မန္တလေးမြို့လယ်ဖြစ်တဲ့ ချမ်းအေးသာစံမြို့နယ်အတွင်းကနေအိမ်တစ်အိမ်မှာ အမျိုးသမီး နှစ်ဦး မနေ့က မေလ ၂၀ ရက်ညပိုင်းကသတ်ဖြတ်ခံလိုက်ရပါတယ်။
သတ်ဖြတ်ပြီးနောက်အလောင်းမှာသွေးသောက်အဖွဲ့ရဲ့ အမှတ်အသားတံဆိပ်ကို ထားရှိသွားတယ်လို့သိရပါတယ်။ သတ်ခံရသူအမျိုးသမီး နှစ်ဦးဟာ သားအမိတွေတော်စပ်ကြပါတယ်။
စစ်အုပ်စုသတင်းတွေကို ဝါဒဖြန့်နေတဲ့ ဖေ့ဘွတ်လူမှုကွန်ရက်အကောင့်တွေမှာ သတ်ခံရတဲ့သားအမိတွေဟာ မြိုင် PDF အဖွဲ့က ရဲဘော်တစ်ဦးရဲ့ မအေနဲ့အမ ဖြစ်တယ်လို့ သတင်းဖြန့်နေတာတွေ့ရပါတယ်။
ဒါအပြင် သတ်ခံရသူ အမျိုးသမီးကြီးဟာ မြိုင် PDF ထောက်ပံ့မှုတွေလုပ်နေသူလို့ သတင်းဖြန့်ပါသေးတယ်။
သွေးသောက်ဆိုတဲ့အဖွဲ့ဟာ ပြီးခဲ့တဲ့ ဧပြီလအတွင်း မန္တလေးမှာ လူသတ်မှုတွေနဲ့စတင်ပေါ်ထွက်လာခဲ့တာပါ။ မန္တလေးမှာ သွေးသောက်အဖွဲ့ လက်ချက်နဲ့သတ်ဖြတ်ခံရသူ ၈ ဦးထက်မနည်းရှိခဲ့ပါတယ်။ သတ်ဖြတ်ခံရသူတွေဟာ NLD ပါတီဝင်တွေ ၊ ပါတီကိုဝန်းရံသူတွေဖြစ်ကြပါတယ်။
စစ်ကောင်စီကတော့ သွေးသောက်အဖွဲ့ဟာ သူတို့နဲ့သက်ဆိုင်ခြင်းမရှိဘူးလို့ငြင်းဆိုထားပါတယ်။
ဒါပေမယ့် သွေးသောက်အဖွဲ့လက်ချက်နဲ့သေဆုံးသူတွေကို လာရောက်ဖမ်းဆီးချိန်နဲ့အလောင်းစွန့်ပစ်ချိန်တွေမှာ စစ်ကောင်စီလက်အောက်ခံလုံခြုံရေးအဖွဲ့တွေရဲ့ကားတွေကိုအသုံးပြုတာတွေရှိခဲ့တယ်ဆိုတာ မျက်မြင်တွေရဲ့ပြောဆိုချက်ကို ကိုးကားပြီး NLD က ကြေညာချက်ထုတ်ပြန်ထားဖူးပါတယ်။
မြေပြင်မှာလည်း သွေးသောက်အဖွဲ့က သတ်ဖြတ်မှုတွေ လုပ်နေပေမယ့် စစ်ကောင်စီက ဖမ်းမိတဲ့သတင်းထုတ်ပြန်တာမျိုး ထုတ်ပြန်တာမရှိသေးပါဘူး။
