NUGကျန်းမာရေးနှင့် ပညာရေးဝန်ကြီး ပါမောက္ခဒေါက်တာဇော်ဝေစိုးသည် ဥရောပပါလီမန်၏ ဒုတိယဥက္ကဌအပါအဝင် ပါလီမန်အဖွဲ့ဝင်များနှင့် ဇွန်လ၁ ရက်တွင် ဘယ်လ်ဂျီယံ၊ ဘရက်စဲလ်၌ တွေ့ဆုံခဲ့သည်။
တွေ့ဆုံစဉ် မြန်မာနိုင်ငံအခြေအနေများကို ဆွေးနွေးခဲ့ပြီး ဥရောပပါလီမန်သည် ဒီမိုကရေစီလမ်းကြောင်းပေါ်သို့ မြန်မာနိုင်ငံ ပြန်လည်ရောက်ရှိရေးထောက်ခံအားပေးကြောင်း ပြောကြားသည်။
![NUGဝန်ကြီး ဒေါက်တာဇော်ဝေစိုး ဥရောပပါလီမန်ထိပ်တန်းတာဝန်ရှိသူများနှင့် ဘရက်စဲလ်၌ တွေ့ဆုံ](https://i0.wp.com/www.ludunwayoo.com/wp-content/uploads/2022/06/284925926_394749706047821_3408050875612726192_n.jpg?resize=880%2C495&ssl=1)
ဥရောပပါလီမန်သည် ပြည်ထောင်စုလွှတ်တော်ကိုယ်စားပြုကော်မတီ (CRPH)၊ အမျိုးသားညီညွတ်ရေးအတိုင်ပင်ခံကောင်စီ (NUCC)နှင့် အမျိုးသားညီညွတ်ရေးအစိုးရ (NUG) တို့၏ ဆောင်ရွက်မှုများအပေါ် စည်းလုံးခိုင်မာစွာ ထောက်ခံရပ်တည်ကြောင်းလည်း ပြောကြားသည်ဟု ပြည်ထောင်စုဝန်ကြီး ဒေါက်တာဇော်ဝေစိုးက အသိပေးသည်။
ဥရောပသမဂ္ဂ(EU)သည် အမျိုးသားညီညွတ်ရေးအစိုးရ (NUG)ကို အသိအမှတ်ပြုကာ ကူညီထောက်ပံ့မှုများပေးရေးအတွက် ဥရောပပါလီမန်က ပြီးခဲ့သည့် မတ်လ ၁၀ရက်တွင် ဆုံးဖြတ်ခဲ့သည်။
![NUGဝန်ကြီး ဒေါက်တာဇော်ဝေစိုး ဥရောပပါလီမန်ထိပ်တန်းတာဝန်ရှိသူများနှင့် ဘရက်စဲလ်၌ တွေ့ဆုံ](https://i0.wp.com/www.ludunwayoo.com/wp-content/uploads/2022/06/285554098_394749619381163_2893255038385214177_n.png?resize=880%2C660&ssl=1)
ထို့အပြင် အကြမ်းဖက်မှုများ ပိုတိုးလုပ်ဆောင်နေသည့် စစ်ကောင်စီကို ထပ်တိုးပိတ်ဆို့ဒဏ်ခတ်မှုများလုပ်ဆောင်ရန် ဥရောပပါလီမန်က တိုက်တွန်းထားသည်။
စစ်ကောင်စီ၏ အကြမ်းဖက်မှုများ ရက်စက်ကြမ်းကြုတ်မှုများကို ပြင်းထန်စွာထပ်မံရူတ်ချထားပြီး ၂၀၂၀ ရွေးကောက်ပွဲရလာဒ်ကို လေးစားရန်၊ ဒေါ်အောင်ဆန်းစုကြည်အပါအဝင် နိုင်ငံရေးအကျဥ်းသားအားလုံးကို ပြန်လွှတ်ပေးရန်နှင့် အရပ်သားအစိုးရပြန်လည်ပေါ်ထွန်းအောင်လုပ်ဆောင်ရန်တို့ကို ဥရောပပါလီမန်က တောင်းဆိုထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)