ရွှေကူမြို့နယ်တိုက်ပွဲ စစ်ကောင်စီခြေလျှင်စစ်ကြောင်း ထိခိုက်သေဆုံးမှုများဟုဆို

(၄၀)မမဗုံးသီးများ သိမ်းဆည်းရမိကြောင်း မြို့လှKPDF ထုတ်ပြန်

ကချင်ပြည်နယ် ရွှေကူမြို့နယ်အတွင်း အကြမ်းဖက်စစ်ကောင်စီ၏ ခြေလျှင်စစ်ကြောင်းအား မိုင်းဆွဲတိုက်ခိုက်ရာ ထိခိုက်သေဆုံးမှုများပြီး (၄၀) မမဗုံးသီးများ သိမ်းဆည်းရမိကြောင်း မြို့လှ KPDF က ထုတ်ပြန်သည်။

ယနေ့ (မေ ၂၂ ရက်) နံနက် ၈နာရီခွဲခန့်တွင် အင်အား ၄၀ခန့်ပါ စစ်ကောင်စီတပ်သည် ရွှေကူမြို့ နယ် သင်္ဘောအင်းရွာမှ မိုးစစ်ကျေးရွာဖက်သို့ ခြေလျှင်ဆုတ်ခွာလာစဥ် H-22 လက်လုပ်ရှေ့ထွက်မိုင်း ခြောက်လုံးဖြင့် စောင့်ကြိုမိုင်းဆွဲ တိုက်ခိုက်ခဲ့သည်ဟု ဆိုသည်။

တိုက်ခိုက်မှုတွင် စစ်ကောင်စီဘက်မှထိခိုက် ကျဆုံးမှုအများအပြားရှိခဲ့ကြောင်း ဖော်ပြသည်။

ထို့အပြင် တိုက်ပွဲဖြစ်ရာနေရာသို့ မြို့လှ KPDF အရံတပ်ဖွဲ့မှ နယ်မြေရှင်းလင်းရာ လက်ထောက်ကျည် (40 – mm) ၁၃လုံး သိမ်းဆည်းရမိခဲ့ သည်ဟု အသိပေးသည်။

လက်ရှိတွင် စစ်ကောင်စီတပ်မှ သေဆုံးသူနှင့် ဒဏ်ရာရသူများအား ပေါက်ကုန်းကျေးရွာဦးမှတစ်ဆင့် ရေကြောင်းမှ မော်တော်ဖြင့် ရွှေကူမြို့သို့ သယ်ဆောင်သွားခဲ့သည်ဟုလည်း သိရသည်။