နိုင်ငံရေးပါတီတွေကို မှတ်ပုံပြန်တင်ခိုင်းပြီးနောက် စစ်ကောင်စီဟာ ကြံခိုင်ရေးပါတီကို ပထမဆုံးမှတ်ပုံတင်တဲ့ ပါတီအဖြစ် မနေ့ ဧပြီလ ၂၀ ရက်မှာ မှတ်ပုံတင်ချပေးလိုက်ပါတယ်။
စစ်ကောင်စီထံ မှတ်ပုံပြန်တင်တဲ့ နိုင်ငံရေးပါတီ ၆၃ ပါတီရှိတဲ့အနက် စစ်တပ်ကျောထောက်နောက်ခံ ကြံခိုင်ရေးပါတီ ကို ပါတီမှတ်ပုံတင်အမှတ်စဉ် (၁) နဲ့ နိုင်ငံရေးပါတီ မှတ်ပုံတင်ခွင့် ပြုလိုက်တာပါ။
စစ်ကောင်စီထိန်းချုပ်ထားတဲ့ သတင်းစာမှာဖော်ပြချက်အရ နေပြည်တော် မှာရှိတဲ့ ကြံခိုင်ရေးဌာနချုပ် ကို စစ်ကောင်စီရဲ့ ရွေးကောက်ပွဲ ကော်မရှင် ဥက္ကဋ္ဌ ဦးသိန်းစိုး သွားရောက်စစ်ဆေးပြီး မှတ်ပုံတင်ခွင့်ပြုတာလို့သိရပါတယ်။
အဲဒီသတင်းစာမှာဖော်ပြထားတဲ့ ဓာတ်ပုံအရ ကြံခိုင်ရေး ရုံးချုပ်မှာ ဦးသိန်းစိုးနဲ့ ကြံခိုင်ရေးပါတီခေါင်းဆောင်ပိုင်းတွေကို အတူတကွတွေ့ရပါတယ်။
စစ်ဗိုလ်ချုပ်ဟောင်း ဦးသိန်းစိုးဟာ စစ်တပ်စီစဉ်တဲ့ ၂၀၁၀ ရွေးကောက်ပွဲ မှာ ရွေးကောက်ပွဲဥက္ကဋ္ဌ တာဝန်ယူခဲ့သူပါ။
၂၀၂၁ ခုနှစ်တကျော့ပြန် အာဏာသိမ်းမှုအပြီးမှာလည်း အာဏာသိမ်း စစ်ခေါင်းဆောင်က သူ့ကို ရွေးကောက်ပွဲဥက္ကဋ္ဌ ရာထူးပြန်ခန့်ပါတယ်။
ဦးသိန်းစိုး ဥက္ကဋ္ဌ အဖြစ်တာဝန်ယူခဲ့တဲ့ ၂၀၁၀ ရွေးကောက်ပွဲ ဟာ ကြိုတင်မဲတွေနဲ့ နာမည်ကြီးပြီး ကြံခိုင်ရေးပါတီအနိုင်ရတဲ့ ရွေးကောက်ပွဲလည်းဖြစ်ပါတယ်။
အခုတစ်ခေါက်မှာလည်း ဦးသိန်းစိုးဟာ အာဏာသိမ်းစစ်ကောင်စီ ကျင်းပမယ့်ရွေးကောက်ပွဲမှာ ကြံခိုင်ရေးပါတီ အနိုင်ရဖို့ စနစ်တကျ စီမံနေတယ်လို့ ဝေဖန်မှုတွေရှိနေပါတယ်။
