စက်တင်ဘာ−၁၊၂၀၂၅။ ထားမြတ်/People’s Spring
ကရင်အမျိုးသားအစည်းအရုံး(KNU) မြိတ်-ထားဝယ်ခရိုင် တပ်မဟာ(၄) နယ်မြေသို့ အာဏာသိမ်းစစ်ကောင်စီတပ်က ထိုးစစ်ဆင်နေမှုများ လတ်တလောပြန်ငြိမ်နေကြောင်း ကရင်အမျိုးသားလွတ်မြောက်ရေးတပ်မတော်(KNLA) သတင်းရင်းမြစ်က ပြောသည်။
စစ်ကောင်စီတပ် သည် တနင်္သာရီတိုင်း မောတောင်လမ်းပိုင်း၊ ထားဝယ်-မေတ္တာလမ်း၊ ရေဖြူမြို့နယ် ကလိန်အောင်-နတ်အိမ်တောင် နယ်စပ်စခန်းသို့ စစ်ကောင်စီက စစ်အင်အားဖြည့်တင်းရန် စစ်ကြောင်းထိုး လှုပ်ရှားမှုများရှိခဲ့ရာ KNLAနှင့် မဟာမိတ်တပ်များ၏ တိုက်ခိုက်မှုကြောင့် ဩဂုတ်လအတွင်း တိုက်ပွဲများ ပြင်းထန်ခဲ့သည်။
“စကစတို့ ဆက်ပြီး ထိုးဖောက်မရဘူး။ ကလိန်အောင်ဘက်ရော မေတ္တာဘက်ရော မောတောင်ဘက်ရော သူတို့ ငြိမ်နေတယ်။ ဆက်ထိုးရင်တော့ တိုက်ပွဲဖြစ်မှာ သေချာတယ်။” ဟု KNLA သတင်းရင်းမြစ်က ပြောသည်။
Public Service Announcement
စစ်ကောင်စီတပ်သည် တနင်္သာရီ – မောတောင်လမ်းပိုင်း ထိန်းချုပ်နိုင်ရေး ထိုးစစ်ဆင်နေသည်မှာ တနှစ်နီးပါးရှိပြီဖြစ်သော်လည်း သိန်ခွန်းရွာမှ ရှေ့မဆက်နိုင်ဘဲ ဖြစ်နေသည်ဟု KNLA သတင်းရင်းမြစ်က ပြောသည်။
“သူတို့က မောတောင်ဘက်မှာတော့ တော်တော်များများ ဒရုန်း အသုံးပြုလာတာတွေ့တယ်”ဟု ၎င်းက ပြောသည်။
အလားတူ ထားဝယ်-မေတ္တာ-ထီးခီးသို့ ဦးတည်တက်လာသည့် စစ်ကောင်စီတပ်ယာဉ်တန်းကိုလည်း KNLA ပူးပေါင်းတပ်က ကြားဖြတ်တိုက်ခိုက်ခဲ့ရာ အထိနာခဲ့ပြီး ယာဉ်ပျက်စီးမှုလက်နက်ခဲယမ်း ဆုံးရှုံးမှုများ ရှိခဲ့သည်။
” သူတို့က ဒီနယ်စပ် ပြန်စိုးမိုးဖို့အတွက် အင်အားဖြည့်တာ လုပ်မှာတော့ သေချာတယ်။ ဒါပေမဲ့သူတို့ဘယ်လောက်အထိ အတိုင်းအတာ လုပ်နိုင်မလဲဆိုတာ စောင့်ကြည့်ရမှာပေါ့” ဟု KNLA တပ်မဟာ(၄) သတင်းရင်းမြစ်က ပြောသည်။
စစ်ကောင်စီတပ်ဘက်က စစ်ကြောင်းထိုး လှုပ်ရှားပါက တော်လှန်ရေးပူးပေါင်းတပ်ကလည်း ပြန်ခုခံရန် အသင့်ရှိသည်ဟု ပြောသည်။
“၂၈ရက်နေ့မှာ ကျနော်တို့ KNU/KNLAကို မတရားအသင်းအဖြစ်ကြေညာလိုက်တဲ့နောက်ပိုင်းကိုတော့ သူတို့ ဘယ်လို စစ်ရေးပြန်လည်ဖောဆောင်မလဲ ကျနော်တို့လည်းစောင့်ကြည့်မှာပေါ့” ဟု KNLA တပ်မဟာ(၄) သတင်းရင်းမြစ်က ပြောသည်။
စစ်ကောင်စီသည် KNUကို အကြမ်းဖက်အုပ်စုအဖြစ်လည်းကောင်း၊ မတရားအသင်းအဖြစ်လည်းကောင်း ကြေညာခဲ့ရာ ပြည်သူကို သတ်ဖြတ်နှိပ်စက်နေသည့် စစ်ကောင်စီ၏လုပ်ရပ်သည် သူခိုးမှ လူပြန်ဟစ်ခြင်းဖြစ်ပြီး ဂရုစိုက်ရန်မလိုကြောင်း KNU ပြောရေးဆိုခွင့်ရှိသူ ပဒိုစောတောနီးက ပြောကြားထားသည်။
