စစ်ကိုင်းနယ်ရှိ အင်းစရွာ စစ်ကောင်စီတပ် မီးရှို့ဖျက်ဆီးရာ ရွာလုံးကျွတ်နီးပါးပြာကျ

အဆိုပါ စစ်ကောင်စီတပ်အား ဒေသကာကွယ်ရေးအဖွဲ့များ တိုက်ခိုက်

စစ်ကိုင်းမြို့နယ်ရှိ အင်းစကျေးရွာကို စစ်ကောင်စီတပ်က ရွာလုံးကျွတ်မီးရှို့ဖျက်ဆီးနေစဥ် သွားရောက်တိုက်ခိုက်ရာ စစ်သား သုံးဦးသေဆုံးကြောင်း အာဏာရှင်စနစ်တိုက်ဖျက်ရေးပြည်သူ့တပ်ဖွဲ့ (PAFD)၏ သတင်းနှင့် ပြန်ကြားရေးတာဝန်ခံက ပြောသည်။

ယနေ့ (ဧပြီ ၂၁ ရက်) နံနက် ၉နာရီခန့်က စစ်ကိုင်းမြို့နယ်၊ အင်းစကျေးရွာသို့ ရောက်ရှိလာပြီး ရွာလုံးကျွတ်မီးရှို့ဖျက်ဆီးခဲ့ကြောင်း ဒေသခံများက ပြောသည်။

ထိုသို့ဖျက်ဆီးနေစဉ် PAFDတပ်ဖွဲ့နှင့် ဒေသခံကာကွယ်ရေးတပ်ဖွဲ့များက လက်လုပ်လက်နက်ငယ်များ၊ (၆၀) မမလက်လုပ်များနှင့်တိုက်ခိုက်ရာ စစ်အုပ်စုဘက်က သုံးဦးသေဆုံးပြီး သုံးဦးထိခိုက်ဒဏ်ရာရရှိကြောင်း PAFD ၏ သတင်းနှင့် ပြန်ကြားရေးတာဝန်ခံက ပြောသည်။

“၁၉ ရက်နေ့ကစပြီး မြင်းမူမြို့နယ်ထဲ အကုန်စစ်ကြောင်းထိုးပြီး မူးမြစ်ကို ဖြတ်တယ်။ ဒီနေ့မနက်မှာ အင်းစရွာကိုဝင်ပြီး ဝင်ဝင်ချင်းမီးတိုက်တယ်။ လူအင်အားတစ်ရာကျော်ပါတယ်။ အဲဒီအချိန်မှာထိပ်တိုက်တွေ့ပစ်ခတ်ခဲ့တာပါ။”ဟု အထက်ပါတာဝန်ခံက ပြောသည်။

စစ်ကောင်စီတပ်၏ မီးရှို့ဖျက်ဆီးမှုကြောင့် အိမ်ထောင်စု ၃၀၀ ကျော်၏ နေအိမ်တစ်ထောင်ခန့် ပျက်စီးနိုင်ကြောင်း၊ စစ်ဘေးမီးဘေးသင့်ပြည်သူများနှင့် ခုခံတိုက်ခိုက်လျက်ရှိသောကာကွယ်ရေးတပ်ဖွဲ့များ အရေးပေါ်အကူအညီလိုအပ်နေကြောင်း ဒေသတွင်းအဖွဲ့များက ပြောသည်။

“မိနစ်ပိုင်းလေးပဲ ပြာကျသွားတာ။”ဟု စစ်ကိုင်းအခြေစိုက် စစ်​ဘေးလူမှုကူညီရေးလုပ်ကိုင်နေသူတစ်ဦးက ပြောသည်။

အဆိုပါ တိုက်ခိုက်မှုကို People’s Army To Fight Dictatorship(PAFD)၊တပ်ခွဲ DK PDF-MMU၊ ဒေသကာကွယ်ရေးတပ်ဖွဲ့၊Phonex(SGG)စသည့်မဟာမိတ်ပူးပေါင်းတပ်ဖွဲ့များက တိုက်ခိုက်ခဲ့ကြောင်း အသိပေးထားသည်။

ပြီးခဲ့သည့် မတ်လ ၁ ရက် နှင့် ၂ ရက်များကလည်း စစ်ကိုင်းမြို့နယ်၊ တာတိုင်ကျေးရွာတွင် စစ်ကောင်စီ၏ တပ်မ(၉၉)က ပြည်သူ့ကာကွယ်ရေးတပ်ဖွဲ့ခေါင်းဆောင်တစ်ဦးနှင့် ဒေသခံ ၁၆ ဦးကို ကိုယ်လက်အင်္ဂါများ ဖြတ်တောက်ကာ အစုလိုက်၊အပြုံလိုက် သတ်ဖြတ်မှု ကျူးလွန်ခဲ့သေးသည်။