စစ်ကိုင်းတိုင်း၊ ဒီပဲယင်းမြို့နယ်တွင် အကြမ်းဖက်စစ်တပ် ပစ်ခတ်သတ်ဖြတ်မှုကြောင့် ငါးရက်အတွင်း ဒေသခံပြည်သူ ခြောက်ဦးသေဆုံးပြီး ကျေးရွာ ၅ရွာမှ နေအိမ် ၁၅၀ကျော် မီးရှို့ဖျက်ဆီးခံခဲ့ရကြောင်း ဒေသခံများက ပြောသည်။
ပြီးခဲ့သည့် ဧပြီလကုန်ပိုင်းက ဒီပဲယင်းမြို့နယ်အတွင်းရှိ ကျေးရွာများအား မီးရှို့ဖျက်ဆီးခဲ့သော အကြမ်းဖက်စစ်တပ်သည် ယခုမေလ ၁၉ရက်မှစတင်ကာ စစ်ကြောင်းထိုးမီးရှို့မှုများ ပြုလုပ်ခဲ့သည်။
![](https://i0.wp.com/www.ludunwayoo.com/wp-content/uploads/2022/05/283824740_388163226706469_3055811633408885205_n.png?resize=720%2C538&ssl=1)
![](https://i0.wp.com/www.ludunwayoo.com/wp-content/uploads/2022/05/282849468_388163293373129_5800298716484095484_n.png?resize=720%2C538&ssl=1)
မေလ ၁၉ ရက်တွင် အကြမ်းဖက်စစ်တပ်က လက်နက်ကြီးဖြင့် ပစ်ခတ်ခဲ့သည့်အတွက် ပေါက်သာကျေးရွာမှ ပြည်သူ ငါးဦး၊ သရက်တောကျေးရွာမှ ပြည်သူ တစ်ဦး လက်နက်ကြီးထိမှန်ခဲ့ပြီး ငါး ဦးသေဆုံးခဲ့ကြောင်း၊ ခွင့်တောင်းကျေးရွာမှ ပြည်သူတစ်ဦးလည်း သတ်ဖြတ်ခံခဲ့ရကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။
![](https://i0.wp.com/www.ludunwayoo.com/wp-content/uploads/2022/01/PSA_inside_Story_Jan22-03.jpg?resize=880%2C229&ssl=1)
ထိုနေ့တွင်ပင် သရက်တောကျေးရွာရှိ နေအိမ် ၂၂လုံး၊ ခွင့်တောင်းကျေးရွာရှိ နေအိမ် ၃ လုံး၊ မေလ ၂၀ရက်တွင် ပင်စည်ကျေးရွာ ၃၉ လုံး၊၂၂ ရက်တွင် နဂါးတွင်းကျေးရွာ ၄၅ လုံး၊ ၂၃ ရက်တွင် အင်ပင်-ယဒင် ကျေးရွာနေအိမ် ၄၀ကျော် မီးရှို့ဖျက်ဆီးခံခဲ့ရသည်။
![](https://i0.wp.com/www.ludunwayoo.com/wp-content/uploads/2022/05/282328557_388163623373096_2887821447465066621_n.png?resize=720%2C538&ssl=1)
![](https://i0.wp.com/www.ludunwayoo.com/wp-content/uploads/2022/05/283173637_388163763373082_7076006510564607838_n.png?resize=720%2C538&ssl=1)
ထို့အပြင် ငါးရက်အတွင်းကျေးရွာ (၅)ရွာမှ ပြည်သူ့နေအိမ် ၁၅၀ကျော်မီးရှို့ဖျက်ဆီးခံခဲ့ရခြင်းဖြစ်ကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။
ဒီပဲယင်းမြို့နယ်တွင် ယခုနှစ် မတ်လ ၅ ရက်မှ ဧပြီလကုန်အထိ အိမ်ပေါင်း ၁၆၇ အိမ် မီးရှို့ဖျက်ဆီးခံထားရကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)