စက်တင်ဘာ-၁၈၊၂၀၂၅။လူအေး/People’s Spring
ကနီမြို့နယ်၊ချောင်းမကျေးရွာမှဆုတ်ခွာထွက်ပြေးသွားသော စစ်သားများကို တော်လှန်ရေးတပ်များက ကြားဖြတ်တိုက်ခိုက်ရာ ၃ ဦးဖမ်းမိပြီး သေနတ်၃လက်နှင့်ကျည်ဆံများ သိမ်းဆည်းနိုင်ခဲ့ကြောင်းဒေသခံတော်လှန်ရေးတပ်ပေါင်းစု -ULF က သတင်းထုတ်ပြန်သည်။
စစ်သုံ့ပန်းများထပ်မံဖမ်းမိသည်သတင်းကို ULF စစ်ကြောင်းစက်တင်ဘာလ၁၈ရက်ညနေ၌ မှတ်တမ်းဓာတ်ပုံများနှင့်အတူ ထုတ်ပြန်ခြင်းဖြစ်သည်။
စက်တင်ဘာ ၁၆ ရက်တွင်တိုက်ခိုက်ခဲ့ခြင်းဖြစ်ကြောင်းဒေသခံအချို့ကပြောသည်။
Public Service Announcement
“ ချောင်းမကိုဝင်လာတုန်းကအင်အားတော်တော်များတယ်။တိုက်ပွဲမှာသေတာတွေလည်းများတယ်။ထွက်ပြေးနေတဲ့သူတွေလည်းရှိလို့လိုက်ရှင်းနေတာ။ ကျနော်တို့ထပ်ကြားရသလောက် ချောင်းမကိုပြန်ပြီးစစ်ကြောင်းထိုးမယ်လို့လည်းသိထားတယ်” ဟု ကာကွယ်ရေးရဲဘော်တစ်ဦးကပြောသည်။
စစ်ကောင်စီစစ်ကြောင်းများသည် မုံရွာ၊ယာကြီး၊ ကလေးဝလမ်းအတိုင်း စက်တင်ဘာလဆန်းမှစတင်၍ ကနီမြို့နယ်သို့ဝင်ရောက်လာပြီး ချောင်းမရွာအပါအဝင် ရွာအချို့မှနေအိမ်များကိုမီးရှို့နေ၍ တော်လှန်ရေးပူးပေါင်းတပ်များက တိုက်ခိုက်ခဲ့ကြသည်။ စက်တင်ဘာလ ၁၁ရက်က တိုက်ပွဲတွင် စစ်ကောင်စီဘက်၌ထိခိုက်သေဆုံးမှုအလွန်များပြားခဲ့ပြီး စစ်ကြောင်းများပြန်လည်ဆုတ်ခွာထွက်ပြေးခဲ့ကြသည်။သို့သော်အဆိုပါတိုက်ပွဲ၌ အမှတ်(၁)စစ်ဒေသ၊ ယင်းမာပင်ခရိုင်၊ ယင်းမာပင်မြို့နယ် ပကဖ ULF စစ်ကြောင်းမှ စစ်ကြောင်းမှူး ရဲဘော်နိုင်မင်းနှင့် ရဲဘော်အချို့ ထိခိုက်ကျဆုံးခဲ့သည်။
ချောင်းမရွာမှ ထွက်ပြေးသွားသော စစ်တပ်စစ်ကြောင်ယသည် ယင်းမာပင်မြို့နယ်၊ တရော်ချင်းရွာကို ခြေကုပ်ယူထားပြီး ကနီ-ယင်းမာပင်မြို့နယ်စပ်ကွေ့ချောင်းရွာ၌ လက်နက်ကြီးတပ်ဆင်နေကြောင်း သတင်းရရှိသည်။
တိုက်ပွဲအပြင်းအထန်ဖြစ်ပွားခဲ့သည့်ချောင်းမရွာတွင်း၌ မြေမြုပ်မိုင်းများရှိနေနိုင်၍ ဒေသခံများပြန်လည်ဝင်ရောက်နေထိုင်ခြင်းမပြုကြရန်လည်ယ ကာကွယ်ရေးတပ်များကသတိပေးထားသည်။
စစ်ကောင်စီတပ်သည်စက်တင်ဘာလ ၁၆ရက်ကလည်း ချောင်းမရွာကို စစ်ကောင်စီကပါရာမော်တာဖြင့် ဗုံးကြဲခဲ့သည်။သို့သော် ထိခိုက်မှုမရှိခဲ့ပေ။
