သြဂုတ်-၁၄ ၊၂၀၂၅။ဆိုင်းမင်း၊မေရီ/People’s Spring
စစ်ကိုင်းငလျင်ကြီးဒဏ်ကြောင့်လူရာဂဏန်းသေဆုံးခဲ့ရတဲ့ မန္တလေးမြို့ Sky Villa ကွန်ဒိုပြိုကျမှု ဖြစ်စဉ်မှာ ငလျင်အပြီးလေးလခွဲကျော်လာတဲ့တိုင်ရုပ်အလောင်းအချို့ကို ရှာတွေ့နေဆဲပါ။
မနေ့ သြဂုတ် ၁၃ ရက်နဲ့ ဒီနေ့ ၁၄ ရက်တို့မှာ ဆိုရင်နှစ်ရက်အတွင်း ရုပ်အလောင်း ငါးလောင်းကို ရှာတွေ့ခဲ့တယ်လို့ မီးသတ်ထံကသိရပါတယ်။
မနေ့က မနက်ပိုင်း ၁၀ နာရီခွဲခန့်ကကွန်ဒို A အဆောင်ကိုရှင်းလင်းရာမှာအမျိုးသားရုပ်အလောင်းတစ်လောင်းတွေ့ခဲ့ရပါတယ်။
Public Service Announcement
ဒီနေ့မှာညနေပိုင်းမှာလည်းAအဆောင်ကနေအမျိုးသားတစ်လောင်းနဲ့အမျိုးသမီးသုံးလောင်း ရုပ်အလောင်း လေးလောင်း ထပ်မံတွေ့ရှိရတာလို့ မီးသတ်က ထုတ်ပြန်ပါတယ်။
“တခုလုံးအပိခံရတာဆိုတော့ အောက်ထိဖော်လေတွေ့လေပဲ။မိသားစုလိုက်ပိတဲ့သူတွေ၊သီးသန့်နေတဲ့သူတွေဆို ဘယ်သူမှသိကြမှာမဟုတ်ဘူး”လို့ ဒေသခံတဦးက မှတ်ချက်ပြုပါတယ်။
ငလျင်ကြီးလှုပ်ခတ်ပြီးတာ လေးလခွဲကျော် ကြာမြင့်ခဲ့ပြီဖြစ်ပေမယ့် Sky Villa မှာ ရုပ်အလောင်းထုတ်ယူမှုမပြီးပြတ်သေးတာကိုမြို့ခံတွေကဝေဖန်နေကြပါတယ်။
မှတ်တမ်းတွေအရတော့ ငလျင်အပြီး လေးလကျော် ဒီနေ့ အထိ Sky Villa ကွန်ဒိုကနေ ရုပ်အလောင်း ၂၀၁ လောင်းထိ တွေ့ရှိထားပြီး ဖြစ်တယ်လို့သိရပါတယ်။
အဲဒီရုပ်အလောင်းတွေမှာ အမျိုးသား ၆၉ လောင်း ၊ အမျိုးသမီးရုပ်အလောင်း ၁၁၀ ၊ ကလေး ၁၃ လောင်း နဲ့ ကျား၊ မ မခွဲခြားနိုင်တော့တဲ့ ရုပ်အလောင်း၉ လောင်းတို့ ဖြစ်ပါတယ်။
ငလျင်မလှုပ်ခတ်ခင် မတ်လ ၂၇ ရက်အထိ Sky Villa ကွန်ဒိုမှာနေထိုင်သူဦးရေ ၃၄၈ ဦးရှိတယ်ဆိုတာကို မန္တလေးတိုင်းထွေအုပ်ရဲ့ စာရင်းတွေအရ သိရတယ်လို့ ကယ်ဆယ်ရေးအဖွဲ့ဝင်အချို့ ထံက တဆင့် သိရပါတယ်။
ငလျင်အပြီး ပြိုကျသွားတဲ့ကွန်ဒိုအပျက်အစီးတွေထဲမှာပိတ်မိနေသူတွေကို ရှာဖွေကယ်ဆယ်ရေးလုပ်ခဲ့ရာမှာတော့ အသက်ရှင်လျက် ၅၂ ဦးကယ်ဆယ်နိုင်ခဲ့တယ်လို့ မီးသတ်က ဆိုထားပါတယ်။
မန္တလေးမြို့ လမ်း ၆၀ ၊၂၃ လမ်း နဲ့ ၂၄ လမ်းကြားမှာရှိတဲ့ Sky Villa ကွန်ဒိုကို ၁၁ ထပ်စီ ရှိတဲ့ အဆောက်အဦး လေးလုံး နဲ့ဖွဲ့စည်းထားပြီး ငလျင်လှုပ်ခတ်ချိန် အဆောက်အဦး သုံးလုံးပြိုကျ သွားခဲ့တာပါ။
