ထိခိုက်သေဆုံးရှိနိုင်ဟု ထား၀ယ်စုပေါင်းစစ်ကြောင်းပြော
ထား၀ယ် – ထီးခီးနယ်စပ်ဒေသမှပြန်လာသည့် စစ်ကောင်စီတပ်စစ်ကြောင်းကို လမ်းတစ်နေရာမှ စောင့်ကြို၍ မိုင်းလေးလုံးဖြင့် ဖောက်ခွဲတိုက်ခိုက်ခဲ့ကြောင်း ထား၀ယ်စုပေါင်းစစ်ကြောင်းမှ တာ၀န်ရှိသူတစ်ဦးက ပြောသည်။
ယမန်နေ့ (မေလ ၉ ရက်)နံနက် ၈ နာရီခန့်တွင် ထား၀ယ်စုပေါင်းစစ်ကြောင်းမှ ရဲဘော်များက ထား၀ယ်နယ် အရှေ့တောဒေသ အညာဖျားကျေးရွာအနီး တောလမ်းတစ်အတိုင်း စစ်ကောင်စီတပ်သားများလာရောက်မည်ကို သတင်းကြိုရ၍ တိုက်ခိုက်ရန်အတွက် တိုက်မိုင်းလေးလုံးမြှပ်နှံထားခဲ့သည်ဟု ဆိုသည်။
ထို့နောက် စစ်ကောင်စီတပ်စစ်ကြောင်းအား တိုက်မိုင်းနှစ်လုံးဖြင့် ပေါက်ကွဲမှုဖြစ်ပြီး အများအပြားထိခိုက်သေဆုံးမှုရှိသော်လည်း အတိအကျ မသိရသေးဟု စုပေါင်းစစ်ကြောင်းမှ တာ၀န်ရှိသူတစ်ဦးက People’s Spring သို့ ပြောသည်။
“မိုင်းကအကြီးအစား အသုံးပြုထားတာပါ။ ခြေပြတ်၊ လက်ပြတ်တွေ၊ ခေါင်းကွဲသွားတာတွေ၊ သေတဲ့သူလည်းရှိတယ်လို့ သိရပါတယ်”ဟု ၎င်းတာ၀န်ရှိသူက ဆိုသည်။
ထားဝယ်ဒေသခံတစ်ဦးက “စစ်ကောင်စီတပ်ကအင်အား ၁၀၀လောက်ပါတယ်။ ထိုင်းနယ်စပ်က ပြန်လာတာတဲ့။ အရပ်သား ၆ယောက်ကို ဖမ်းသွားတယ်လို့ကြားတယ်”ဟု ပြောသည်။
ပြီးခဲ့သည့် ဧပြီ ၂၃ ရက်ကလည်း ထား၀ယ်နယ် မဲချောင်းကျေးရွာအနီး တပ်စွဲထားသည့် စစ်ကောင်စီတပ်စခန်းငယ်တစ်ခုကို ထား၀ယ်ခရိုင် PDF တပ်ရင်း (၁)နှင့်ထား၀ယ်စုပေါင်းစစ်ကြောင်းတို့ပူးပေါင်းပြီး ၀င်ရောက်စီးနင်းတိုက်ခိုက်ခဲ့သေးသည်။
ထားဝယ်စုပေါင်းစစ်ကြောင်း(Dawei Collective Column)တွင် EasternDefenseForce-EDF၊ DaweiDefenseTeam-DDT၊ ထားဝယ်တောင်ပိုင်းပြည်သူ့ကာကွယ်ရေးအဖွဲ့(DSPDF)တို့ ပါ၀င်သည်။
