သြဂုတ်-၂၃၊၂၀၂၅။ဇော်ရမ်းသံဃာတော်သုံးပါး/People’s Spring
TNLA ထိန်းချုပ်ဒေသဖြစ်သောမိုင်းငေါ့မြို့နယ်ခွဲမှ ဘုန်းကြီးကျောင်းကိုစစ်ကောင်စီက ယနေ့ညနေတွင် ဂျက်ဖိုက်တာဖြင့် ဗုံးကြဲရာ ကလေးငယ် ၁ဦးသေဆုံးပြီး သံဃာတော်သုံးပါးအပါအဝင် ၇ဦးဒဏ်ရာရရှိခဲ့သည်။
မိုင်းငေါ့မြို့နယ်ခွဲ၊ကွန်စလမ်းကျေးရွာဘုန်းကြီးကျောင်းကိုသြဂုတ်၂၃ ရက်ညနေ ၃ နာရီ ၄၀ မိနစ်အချိန်၌ စစ်ကောင်စီတပ်မှ ဂျက်ဖိုက်တာဖြင့် ပေါင်(၂၅၀)ဗုံး (၂)လုံးကြဲချခဲ့သဖြင့်ကလေးငယ် (၁)ဦးသေဆုံးခဲ့ပြီး သံဃာတော် (၂)ပါး ၊သံမဏေ (၁)ပါး၊ အမျိုးသမီး (၂)ဦးနှင့် အမျိုးသား (၂)ဦးဒဏ်ရာရရှိခဲ့သည်ဟု TNLA ကသတင်းထုတ်ပြန်သည်။
ထိုအပြင်ဘုန်းကြီးကျောင်းအတွင်းရှိဘုရားခန်း (၁)ခန်း၊ ဆွမ်းစားဆောင် (၁)ဆောင်၊ ဇရပ် (၂)ခု၊ ကျေးရွာဆေးပေးခန်း (၁)ခန်းနှင့် နေအိမ် (၁၂)အိမ်တို့လည်း ဗုံးစထိမှန်ပျက်စီးသွားခဲ့သည်ဟု ဆိုသည်။
Public Service Announcement
မိုင်းငေါ့မြို့နယ်ခွဲသည်ကျောက်မဲမြို့နယ်တွင်ပါဝင်သည်။လက်ရှိတွင်စစ်ကောင်စီသည် ကျောက်မဲမြို့ကိုဦးတည်၍ စစ်ကြောင်းထိုးရန်ကြိုးစားနေပြီး နောင်ပိန်ရွာ၌တိုက်ပွဲအပြင်းအထန်ဖြစ်ပွားနေသည်။ နောင်ပိန်ရွာကိုလည်း သြဂုတ်လ၁၉ရက်နေ့မှစတင်၍ စစ်ကောင်စီက မြေပြင်စစ်ကြောင်းထိုးပြီး လေကြောင်းမှဗုံးကြဲ၍ အရပ်သားထိခိုက်သေဆုံးမှုများရှိနေသည်။
မိုင်းငေါ့မြို့နယ်ခွဲကိုဇူလိုင်လ ၁၅ရက်နေ့လယ်ပိုင်းတွင်လည်း စစ်ကောင်စီကဂျက်ဖိုက်တာဖြင့် ဗုံးကြဲတိုက်ခိုက်ခဲ့သည်။ဒေသခံပြည်သူများလေကြောင်းအန္တရာယ်သတိပြုရန်နှင့်စစ်ရေးသတိရှိကြရန် TNLA က သတိပေးထားသည်။
