ပြည်သူများ မီးငြှိမ်းသတ်စဉ် စစ်ကောင်စီတပ်က လက်နက်ကြီးဖြင့်ပစ်ခတ်
စစ်ကိုင်းတိုင်း၊ မြင်းမူမြို့နယ်ရှိ လက်ထုတ္တောကျေးရွာကို စစ်ကောင်စီတပ်က မီးရှို့ဖျက်ဆီးခဲ့ရာ နေအိမ် ၆၀၀ ကျော် မီးလောင်ပျက်စီးဆုံးရှုံးခဲ့ပြီး ပြည်သူနှစ်ဦး မီးလောင်သေဆုံးခဲ့ကြောင်း ဒေသတွင်းသတင်းရင်းမြစ်များက ပြောသည်။
![(လက်ထုတ္တောရွာအား စစ်ကောင်စီတပ် မီးရှို့ဖျက်ဆီးသွားပြီးနောက် တွေ့ရစဥ်။ ဓာတ်ပုံ-မြင်းမူမြို့နယ်သတင်းမှန်ပြန်ကြားရေး)](https://i0.wp.com/www.ludunwayoo.com/wp-content/uploads/2023/05/345258329_1363931450839456_4203868280857502839_n.jpg?resize=720%2C332&ssl=1)
ယနေ့ (မေလ ၆ ရက်) နံနက် ၆နာရီခန့်က ချောင်းဦးမြို့နယ်၊ နတ်ရေကန်ကျေးရွာမှထွက်လာသည့်စစ်ကောင်စီတပ် စစ်ကြောင်းသည် မြင်းမူမြို့နယ် လက်ထုတ္တောကျေးရွာကို နံနက်၇နာရီခန့်တွင် စတင်ဝင်ရောက်ခဲ့သည်။
ထို့နောက် နံနက် ၈ နာရီခွဲခန့်တွင် ရွာမြောက်ပိုင်းမှ စတင်မီးရှို့ကာ ရွာပတ်လည်စည်းရိုးများကိုလည်း မီးရှိုခဲ့သည်။ အိမ်ခြေ ၇၀၀ခန့်ရှိသည့်အနက် ၆၀၀ ကျော် မီးလောင်ဆုံးရှုံးခဲ့ကြောင်း၊ ထို့အပြင် ဒေသခံ အမျိုးသား နှစ်ဦး မီးလောင်သေဆုံးခဲ့ပြီးနှစ်ဦးဒဏ်ရာရရှိခဲ့ကြောင်း မြင်းမူမြို့နယ်သတင်းမှန်ပြန်ကြားရေးအဖွဲ့က ပြောသည်။
![(လက်ထုတ္တောရွာအား စစ်ကောင်စီတပ် မီးရှို့ဖျက်ဆီးသွားပြီးနောက် တွေ့ရစဥ်။ ဓာတ်ပုံ-မြင်းမူမြို့နယ်သတင်းမှန်ပြန်ကြားရေး)](https://i0.wp.com/www.ludunwayoo.com/wp-content/uploads/2023/05/344800653_761091438977711_2002252926198258994_n.jpg?resize=720%2C332&ssl=1)
“ဘုန်းကြီးကျောင်းအရှေ့ခြမ်းဘက်ကအိမ်တွေအကုန်ပါသွားပြီ။ ရွာရဲ့ အိမ်ခြေတော်တော်များများ ကုန်သွားပြီ။ သေးသေးတခြမ်းပဲရှိတော့တာပါ။”ဟု ဒေသခံတစ်ဦးက ပြောသည်။
ကျေးရွာရှိ နွား၊ဝက်များလည်းအများအပြားသေဆုံးခဲ့ကြောင်း ဒေသခံများက ပြောသည်။
စစ်ကောင်စီတပ်သည် မီးရှို့ပြီးနောက် နံနက်၁၀ နာရီခန့်တွင် နတ်ရေကန်ကျေးရွာဘက် ပြန်သွားသည်။
![(လက်ထုတ္တောရွာအား စစ်ကောင်စီတပ် မီးရှို့ဖျက်ဆီးသွားပြီးနောက် တွေ့ရစဥ်။ ဓာတ်ပုံ-မြင်းမူမြို့နယ်သတင်းမှန်ပြန်ကြားရေး)](https://i0.wp.com/www.ludunwayoo.com/wp-content/uploads/2023/05/344822490_765984421862502_6778588695078615993_n.jpg?resize=720%2C332&ssl=1)
ထို့နောက် နံနက် ၁၁ နာရီခွဲခန့်တွင် ဒေသခံများက ကျေးရွာအား မီးဝင်ရောက်ငြှိမ်းသတ်ရာ စစ်ကောင်စီတပ်က ရေပိုးစားကန်ကွေ့မှ လက်နက်ကြီးများဖြင့် ပစ်ခတ်ခဲ့ကြောင်း မြင်းမူမြို့နယ်သတင်းမှန်ပြန်ကြားရေးအဖွဲ့က ပြောသည်။
ယမန်နေ့ (မေလ ၅ရက်)နံနက်ပိုင်းက မုံရွာ-မန္တလေးလမ်းတစ်လျှောက် မိုင်းရှာထွက်လာသော အင်အား (၃၀)ပါ စစ်ကောင်စီတပ်အား မြင်းမူမြို့နယ်၊ ဘိုးမင်းကြီးကင်းနှင့် ဂွေးပင်တောကြားရှိ မိုင်းကွင်းပေါ် အရောက် ပဒေသာမိုင်း၈ လုံးတွဲဖြင့် မိုင်းဆွဲတိုက်ခိုက်ခဲ့ရာ စစ်အုပ်စုအထိအခိုက်များခဲ့ကြောင်း Black Eagle Defence Force-MMUအဖွဲ့က ထုတ်ပြန်ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)