ရန်ကုန်မြို့တောင်ဥက္ကလာမြို့နယ်ရှိ ဝေဇယန္တာလမ်းမကြီးပေါ်ရှိ City Mart အနီးတွင် (ယနေ့ ဇွန်၈ရက်) နံနက် ၈နာရီဝန်းကျင်က ကား ၅ စီး ဆင့်တိုက်မှုဖြစ်ပွားခဲ့သည်။
ယာဥ်တိုက်မှုကြောင့် အသက် ၈ နှစ်အရွယ် ကလေးငယ်တစ် ဦးအပါအဝင် ၄ ဦး ထိဒဏ်ရာရရှိခဲ့သည်ဟု မျက်မြင်တွေ့ရှိသူများကပြောသည်။
မီးပွိုင့်မိ၍ရပ်နေသည့် ကားများကို အိမ်စီးကားတစ်စီးက အရှိန်ဖြင့်နောက်မှ ဝင်ရောက်တိုက်ခိုက်ခဲ့ခြင်းဖြစ်ပြီးကားများအဆင့်ဆင့်တိုက်မိခြင်းဖြစ်သည်။ တိုက်ခံရသည့် ကားများထဲတွင် ကိုယ်ပိုင်ကား ၄စီး၊ ကုမ္ပဏီကား ၁ စီးပါဝင်ပြီး စက်ဘီးနှင့်တွန်းလှည်းဈေးသည်တစ်ဦးလည်းတိုက်မိသည့်အထဲတွင်ပါဝင်သည်ဟုမျက်မြင်တွေ့ရှိသူများပြောသည်။
ဒဏ်ရာရသူများထဲမှ တစ်ဦးမှာလက်ကျိုးသွားပြီး ၊တစ်ဦးမှာ ဦးခေါင်းတွင် ဒဏ်ရာရရှိကာ ကျန် နှစ်ဦး အခြေအနေကို မသိရသေးကြောင်း သုခကာရီလူမှုကူညီရေးအသင်းက ထုတ်ပြန်ထားသည်။ဒဏ်ရာရသူများကို သုခကာရီအသင်းက ကူညီပို့ဆောင်ပေးခဲ့ကြောင်လည်းဖော်ပြထားသည်။ ဒဏ်ရာရသူတစ်ဦးမှာ တွန်းလှည်းဈေးသည်တစ်ဦးဖြစ်ကြောင်းလည်းသိရသည်။
ကားဖြင့်နောက်မှ တိုက်ခဲ့သူမှာထွက်ပြေးရန်ကြိုးစားသဖြင့် အနီးအနားရှိပြည်သူများက ဝိုင်းဝန်းဖမ်းဆီးခဲ့သည်ဟုလည်း မျက်မြင်တွေ့ရှိသူများကပြောသည်။
