ကရင်နီ(ကယား)ပြည်နယ် တိုက်ပွဲများတွင် အောင်မြင်မှုများ အဆက်မပြတ်ရရှိနေကြောင်း ကရင်နီအမျိုး သားများကာကွယ်ရေးတပ် KNDF ဥက္ကဌ ခွန်ဘီးထူး က ပြောသည်။
လက်ရှိ မယ်စဲ့ မြို့သိမ်းတိုက်ပွဲအပါအဝင် ကရင်နီဒေသ၏ စစ်ရေးကို KNDF ၏ လူမှုကွန်ယက် စာ မျက်နှာမှတဆင့် ယနေ့ ညပိုင်းတွင် ၎င်းက အထက်ပါအတိုင်း သတင်းစကားပါခဲ့ခြင်း ဖြစ်သည်။
“လက်ရှိ အခြေအနေအရတော့ စစ်ကောင်စီဘက်က ထုတ်ပြန်တဲ့ အရာတွေရှိသလို ကျွန်တော်တို့ဘက်ကတော့ လောလောဆယ်အထိ အောင်မြင်မှုတွေ အဆက်မပြတ်ရရှိထားပါတယ်။ရရှိထားတဲ့ အရာတွေကို သိုဝှက်ထားတာမဟုတ်ပါဘူး။သို့သော် လောလော ဆယ် စီစဥ်စရာလေးတွေရှိသေးတဲ့အတွက် နားလည်ပေးဖို့ ပြောလိုပါတယ်”ဟု KNDF ဥက္ကဌက ရှင်းပြသည်။
အထူးသဖြင့် စစ်ရေးအရ အရေးကြီးသည့်အောင် မြင်မှု များ ဆက်လက်ရရှိနိုင်ရန်အတွက် သတင်းထုတ်ပြန်မှုကို အစောတလျင်မပြုလုပ်သေးဟု အသိပေးသည်။
သို့သော် လက်ရှိအချိန်ထိ စိတ်အားငယ်မှုမရှိဘဲ ပံ့ပိုးကူညီနေသည့် ထောက်ပို့ကဏ္ဍမှပြည်သူအားလုံးကို ကျေးဇူးတင်ကြောင်းလည်း ခွန်းဘီထူးက ဆိုသည်။
“အရေးအကြီးဆုံးက ခုချိန်မှာကျွန်တော်တို့အတွက် ထောက်ပို့ကူညီမှုတွေကို ဆက်လက်ပံပိုးပေးဖို့တိုက်တွန်းလိုပါတယ်”ဟု ၎င်းကဆက်ပြောသည်။
ထို့အပြင် လေယာဥ်ပစ်လက်နက် ပွိုင့် ၅ ကမ်ပိန်းမှာအောင်မြင်စွာ ပြီးဆုံးသွားပြီဟုလည်း အသိပေးထား သည်။
“KNDF ရဲ့ ပွိုင့် ၅ ကမ်ပိန်းကလည်း အောင်မြင်စွာ ပြီး ဆုံးသွားပါပြီ။အရေးအကြီးဆုံးက ကရင်နီ ပွိုင့် ၅ ကမ်ပိန်း facebook page(ယခု ကရင်နီအိပ်မက်ဟု အမည်ပြောင်းထားသည်)ကို KNDF ရဲ့ Fundraising page အဖြစ် ဆက်လက်ပြီးတော့ မှ တည်ဆေက်သွားမှာ ဖြစ်ပါတယ်။KNDF အတွက် တပ်ရင်း အသီးသီးအတွက် အဲဒီ Page ကနေ ထည့်ဝင်လှူဒါန်းနိုင်သလို KNDF ဗဟိုက စီစဥ်တဲ့ Fundraising ကိစ္စတွေမှာ လည်း ပါဝင်ကူညီပေးဖို့ ဖိတ်ခေါ်လိုပါတယ်။ဒီ Page က ကျွန်တော်တို့ရဲ့ တရားဝင် Page ဖြစ်သလို အဆက်မပြတ်ပံ့ပိုးကူညီသူအားလုံးနဲ့လည်း အတက် နိုင်ဆုံး အနီးစပ်ဆုံး ဆက်လက်ပြီးတော့မှ တည် ဆောက်နိုင်ဖို့ မျှော်လင့်ပါတယ်”ဟု KNDF ဥက္ကဌက ပြောသည်။
ပွိုင့် ၅ ၏ အောင်မြင် မှုများကို ကရင်နီအိပ်မက် Page မှတဆင့် အသိပေးသွားမည်ဖြစ်ကြောင်းလည်းအသိပေးသည်။
ယမန်နေ့(ဇွန် ၃၀ )က ရွာသစ်မြို့နယ်၊ သံလွင်မြစ်ဘေးရှိ တောင်ဆားလဲ ကျေး ရွာ၌ စစ်ကောင်စီ၏ အပေါ့စားဂျက်တိုက်လေယာဥ်တစ်စီးကို ကရင်နီပူးပေါင်းအဖွဲ့ ပစ်ချနိုင်ခဲ့ကြောင်း စစ်ရေးသတင်းရင်းမြစ်များကပြောသည်။
ဇွန်လ ၁၃ ရက်နေ့က စ၍ ရွာသစ်မြို့နှင့် မယ်စဲ့မြို့နယ်များရှိ စစ်ကောင်စီ တပ်စခန်းများကို ကရင်နီပူးပေါင်းတပ်ဖွဲ့တွေက သိမ်းယူနိုင်ခဲ့ပြီးနောက် စစ်ကောင်စီက မြေပြင် တပ်ရင်း လေးခု အသုံးပြု၍ ပြန်လည်ထိုးစစ် ဆင်နေသည်။
