ပဲခူးတိုင်း၊ နတ်တလင်းမြို့နယ် တိုက်ပွဲနှစ်ကြိမ်ဖြစ်ရာ စစ်ကောင်စီတပ်သား ၁၂ဦးသေဆုံးကြောင်း ပြည်သူ့ကာ ကွယ်ရေးတပ်ဖွဲ့ နတ်တလင်း (MRF-Nattalin)က ယနေ့(မေ ၂၁ ရက်)တွင် ထုတ်ပြန်သည်။
စစ်ကြောင်းထိုးလာသည့် စစ်ကောင်စီတပ်ကို တောင်ညိုမြို့သစ် ကွေ့ကြီးကျေးရွာနှင့် ညောင်လေးပင်ကျေးရွာကြားတွင် ယခုလ ၁၃ရက် နံနက် ၈နာရီတွင် ကနဦး ကြားဖြတ်တိုက်ခိုက်ခဲ့ပြီး စစ်ကောင်စီတပ်မှ ရှစ်ဦးသေဆုံးခဲ့သည်ဟု ဆိုသည်။
ထို့နောက် ယမန်နေ့(မေ ၂၀ ရက်) ညနေ ၃နာရီခွဲခန့်က ညောင်လေးပင်နှင့် ကွေ့ကြီးရွာကြားတွင် အင်အား ၁၃ ဦးပါ စစ်ကောင်စီအဖွဲ့ကို ပဒေသာမိုင်းဖြင့် တိုက်ခိုက်ခဲ့ရာ လေးဦးသေဆုံးပြီး နှစ်ဦးဒဏ်ရာရရှိကြောင်း ဖော်ပြ သည်။
စစ်ကောင်စီတပ်က လက်နက်ကြီးအသုံးပြု၍ ပြန်လည်ပစ်ခတ်ခဲ့သော်လည်းကာကွယ်ရေးတပ်ဖွဲ့ဝင်များ အထိ အခိုက်မရှိ ပြန်လည်ဆုတ်ခွာနိုင်ခဲ့သည်ဟု အသိပေးသည်။
စစ်ကောင်စီတပ်နှင့် ၎င်း၏ထောက်တိုင်များကို ဆက် လက်တိုက်ခိုက်သွားမည်ဟုလည်း MRF- Nattalinက ကြေညာသည်။
နတ်တလင်းမြို့နယ်အရှေ့ဘက် ပဲခူးရိုးမအတွင်း၌ အကြမ်းဖက်စစ်တပ်နှင့် ပြည်သူ့ကာကွယ်ရေးတပ်များ နေ့စဉ်နီးပါးဆိုသလို တိုက်ပွဲများဖြစ်ပွားနေကာ စစ်အုပ်စုမှာ သေဆုံးသူများပြားနေကာ အထိနာနေ၍ အနီးအနားရှိ ပြည်သူများအား PDFများကို လက်ခံကူညီထောက်ပံ့နေသည်ဟု စွပ်စွဲကာ ကျေးရွာ ၉ရွာကို မောင်းထုတ်ခြင်း နှင့် နေအိမ်များအား မီးရှို့ဖျက်ဆီးခြင်းတို့ ပြုလုပ်လျှက်ရှိကြောင်း ဒေသခံသတင်းရင်းမြစ်များက ထုတ်ပြန်ထားသည်။
