ကုလသမဂ္ဂလုံခြုံရေးကောင်စီ၏ ပြတ်သားထိရောက်သော အရေးယူမှုသည် လက်ရှိဖြစ်ပွားနေဆဲ စစ်တပ်၏ ဆိုးရွားသောပြစ်မှုများအတွက် အသက်ကယ်အတား အဆီးဖြစ်စေမည်ဟု မြန်မာသံအမတ်ကြီးဦးကျော်မိုးထွန်းက ပြောကြားသည်။
ယမန်နေ့တွင် ကျင်းပသော ကုလသမဂ္ဂလုံခြုံရေးကောင်စီ တံခါးဖွင့်အစည်းအဝေးတွင် မြန်မာနိုင်ငံ၌ ဖြစ်ပွားလျက်ရှိသော ဥပဒေချိုးဖောက်မှုနှင့် ပြစ်မှုများအား တားဆီးပေးရန် ပြည်သူများကိုယ်စား သံအမတ်ကြီးက ထည့်သွင်းတောင်းဆိုသည်။
နိုင်ငံတကာအသိုက်အဝန်း အထူးသဖြင့် ကုလသမဂ္ဂသည် စုဆောင်းရရှိထားသော သက်သေ အထောက်အ ထားများကို အခြေခံ၍ ထိရောက်သည့် အရေးယူဆောင်ရွက်မှုများ ပြုလုပ်ရန် အချိန်တန်ပြီ ဖြစ်ကြောင်းနှင့် သို့မှသာ မြန်မာပြည်သူများအား လူသားမျိုးနွယ်စုအပေါ် ကျူးလွန်သောပြစ်မှုများမှ ကာကွယ်ပေးနိုင်မည်ဖြစ်ကြောင်း သံအမတ်ကြီးက ပြောသည်။
မြန်မာနိုင်ငံဆိုင်ရာ လွတ်လပ်သောစုံစမ်းစစ်ဆေးမှုယန္တရား၏ ကနဦးစိစစ်တွေ့ရှိမှုအရ စစ်တပ်သည် လူသားမျိုးနွယ်စုအပေါ် ကျူးလွန်သည့်ပြစ်မှုများ ကျုးလွန်သည်ဟု ကောက်ချက်ချထားသည်။
ကုလသမဂ္ဂလုံခြုံရေးကောင်စီသည် ဆုံးဖြတ်ချက်ပေးနိုင်သည့် ထိရောက်သည့်အခန်းကဏ္ဍ၌ ပါဝင်နေပြီး ထိရောက်သည့်ယန္တရားများကို အသုံးပြု၍ အပြစ်မဲ့မြန်မာပြည်သူများအား ကာကွယ်ပေးရန်နှင့် ရေရှည်ငြိမ်းချမ်းရေးနှင့် တရားဥပဒေစိုးမိုးရေးရှိသည့် ပတ်ဝန်းကျင်ဖန်တီးပေးရန် ဆက်လက်တိုက်တွန်းသည်။
မြန်မာစစ်တပ်၏ တရားဥပဒေအပေါ် လေးစားလိုက်နာမှုမရှိခြင်းနှင့် ၎င်းတို့ကျူးလွန်သည့်ပြစ်မှုများ အတွက် ပြစ်ဒဏ်ကျခံခြင်းမရှိခြင်းတို့က လက်ရှိဖြစ်ပွားနေသော ပဋိပက္ခ၏ အဓိက အကြောင်းရင်းဖြစ်ကြောင်း သံအမတ်ကြီးက ထောက်ပြသည်။
လူ့အခွင့်အရေးကောင်စီနှင့် မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရားတို့၏ မြန်မာနိုင်ငံ၌ တာဝန်ခံမှုရှိစေရေးနှင့် ပတ်သက်သည့် ကြိုးပမ်းဆောင်ရွက်ချက်များကို အပြည့်အဝထောက်ခံကြောင်းသံအမတ်ကြီးက ပြောသည်။
နိုင်ငံတကာဥပဒေချိုးဖောက်မှုနှင့် တာဝန်ခံမှုမရှိခြင်းတို့သည် ပြည်တွင်းငြိမ်းချမ်းရေးနှင့် လုံခြုံရေးကို ထိခိုက်စေရုံသာမက ဒေသတွင်းနှင့် နိုင်ငံတကာ၌ပါ အကျိုးသက်ရောက်မှုရှိကြောင်းလည်း သံအမတ်ကြီးက လုံခြုံရေးကောင်စီသို့ ပြောသည်။
