လက်နက် ၇လက်နှင့် ကျည်ခဲယမ်းများစွာရဟု NUG အသိပေး
စစ်ကိုင်းတိုင်း မော်လိုက်မြို့နယ်၊ တောင်အင်းကျေးရွာအနီးရှိ စစ်ကောင်စီတပ် စခန်းကုန်းအား ယမန်နေ့က တိုက်ခိုက်သိမ်းပိုက်ခဲ့ရာ စစ်ကောင်စီတပ်မှ အရာရှိအပါအဝင် ၁၀ဦးသေဆုံးပြီးလက်နက်ခဲယမ်းများ သိမ်းဆည်းရရှိခဲ့ကြောင်း အမျိုးသားညီညွတ်ရေးအစိုးရ(NUG) ကာကွယ်ရေးဝန်ကြီးဌာနက ယနေ့ သတင်းထုတ်ပြန်သည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
စစ်ကောင်စီ၏ ခမရ (၃၆၅)၊ခမရ (၃၆၆)၊ ရဲနှင့် ပျူစောထီး အင်အား ၅၀ခန့် ပူးပေါင်းအခြေချတပ်စွဲထားသော စခန်းကုန်းအား ဇွန်လ ၃၀ရက် နံနက်အစောပိုင်း၌ ပြည်သူ့ကာကွယ်ရေးတပ်မတော်၊ အမှတ်(၁)စစ်ဒေသ၊ မော်လိုက်ခရိုင်တပ်ရင်း (၂)၊ တပ်ရင်းမှူးဦးစီးသော ပြည်သူ့ကာကွယ်ရေးတပ်မတော်သားများက တိုက်ခိုက်ခဲ့ခြင်းဖြစ်သည်ဟု ဆိုသည်။
![(စခန်းသိမ်းတိုက်ပွဲမှ သိမ်းဆည်းရမိသော လက်နက်ခဲယမ်းများအား တွေ့ရစဉ်။ ဓာတ်ပုံ - MOD/NUG)](https://i0.wp.com/www.ludunwayoo.com/wp-content/uploads/2023/07/357471916_607731284759001_6553151327073142146_n.jpg?resize=526%2C595&ssl=1)
စခန်းသိမ်းတိုက်ပွဲဖြစ်ပွားရာသို့ စစ်ကောင်စီတပ် ဒေသကွပ်ကဲမှုစစ်ဌာနချုပ်(ကလေး)တွင် ယာယီ အခြေပြုထားသည့် Mi-35 အကြီးစားတိုက်ခိုက် ရေး ရဟတ်ယာဉ်ဖြင့် သုံးကြိမ်လာရောက်တိုက်ခိုက်ခဲ့ပြီးတံတားဦး လေတပ်စခန်းမှ တက်လာသည့် A-5 ဗုံးကြဲတိုက်ခိုက်ရေး လေယာဉ်ဖြင့် တစ်ကြိမ်လာရောက် တိုက်ခိုက်ခဲ့သော်လည်း ရန်သူ့စခန်းကုန်းအား သိမ်းပိုက်ရရှိခဲ့ကြောင်း အသိပေးထားသည်။
![(စခန်းသိမ်းတိုက်ပွဲမှ သိမ်းဆည်းရမိသော လက်နက်ခဲယမ်းများအား တွေ့ရစဉ်။ ဓာတ်ပုံ - MOD/NUG)](https://i0.wp.com/www.ludunwayoo.com/wp-content/uploads/2023/07/356845318_607731324758997_6151278697377076751_n.jpg?resize=880%2C659&ssl=1)
စခန်းသိမ်းတိုက်ပွဲမှာ နံနက် ၅နာရီ ၁၅မိနစ်အချိန်မှ နံနက် ၁၁နာရီ ၄၅မိနစ်ခန့်အထိ ၆နာရီခွဲကျော်ကြာမြင့်ခဲ့ပြီး ရန်သူအကြမ်းဖက်စစ်တပ်မှ ဗိုလ်ကြီး တစ်ဦးအပါအဝင် ၁၀ဦးသေဆုံးခဲ့ကြောင်း ထုတ်ပြန်သည်။
![(စခန်းသိမ်းတိုက်ပွဲမှ သိမ်းဆည်းရမိသော လက်နက်ခဲယမ်းများအား တွေ့ရစဉ်။ ဓာတ်ပုံ - MOD/NUG)](https://i0.wp.com/www.ludunwayoo.com/wp-content/uploads/2023/07/357400010_607731304758999_2387875956397030879_n.jpg?resize=880%2C660&ssl=1)
ထို့ပြင် စစ်ကောင်စီတပ်ထံမှ MA-7 (၆၀) မမ စိန်ပြောင်းအရှည် တစ်လက်၊ BA-100 (၆၀) မမ ကွန်မန်ဒိုစိန်ပြောင်း တစ်လက်၊ MA-10 RPG တစ်လက်၊ MA 1 တစ်လက်၊ MA 2 တစ်လက်၊ BA-64 တစ်လက်၊ M1 ကာဘိုင် တစ်လက်နှင့် ကျည်၊ ခဲယမ်းအများအပြား စစ်အသုံးအဆောင်များ သိမ်းဆည်းရရှိခဲ့ကြောင်း ဓာတ်ပုံမှတ်တမ်းများနှင့်အတူ ဖော်ပြသည်။
အဆိုပါတိုက်ခိုက်မှုအတွင်း PDFရဲဘော်များ ထိခိုက်ကျဆုံး ရှိ၊မရှိ အခြေအနေကို ဖော်ပြထားခြင်းမရှိပေ။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)