ပြည်ပနိုင်ငံများတွင် ရောက်ရှိ အလုပ်လုပ်ကိုင်နေသည့် မြန်မာနိုင်ငံသားများကို ပြည်ပ အလုပ် အကိုင်အသိအမှတ်ပြုကတ်(OERC)ထုတ်ပေးမည်ဖြစ်ကြောင်း NUG အလုပ်သမားရေးရာဝန်ကြီး ဌာနက ယနေ့ ထုတ်ပြန်ကြေညာသည်။
ပြည်ပရောက်မြန်မာအလုပ်သမားများ၏ အလုပ်အကိုင်ဆိုင်ရာ သတင်းအချက်အလက်များကို စစ်တမ်းကောက်ယူမည်ဖြစ်ပြီး ဖြည့်သွင်းထားသော အချက်အလက်များကို စိစစ်အတည်ပြု၍ OERC ထုတ်ပေးမည်ဟု ကြေညာချက်၌ ဖော်ပြသည်။
NUG အလုပ်သမားရေးရာဝန်ကြီးဌာနက ယင်းသို့လုပ်ဆောင်ခြင်းမှာ ပြည်ပနိုင်ငံများတွင် အမှန်တကယ်ရောက်ရှိလုပ်ကိုင်နေသူဦးရေကို ခန့်မှန်းသိရှိနိုင်ရန်၊ ပိုမိုကောင်းမွန်သည့် ပြည်ပအလုပ် အကိုင်ဆိုင်ရာ မူဝါဒများ ချမှတ်ရာတွင် အထောက်အကူဖြစ်စေရန်၊ ပြည်ပနိုင်ငံများတွင် ရောက်ရှိလုပ်ကိုင်နေသူများ ကြုံတွေ့နေရသည့် အခက်အခဲများကို လျင်မြန်ထိရောက်စွာ ချိတ်ဆက်ကူညီဆောင်ရွက်ပေးနိုင်ရန်အတွက်ဖြစ်ကြောင်း ဆိုသည်။
ထို့အပြင် နွေဦးတော်လှန်ရေးကြားကာလအတွင်း NUG ပြည်သူ့အစိုးရအား ထောက်ခံသည့် အင်အားတစ်ရပ်အနေဖြင့် ပါဝင်နိုင်ရန်နှင့် နွေဦးတော်လှန်ရေး ဘဏ္ဍာရန်ပုံငွေ ရရှိရန်၊ သက်ဆိုင်ရာ ပြည်ပနိုင်ငံရောက် အထောက်အထားမဲ့ မြန်မာအလုပ်သမားများအတွက် မည်သူမည်ဝါဖြစ်ကြောင်း သက်သေခံလက်မှတ် (C of I) ထုတ်ပေးရာတွင် အထောက်အထားတစ်ရပ်အနေဖြင့် အသုံးပြုနိုင်ရန်စသည်တို့အတွက်လည်း NUGက ရည်ရွယ်သည်။
အဆိုပါလုပ်ငန်းစဉ်ကို အွန်လိုင်းမှလုပ်ဆောင်မည်ဖြစ်ပြီး တာဝန်ယူကူညီဆောင်ရွက်ပေးမည့် အဖွဲ့အစည်း၊ ကိုယ်စားလှယ်ပုဂ္ဂိုလ် အမည်များနှင့် အသေးစိတ်အစီအစဉ်ကို နိုင်ငံအလိုက် သီးခြားစီ ထပ်မံထုတ်ပြန်ပေးမည်ဖြစ်ကြောင်း NUGက ထုတ်ပြန်သည်။
