Yaxud, Cəbhəçilərin 10 G sürəti
İlham Hüseyn
Heç kimə sirr deyil ki, uzun illərdi YAP hakimiyyəti Əli Kərimliylə düşmənçilik edir. Amma bu düşmənçilyi köhnə kişilər kimi yox, təzə uşaqlar kimi aparırlar. Bəli, siyasi əlbəyaxa döyüş gedir. Əli Kərimlidən fərqli olaraq, rejimin əlində bıçaq, silah, taxta, zəncir var. Amma bu qədər üstünlüyə baxmayaraq, rejim bütün raundları uduzur. Sadəcə olaraq, məğlubiyyəti qəbul etmir, qalibə “qırmızı kart” göstərməklə, cığallıq edir. Məsələ bundadır ki, “qırmızı kart” da rejimə rahatlıq vermir.
Kərimlinin prinsipiallığı, mübarizə əzmi, intellekti, artan nüfuzu rejimin mütləq qələbəsinə imkan vermir. Yəni, rejim köləlik bayrağın zirvəyə sanca bilmir.
Beləliklə, “ağıllı komanda” bu qərara gəlib ki, rəqibi təcrid etmək lazımdı. Və bu təcridi interneti kəsməklə reallaşdırıblar.
Əslində, nə baş verdi? Hakimiyyət Əli Kərimlinin qələbəsini rəsmiləşdirdi. Etiraf etdilər ki, Kərimliyə əli-qolu bağlı da qalib gəlmək mümkün deyil. Ona görə də interneti kəsməklə “stola bərkitmək” effekti almaq istəyirlər.
Amma yenə də yanıldılar. Əvvəla, Əli Kərimlinin gücü internetdə deyil. Elə olsaydı, internetsiz dönəmlərdə repressiyalar, şər-böhtanlar, aşırı düşmənçilik müşahidə olunmazdı. Yəni, Əli Kərimli virtual dünyaya girişi, real dünyadan edib. Real aləmdəki sınaqlardan keçərək, virtuala qədəm qoyub.
İkincisi, Əli Kərimlinin təcridi AXCP-də heç nəyi dəyişməyəcək. Çünki cəbhəçilər “mübarizə gəmisi” ni düzəltməyi öyrəniblər. Təcridə qədər Kərimli suya qərq olmamağın yolun göstərib. Əgər komandada cəsarət, inam, iradə silahı varsa, komandirin girov götürülməsi geriyə addımı labüd etmir. Əksinə, irəli getməyə mənəvi tələbat yaradır.
Üçüncüsü, Əli Kərimli internetin mübarizəsin yox, mübarizənin internetin yaradıb. Yəni, cəbhəçilərin mübarizə əzmi 10 G-di, sürətlidi, Markın tabeliyində deyil. Xalqın narazılığı, nifrəti virtualdan reallığa keçid edib. Kərimlinin xalqa çatdırdığı həqiqətlər, yutubun əhatəsindən çıxıb.
Kərimli internetsiz 4 gündə daha çox reklam olundu. Cəbhəçilər onun müxtəlif vaxtlardakı çıxışların təkrar-təkrar, həm də bütün platformalarda yayırlar. Son 4 gündə Əli Kərimlinin dedikləri daha çox adama çatdı. “Hər şərdə, bir xeyir var” deyimi, həqiqətdir. Əli Kərimli virtual olaraq istirahətdədi, real olaraq isə təbliğatı gedir, çıxışları yayılır.
Bir sözlə, bütün addımlar kimi “təcridetmə əməliyyatı” da gecikmiş əməliyyatdı. Nə cəbhədəki nizama, nə komandanın prinsipiallığına, nə də aktiv mübarizəyə təsir etməyəcək. Əksinə, Kərimlinin interneti bir fakt idisə, internetsizliyi başqa bir faktdı. Zamanla hər şey daha aydın görünəcək.