ကချင်လွတ်လပ်ရေးတပ်မတော်(KIA)နှင့် ကိုးကန့်တပ်မတော်(MNDAA)တို့ တပ်စွဲရာနေရာသို့ စစ်ကောင်စီတပ်က စစ်ကြောင်းထိုးလာ၍ ကြားဖြတ်တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုရှိကြောင်း MNDAAတပ်မှ ကိုရန်ရန်က ပြောသည်။
ရှမ်းပြည်နယ်မြောက်ပိုင်း မုံးပေါ်ဒေသ၌ ယမန်နေ့ မေလ ၃၁ရက် မွန်းလွဲပိုင်းက တိုက်ပွဲဖြစ်ပွားခဲ့ပြီး တိုက်ပွဲမှာ ၁နာရီနီးပါးကြာခဲ့သည်ဟုဆိုသည်။
“ မနေ့က ဖြစ်တာက တာမုန်းပေါ်တောင် အနောက်ဘက်ခြမ်းပေါ့။ အဲဒီမှာ စစ်ကောင်စီက ကျွန်တော်တို့နဲ့ မဟာမိတ် အဖွဲ့ KIA တပ်တည်တဲ့နေရာကို သူတို့က ထိုးစစ်ဆင်ဖို့ ချီတက်လာတာ။ သူတို့ ချီတက်လာတာ သတင်းရရှိပြီးတဲ့နောက်မှာ ကျွန်တော်တို့ တပ်ဖွဲ့အနေနဲ့လည်း သွားရောက်ပြီးတော့ ကြားဖြတ်တိုက်ခိုက်တယ်” ဟု ကိုရန်ရန်က ပြောသည်။
ထိုသို့ တိုက်ခိုက်မှုကြောင့် စစ်ကောင်စီတပ်မှ သေဆုံးထိခိုက်ရှိသော်လည်း အရေအတွက်အတိအကျ မသိရသေးဟု ပြောသည်။
ပြီးခဲ့သည့် ရက်ပိုင်းက ရှမ်းမြောက် မူဆယ်ခရိုင်၌ တိုက်ပွဲများ အနည်းငယ်တည်ငြိမ်ခဲ့သော်လည်း ယခု စစ်ကောင်စီတပ်က ထိုးစစ်ဆင်လာ၍ တိုက်ပွဲဆက်ဖြစ်မည်ဟု မြင်ကြောင်း MNDAA မှ ကိုရန်ရန်က ပြောသည်။
