ရဲခေါင်/People’s Spring
ပြင်ပ ငွေကြေးဈေးကွက်တွင် သြဂုတ် ၂ ရက်၌ အမေရိကန်တစ်ဒေါ်လာ ၅,၆၂၀ ကျပ်အထိ စံချိန်တင်မြင့်တက်နေပြီး အခေါက်ရွှေစျေး တစ်ကျပ်သား သိန်း ၇၀ နီးပါရှိလာကြောင်း ပြည်တွင်းစီးပွားရေးလုပ်ငန်းရှင်းများထံမှ သိရသည်။
“ဒေါ်လာစျေးက တစ်ပတ်တည်းမှာ တင် တစ်ရက်ကို ၂၀၀ နဲ့ ၃၀၀ ကြားတက်နေတာ။ဒီနေ့(သြဂုတ် ၂ ရက်) ပေါက်စျေးက ၅,၆၂၀ ပေါက်တယ်။ဒီနေ့ နေကုန်လောက်ဆို ၅,၈၀၀ လောက်အထိ ဖြစ်လာနိုင်တယ်။ဒါတောင် ဝယ်ရတာ အရမ်းမလွယ်ဘူး။တကယ်လိုတဲ့သူတွေတောင်ရှာရခက်နေတာ”ဟုပို့ကုန်လုပ်ငန်း ရှင်တစ်ဦးက ပြောသည်။
Public Service Announcement
ပြည်တွင်း ရွှေစျေးမှာမူ စစ်ကောင်စီက ရွှေအသင်းများမှတဆင့် ဈေး သတ်မှတ်ချက်ရှိသော်လည်း အမှန်တကယ် စျေးကွက်အတွင်း ၌မူ အမေရိကန်ဒေါ်လာတန်ဖိုးတက်နေမှု အတိုင်းလိုက်ပါတက်လေ့ရှိပြီး ယနေ့ နေ့လည်ပိုင်းအထိ ၆၉ သိန်း ငါးသောင်း ခန့်ရှိနေသည်။
ထို့အတူ စက်သုံးဆီစျေး နှုန်းမှာလည်း နေ့စဥ်မြင့်တက်နေပြီး အချို့ဆီဆိုင်များ သည် အရောင်းပိတ်ထားကာ အချို့ဆီဆိုင်များတွင် 92 ဓာတ်ဆီ တစ်မျိုးတည်းသာ ရရှိတော့သည်။
“Denko ဆိုင်တချို့ ဆီပြတ်သွားလို့ ပိတ်ထားတယ်။ပြီး တော့ Htoo မှာဆိုလည်း ၉၂ တစ်မျိုးတည်းပဲရတော့တယ်”ဟု တက္ကစီယာဥ်မောင်းတဦးကပြောသည်။
နိုင်ငံ ခြားရင်းနှီးမြှုပ်နှံမှုများ ထွက်ခွာသွားခြင်း၊ကုန်သွယ်ရေး ကျဆင်းခြင်း ၊ နိုင်ငံတစ်ဝန်း စစ်ရေးအ ရှိန် မြင့်မားလာခြင်း ၊ ကျပ်ငွေ စက္ကူသစ် ဘီလီယံသောင်းနှင့်ချီ ရိုက်ထုတ်ပြီး ကျပ်ငွေအပေါ် ပြည်သူများ၏ ယုံကြည်မှု ကျဆင်းနေသောကြောင့် ကျပ်ငွေဖောင်ပွမှုများ အဆမတန်မြင့်တက် လာခြင်းဟု စီးပွားရေးလုပ်ငန်းရှင်များက ပြောသည်။
စစ်ကောင်စီကမူ စီးပွားရေးလုပ်ငန်းရှင်များ စျေးကစားမှုကြောင့်ဟု ဆိုကာ ဖမ်းဆီးမှုများ ဆက်တိုက်လုပ်ခဲ့သော်လည်း ကျပ်ငွေတန်ဖိုးကျဆင်းမှုမှာ အခြေအနေ ပို၍ ဆိုးလာနေခြင်းဖုစ်သည်။
စက်သုံးဆီဈေးတက်ပြီး ရှားပါးမှုမှာ ကုန်ထုတ်လုပ်ငန်းများ ၊သယ်ယူပို့ဆောင်ရေးလုပ်ငန်းများအပေါ် ကြီးမားစွာရိုက်ခတ်ပြီး ကုန်ဈေးနှုန်းများအပေါ် သက်ရောက်လာမည်ဖြစ်ကြောင်း လုပ်ငန်းရှင်အချို့ကပြောသည်။
