်ပြေးတိမ်းရှောင်ခဲ့ရသည်။
ဧပြီ ၁၃ ရက် ညတွင်လည်း ဒေသတွင်းPDFများနှင့် ပစ်ခတ်တိုက်ခိုက်မှုများရှိခဲ့ပြီး စစ်အုပ်စုအထိအခိုက်ရှိကာ နယ်မြေခံPDFအဖွဲ့က တပ်သားတစ်ဦးဒဏ်ရာရရှိခဲ့သည်။
