စစ်တပ်အာဏာသိမ်းထားတဲ့ မြန်မာနိုင်ငံမှာ သေဒဏ်ချမှတ်ခံရတဲ့နှုန်းဟာ စိုးရိမ်ဖွယ်ရာမြင့်တက်လာပြီး သေဒဏ်ကို လက်နက်သဖွယ် စစ်အုပ်စုက အသုံးပြုလာနေတယ်လို့ နိုင်ငံတကာလွတ်ငြိမ်းချမ်းသာခွင့်အဖွဲ့ကြီး(Amnesty International) က ပြောလိုက်ပါတယ်။
ပြည်တွင်းမှာ အာဏာမသိမ်းခင် ၂၀၂၀ ခုနှစ်အတွင်း သေဒဏ်အမိန့်ချခံရသူဟာ ၁၀ ဦးအောက်ရှိရာကနေ အာဏာသိမ်းတဲ့တစ်နှစ်ထဲမှာတင်အယောက် ၈၀ ကျော်ထိ မြင့်တက်လာခဲ့တယ်လို့ Amnesty International ရဲ့ ၂၀၂၁ခုနှစ်အစီရင်ခံစာမှာဖော်ပြထားပါတယ်။
အဲဒီအစီရင်ခံစာအရ မြန်မာနိုင်ငံမှာ စစ်တပ်အာဏာသိမ်းတဲ့ ၂၀၂၁ ခုနှစ်အတွင်းသေဒဏ်ပေးခံရသူဦးရေဟာ ၈၆ ဦးကျော်ရှိခဲ့ပါတယ်။
လက်ရှိအချိန်ထိဆိုရင် နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP) ရဲ့စာရင်းအရ သေဒဏ်ပေးခံရသူ စုစုပေါင်း ၁၁၃ ဦးထိရှိလာပါပြီ။
ဒီလိုသေဒဏ်ပေးခံရသူတွေထဲ အသက် ၁၈ နှစ်အောက် ကလေး ၂ ဦးပါဝင်ပါတယ်။ ဒါအပြင် ဖမ်းမမိဘဲ မျက်ကွယ်သေဒဏ်အမိန့်ချခံရသူ ၄၁ ဦးရှိနေပါတယ်။
သိပ်မကြာခင် မေလ ၁၈ ရက်ကပဲ ရန်ကုန်တိုင်း ၊လှိုင်သာယာမြို့နယ်ထဲက လူငယ် ၇ ဦးကို စစ်ကောင်စီက သေဒဏ်ချလိုက်ပါသေးတယ်။ အဲဒီလူငယ်တွေဟာ ရာအိမ်မှူးကိုဒလန်လို့စွပ်စွဲပြီးသတ်ဖြတ်ခဲ့တယ်လို့စစ်ကောင်စီက စွပ်စွဲထားတာပါ။
နိုင်ငံတကာလွတ်ငြိမ်းချမ်းသာခွင့်အဖွဲ့က မြန်မာစစ်တပ်ဟာ ဆန္ဒပြသူတွေနဲ့ သတင်းထောက်တွေကို အရေးယူခြိမ်းခြောက်ဖို့ သေဒဏ်ကို လက်နက်သဖွယ်အသုံးပြုနေတယ်လို့ အတိအလင်းပြောပါတယ်။
သေဒဏ်ချခံရသူတွေအများစုဟာ ရန်ကုန်တိုင်းကဖြစ်ပြီးစစ်အုပ်ချုပ်ရေးနယ်မြေအဖြစ်သတ်မှတ်ထားတဲ့ တောင်ဒဂုံ ၊မြောက်ဒဂုံ ၊ အရှေ့ဒဂုံ၊ ဒဂုံဆိပ်ကမ်း ၊ ရွှေပြည်သာ၊ လှိုင်သာယာ ၊ မြောက်ဥက္ကလာ မြို့နယ်တွေကဖြစ်ကြပါတယ်။
ဒီမြို့နယ်တွေထဲမှာ ဖမ်းမိတဲ့ စစ်အာဏာသိမ်းဆန့်ကျင်ရေးလူငယ်တွေကို စစ်အုပ်စုဟာ စစ်ခုံရုံးနဲ့ အမှုကိုအကျဉ်းနည်းစစ်ဆေးပြီး အမြင့်ဆုံးပြစ်ဒဏ်တွေကို ချမှတ်နေတာပါ။
စစ်ခုံရုံးနဲ့ စစ်ဆေးတာကို ကြုံတွေ့ခဲ့ရတဲ့ နွေဦးတော်လှန်ရေးကာလအတွင်း ဖမ်းခံလိုက်ရသူ လူလတ်ပိုင်း တစ်ဦးရဲ့ပြန်ပြောပြချက်အရ စစ်ခုံရုံးတွေမှာ တင်ပြတဲ့သက်သေတွေကို ပယ်ချတာ ၊ ခုခံချေပပိုင်ခွင့်မရတာ တွေ ရှိတယ်လို့လူထုနွေဦးက သိရပါတယ်။
စစ်ခုံရုံးက ချမှတ်တဲ့သေဒဏ်ကို စစ်ကောင်စီခေါင်းဆောင်ကသာ ပယ်ချပိုင်ခွင့်ရှိတယ်လို့သိရပါတယ်။ မြန်မာနိုင်ငံမှာ သေဒဏ်အမိန့်ချခံရသူကို ကြိုးပေးတာဟာ ၁၉၈၈ ခုနှစ်က နောက်ဆုံးဖြစ်တယ်လို့သိရပါတယ်။
