သိမ်ဇရပ်ရှိ စစ်ဆေးရေးဂိတ်ကို KNLA ပူးပေါင်းတပ်ပစ်ခတ်ရာ စစ်ကောင်စီတပ် နှစ်ဦးသေ

မွန်ပြည်နယ် ကျိုက်ထိုမြို့နယ် သိမ်ဇရပ်ရှိ စစ်ကောင်စီတပ် စစ်ဆေးရေးဂိတ်ကို ကရင်အမျိုးသားလွတ်မြောက်ရေးတပ်မတော်(KNLA)ပူးပေါင်းတပ်ဖွဲ့ ဝင်ရောက်ပစ်ခတ်ခဲ့ရာ စစ်ကောင်စီဘက်က သေဆုံးထိခိုက်မှုရှိခဲ့သည်ဟု KNLA နယ်မြေခံတပ်မှူးက ပြောသည်။

ဇူလိုင် ၃ရက် နံနက်ပိုင်းတွင် သိမ်ဇရပ် စက္ကူစက်ရုံအနောက်နားရှိ စစ်ကောင်စီ စစ်ဆေးရေးဂိတ်ကို သထုံခရိုင် မိတ်ဖက်ရေးရာကော်မတီ ပူးပေါင်းစစ်ကြောင်းက ပစ်ခတ်ခဲ့ခြင်းဖြစ်သည်ဟုဆိုသည်။

ထိုသို့ ပစ်ခတ်မှုကြောင့် စစ်ကောင်စီတပ်သား နှစ်ဦးသေဆုံးပြီး ပျူစောထီးတစ်ဦး ဒဏ်ရာရရှိခဲ့ကြောင်း KNLA တပ်မှူးက ပြောသည်။

အဆိုပါတိုက်ခိုက်မှုအတွင်း KNLA ပူးပေါင်းတပ်ဖွဲ့က ထိခိုက်မှုမရှိဟုလည်း အသိပေးသည်။

သိမ်ဇရပ်အပါအဝင် ကရင်အမျိုးသားအစည်းအရုံး(KNU) တပ်မဟာ(၁)နယ်မြေများအတွင်းရှိ စစ်ကောင်စီတပ်များကို ပူးပေါင်းတပ်ဖွဲ့က တိုက်ခိုက်မှုများ ဆက်တိုက်လုပ်ဆောင်လျက်ရှိရာ ဇွန်လ ၂၈ရက်မှ ဇူလိုင် ၂ရက်အတွင်း စစ်ကောင်စီတပ်မှ သေဆုံးသူနှင့် ထိခိုက်ဒဏ်ရာရရှိသူ စုစုပေါင်း ၅၀ဦးခန့်ရှိသည်ဟု KNLA သတင်းရင်းမြစ်နှင့် အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနတို့က အသိပေးထားသည်။

စစ်ကောင်စီတပ်ထောက်ပို့လမ်းကြောင်း ဖြတ်တောက်ရန် တံတားကို မိုင်းခွဲဖျက်ဆီးခြင်း၊ တံတားလာစစ်သည်စစ်ကောင်စီတပ်ကို ဒရုန်းဖြင့် တိုက်ခိုက်ခြင်း၊ စစ်ကောင်စီယာဉ်တန်း၊ စစ်ကြောင်းနှင့် စစ်ဆေးရေးဂိတ်များကို ဒရုန်းဖြင့် တိုက်ခိုက်ခြင်းတို့ ဆက်တိုက်လုပ်ဆောင်လျက်ရှိသည်။