သြဂုတ်-၂၉၊ ၂၀၂၅။ဇော်ဝင်း /People’s Spring
တနင်္သာရီတိုင်း၊ ရေဖြူမြို့နယ်တွင် စစ်ကြောင်းထိုးနေသည့် စစ်ကောင်စီတပ်တိုက်ခိုက်ခံရ၍ထိခိုက်သေဆုံးသူများနေကြောင်း ဒေါနစစ်ကြောင်း -၂ YGFက ယနေ့(ဩဂုတ် ၂၉ရက်) ထုတ်ပြန်သည်။
သြဂုတ် ၁၉ရက်မှ၂၅ရက်အထိ ကော့လှိုင် ကျေးရွာအနီး တိုက်ပွဲများဖြစ်ပွားခဲ့ပြီး စစ် ကောင်စီတပ် အရာရှိနှင့် တပ်သား ၃၀ထက်မနည်း ထိခိုက်သေဆုံးမှုများရှိခဲ့သည်ဟု YGF ကဆိုသည်။
ယခု စစ်ကောင်စီတပ် စစ်ကြောင်းတွင် ခမရ (၄၀၉)၊ခမရ (၄၀၈)၊ခမရ (၄၁၀)၊ခလရ (၂၈၂)တပ်ရင်းနှင့် ခလရ(၂၇၃)တပ်ရင်းစသည့် တပ်ရင်း ငါးခုပေါင်း၍ စစ်ကြောင်းထိုးနေသည်ဟု ဖော်ပြသည်။
Public Service Announcement
“အမှတ်၈ ပြည်ထောင်စုလမ်း(မော်လမြိုင်-ရေး-ထားဝယ်)ကို ဒီ သုံးလအတွင်း သူတို့အပြီးထိန်းချုပ်ဖို့အစီစဥ်ရှိတယ်”ဟု စစ်ကြောင်းထိုးလာသည့် စစ်ကောင်စီ၏ ရည်ရွယ်ချက်ကို နည်းဗျူဟာ (၃၃)အထူးစစ်ဆင်ရေးမှူး စောဒါးကို က ပြောသည်။
ဩဂုတ် ၁၉ ရက်တိုက်ပွဲတွင် ခလရ (၂၈၂)တပ် ရင်းမှ လက်နက်ကြီးပစ်ကူပေးပြီးအင်အား ၁၅၀ ဖြင့်စစ်ကြောင်းထိုးလာသည့် စစ်ကောင်စီစစ်တပ် ကြောင်းကို ကော့လှိုင်နှင့် မရမ်းချောင်းကျေးရွာ ကြားတွင် တိုက်ခိုက်ခဲ့ကြောင်း အသိပေးသည်။
၂နာရီခန့်ကြာထိုတိုက်ပွဲတွင် စစ်ကောင်စီ တပ်သား ၂၀ ခန့်သေဆုံးပြီး ဒဏ်ရာရသူများကို ခမရ (၄၀၈)တပ်ရင်း သယ်ဆောင်သွားသည်ဟု ဆိုသည်။
သြဂုတ် ၂၀ ရက်တွင် စစ်ကောင်စီကအင်အားထပ်ဖြည့်ပြီး မရမ်းချောင်းကျေးရွာအတွင်း ထပ်မံဝင် ရောက်ခဲ့ပြီး ဒေသခံပြည်သူများအား လူသားဒိုင်းလုပ်ကာ ကျေးရွာသို့ထွက်လာစဥ် ထိတွေ့မှု ဖြစ်ခဲ့ကြောင်း သိရသည်။
မရမ်းချောင်းကျေးရွာ ဘုန်းကြီးကျောင်းအနီးနှင့် မရမ်းချောင်း -မိုင် ၆၀ ကျေးရွာကြားတွင် သြဂုတ် ၂၂ ရက်မှ ၂၅ ရက်အထိ တိုက်ပွဲများဖြစ်ပွားခဲ့ကြောင်း ဖော်ပြသည်။
စစ်ကောင်စီစစ်ကြောင်းထိုးရာ ကျေးရွာများရှိ ပြည်သူပိုင်ပစ္စည်းများဖောက်ထွင်းခိုးယူခံခဲ့ရသည့်အပြင် မိုင် ၆၀ ကျေးရွာမှ အသက်(၈၀) အရွယ် အဖိုး၊အဖွားနှစ်ဦး သေနတ်ဖြင့်ပစ်သတ်ခံခဲ့ရကြောင်း YGFက ပြောသည်။
ထို့အပြင် သေဆုံးသူရုပ်အလောင်းများသွားသယ်သည့် ရွာသား ၁၀ ဦးခန့်ကိုလည်း စစ် ကောင်စီတပ်က ဖမ်းဆီးထားကြောင်း အသိပေးသည်။
ထိုသို့ကျူးလွန်မှုများကိုခမရ(၄၀၉)တပ်ရင်းမှ ဗိုလ်မှူးစိုးမိုးကျော်၊ဒုတပ်ရင်းမှူး ဗိုလ်ကြီးဝင်းမင်းစိုး၊ဗိုလ်ကြီး အံ့ဘုန်းကျော်၊ခလရ (၂၈၂)တပ်ရင်းမှ ဗိုလ်ကျော်မိုးခိုင်တို့ လုပ်ဆောင်ခဲ့ကြောင်း ထုတ်ပြန်ချက်၌ ပါရှိသည်။
စစ်ကောင်စီထိုးစစ်ကို YGF ၊ဒေါနစစ်ကြောင်း ၃ KBDF၊မွန်ပြည်တော်လှန်ရေးတပ် MSRF၊KNLA တပ်မဟာ ၆ တပ်ရင်း ၂၇၊ရေးသိန်းငှက်တပ်ဖွဲ့၊ABSDF တပ်ရင်း ၁၊ရာမညမွန်တပ်တော်၊ရေးဘီလူး တပ်ရင်း၊နည်းဗျူဟာ ၃၃ အထူးစစ်ဆင်ရေး အဖွဲ့နှင့် ကြယ်လင်းရောင်(ဆာကပေါ)တပ်ရင်းတို့ ပူးပေါင်း တိုက်ခိုက်နေကြောင်း သိရသည်။
စစ်ကောင်စီသည် မြန်မာ-ထိုင်းနယ်စပ် နတ်အိမ်တောင် စခန်းကို စစ်အင်အားဖြည့်တင်းနိုင်ရန် ကြိုးပမ်းမှုကြောင့် ဩဂုတ်လဆန်းကစ၍ ရေဖြူမြို့နယ်တွင် တိုက်ပွဲများ ဆက်တိုက်ဖြစ် နေသည်။
