ကချင်ပြည်နယ် ဖားကန့်မြို့တွင် ယမန်နေ့(မေလ ၉ ရက်) ညနေက စစ်ကောင်စီတပ် မိုင်းဆွဲတိုက်ခိုက်ခံရပြီး နှစ်ဦးသေဆုံးသွားကြောင်း သတင်းရရှိသည်။
ဖားကန့်မြို့၊အေးမြသာယာရပ်ကွက်ရှိ ညောင်ပင်ကုန်းအတက်တွင် ယင်းနေ့ ညနေက ၆နာရီခန့် က စစ်ကောင်စီတပ်ဖွဲ့ဝင်များ မိုင်းဆွဲတိုက်ခိုက်ခံရခြင်းဟု ဒေသခံများက ပြောသည်။
“စစ်တပ်ကကောင်တွေက ပြည်သူတွေကို တားဆီးပြီး စစ်နေတာ။ နေရာတော်တော်များများစစ် တယ်။ ညောင်ပင်ကုန်းအတက်မှာတော့ မိုင်းခွဲခံရတယ်။ နှစ်ကောင်သေတာ သေချာတယ်။ မျက်မြင်တွေ့ရတာပါ”ဟု ဒေသခံတစ်ဦးက ပြောသည်။
သို့သော် မည်သည့်အဖွဲ့က ဖောက်ခွဲတိုက်ခိုက်သည်ကို မသိရသေးပေ။
ယမန်နေ့ည ၉ နာရီခန့်ကလည်း ဖားကန့်မြို့ ကျောက်သွေတောင်လမ်းဆုံတွင် ပြင်းထန်သည့်ပေါက်ကွဲမှု ဖြစ်ခဲ့သည်ဟု ဒေသခံများက ပြောသည်။
ထို့အပြင် ည ၁၁နာရီခန့်တွင် ဖားကန့်မြို့ ဆိပ်မူရဲကင်းဘက်မှ ပစ်ခတ်သံများ ထွက်ပေါ်ခဲ့ကြောင်း ဒေသခံများက ပြောသည်။
