မွန်ပြည်နယ် ဘီးလင်းမြို့နယ်ရှိ ကျုံအိတ်တံတားကို ကရင်အမျိုးသားလွတ်မြောက်ရေးတပ်မတော်(KNLA) ပူးပေါင်းတပ်ဖွဲ့က မိုင်းခွဲတိုက်ခိုက်မှုနှင့် တံတားလာစစ်သည့် စစ်ကောင်စီအဖွဲ့ကို ဒရုန်းဖြင့်တိုက်ခိုက်မှု ဖြစ်စဉ်များအတွင်း စစ်ကောင်စီဘက်က ထိခိုက်ဒဏ်ရာရသူ ၃၀ကျော်ရှိကြောင်း နယ်မြေခံ KNLA တပ်မှူးက ယနေ့ ညနေပိုင်းတွင် ပြောသည်။
ဇွန်လ ၂၈ရက် ညပိုင်းတွင် တံတားကို မိုင်းခွဲခဲ့ပြီး ဇွန်လ ၂၉ရက် နံနက်တွင် တံတားလာစစ်သည့် စစ်ကောင်စီအဖွဲ့ကို ဒရုန်းဖြင့် ဗုံးသီး ၁၀လုံးချ တိုက်ခိုက်ခဲ့ခြင်းဖြစ်သည်ဟု ၎င်းကဆိုသည်။
တံတားလာစစ်သည့်အဖွဲ့အား တိုက်ခိုက်ရာ အရာရှိအပါအဝင်သေဆုံးသူ နှစ်ဦးရှိပြီး ဒဏ်ရာရသူ ၃၀ကျော်ရှိကြောင်း ၎င်းက ဆိုသည်။
ထိခိုက်ဒဏ်ရာရသူများထဲတွင် ရဲ၊ စစ်ကောင်စီတပ်နှင့် စစ်ကောင်စီလက်အောက်ခံ ဝန်ထမ်းများ၊ အရာရှိများ ပါဝင်သည်ဟုဆိုသည်။
“လမ်းပေါ် ဒဏ်ရာရ အုပ်စုအကူညီတောင်မရ။ ကားလေးတွေ ပြန်လှည့်ပြေး။ မိနစ် ၂၀ လောက် ငရဲလို ခံစားအော်ဟစ် တံတားနား။ တံတားကျိုးတာ မသိဘဲအရှိန်နဲ့ မောင်းဆင်း နှစ်စီး၊ တစ်စီးကျန် Wကား(လိုင်စင်မဲ့ကား) ကယ်ရီ။ သထုံမြို့သစ်ရဲစခန်းကပါတယ်။ နှစ်ကောင်ပွဲပြီး” ဟု KNLA တပ်မှူးက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
KNLA ပူးပေါင်းတပ်ဖွဲ့သည် ယမန်နေ့ (ဇွန်လ ၃၀ရက်)တွင်လည်း ဘီးလင်းမြို့နယ်၌ စစ်ကောင်စီတပ်များကို ထပ်မံတိုက်ခိုက်ခဲ့သေးသည်။ ဘီးလင်းမြို့နယ် အလူးကလေးရွာ အနီးတွင် ယမန်နေ့က တိုက်ပွဲ နှစ်ကြိမ်ဖြစ်ခဲ့ရာ စစ်ကောင်စီတပ်က ကားတစ်စီး ပျက်စီးပြီး ခုနစ်ဦး သေဆုံးကာ ထိခိုက်ဒဏ်ရာရသူများရှိခဲ့ကြောင်း KNLA နယ်မြေခံတပ်မှူးကပြောသည်။
အဆိုပါတိုက်ခိုက်မှုများကို KNLA၊ KRF၊PDF၊ ABSDF၊ ကျိုက်ထိုနှင့်ဘီးလင်းပကဖတပ်ဖွဲ့များ ပူးပေါင်းထားသည့် စစ်ကြောင်းက တိုက်ခိုက်ခဲ့ခြင်းဖြစ်သည်ဟုဆိုသည်။
ထို့ပြင် ယမန်နေ့ နံနက်ပိုင်းက ဘီးလင်းမြို့ သံတံတားဂိတ်ရှိ စစ်ကောင်စီတပ်ကိုလည်း ဒရုန်းဖြင့် ဗုံးသီးလေးလုံးချတိုက်ခိုက်ခဲ့ကြောင်း ကျိုက်ထိုတော်လှန်ရေးအင်အားစု(KRF)က ထုတ်ပြန်ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)