Menyuda nələr var?
Parlamentin rəhbərliyi seyfinin açarlarınl itirməyiblər görəsən? Xəbərləri olsun ki, sosial şəbəkələrdə MM-dəki vəzifələrin qiymət siyahısı yayılıb. Xüsusi səliqə və sıra qaydası ilə yazılmış bu qiymət menyusunu xalq dunəndən müzakirə edir. Sosial şəbəkələrə niyə ötürülüb? Əslində, məsələnin bu tərəfi də maraqlıdır, amma bu maraq siyahının özü ilə müqayisədə tamamilə kölgədə qalır. Deputat mandatının 1-2 milyon manat arasında dəyişdiyini boz kardinalın sevimli kadrı Gülər Əhmədovadan eşitmişdik. Parlamentdəki digər vəzifələrin qara bazar qiymətləri də indi ortaya çıxdı. Maraqlı siyahıdır.
Qiymətlər 250 min AZN-lə 50 min AZN arasında dəyişir. Daya yüksək vəzifələrin qiyməti daha yüksək, bir az aşağı pillədəkilərinki nisbətən ucuzdur. Məsələn, İqtisadi qanunvericilik şöbəsinin sektor müdiri 200 min AZN, baş məsləhətçi 100 min AZN, məsləhətçi 70 min AZN-dir. İnzibati və hərbi qanunvericilik, Sosial qanunvericilik, beynəlxalq münasibətlər şöbələrinin qiymətləri də təxminən eynidir. Bundan daha bahalı şöbələr də var. Məsələn, Dövlət qulluğu və kadr məsələləri şöbəsinin sektor müdiri, o cümlədən Vətəndaşların qəbulu və müraciətlərlə iş şöbəsinin sektor müdiri vəzifələri 250 min AZN-dir. Başqa şöbələrin vəzifə qiymətləri də təxminən bir-birinə yaxındır. Yəqin bayramqabağı endirimləri, tanışlığa görə altdan ucuz qiymətləri, yerinə uyğun güzəştləri də olmamış deyil.
Ağlamalıdır, amma gülürük. Onsuz da gülünc günə qalmışıq. Daha bu hakimiyyətin əxlaq kitabında alınıb-satılmayan heç nə qalmayıb. Dinləri, imanları puldan ibarət olan bu adamlar hər şeyi qiymət siyahısına salıb ölkənin axırına çıxdılar. Bir mandata görə mənliyini, ləyaqətini, vicdanını satan minlərlə adam yetişdirdilər bu 26 ildə. Vəzifəyə, imtiyaza, var-dövlətə görə prinsiplərini ayaqlar altına atan neçə-neçə buqələmunlar çıxardılar meydana. Bütün müqəddəs dəyərləri məhv edib qara bazara çevirdilər ölkəni. Bu ölkə qızmış barıt çəlləyinə bənzəyir, bir qığılcıma bənddir. Heç bir islahat imitasiyası keçməyəcək bu dəfə. Dəyişikliklər qaçılmazdır. Bu biyabırçılıqı, bu parlamenti, bu deputatları tarixin arxivinə göndərməyin zamandır.