Mytel တာဝါတိုင်များဖြင့် တဖက်ပွင့်လက်နက်ကြီးများအပါအဝင် လက်နက်ကြီး “မမ” များကိုလည်း ကိုယ်ပိုင်ဖန်တီးတီထွင်မှုများဖြင့် ထုတ်လုပ်နိုင်ခဲ့ကြောင်း မြောင်မြို့နယ်ပြည်သူ့ကာကွယ်ရေးနှင့်လုံခြုံရေးအဖွဲ – CDSOM က ယနေ့(ဇွန် ၉ ရက်)တွင် ထုတ်ပြန်သည်။
“တော်လှန်ရေးကာလမှာ ထိုက်သင့်တဲ့ကုန်ကြမ်း တစ်ခုအနေနဲ့ ရှိတယ်။သူ့(စစ်ကောင်စီ)အရိုးနဲ့ သူ့ကိုပြန်ထိုးနိုင်တဲ့အခွင့်အလမ်း တစ်ခုပဲ”ဟု CDSOM တာဝန်ရှိသူက လူထုနွေဦးသို့ ပြောသည်။
အဆိုပါထုတ်လုပ်မှုများကို ယခုနှစ် တော်လှန်သင်္ကြန်ကာလအတွင်း အောင်မြင်စွာ ထုတ်လုပ်နိုင်ခဲ့ခြင်းဖြစ်ပြီး ထုတ်လုပ်ထားသော “မမ”များသည် ပေ ၂၀၀၀ နှင့်အထက်ပြေးနိုင်သည့်အပြင် စစ်ဆင်ရေးများတွင် အဝေးပစ်အနေဖြင့် အကောင်းဆုံး အသုံးပြုနိုင်မည်ဟု ဆို သည်။
![(စစ်အုပ်စုပိုင်ဆိုင်သည့် Mytel တာဝါတိုင်ဖြင့် လက်နက်များ ထုတ်လုပ်ရန် ဖြတ်တောက်နေစဥ်၊ ဓာတ်ပုံ - CDSOM)](https://i0.wp.com/www.ludunwayoo.com/wp-content/uploads/2022/06/286784584_398775788978546_8108805637512263802_n.jpg?resize=880%2C660&ssl=1)
မဟာမိတ်စစ်ဆင်ရေးအများစုတွင် အဆိုပါ တဖက်ပွင့် လက်နက်ကြီးများအား အသုံးပြုခဲ့ပြီးအထူးသဖြင့် ၂၀၂၂ ဧပြီအတွင်း ဖြစ်ပွားခဲ့သော ရေလယ်ကျွန်းစစ်ဆင်ရေးနှင့် လက်ယက်မစစ်ဆင်ရေး တိုက်ပွဲများတွင် စတင်အသုံးပြုခဲ့သည်ဟု CDSOM က ပြော သည်။
လက်ရှိတွင် တဖက်ပွင့်လက်နက်ကြီးများကို ပြန် လည်ပြင်ဆင် ထုတ်လုပ်လျက်ရှိပြီအရေအတွက် အများအပြား ထုတ်လုပ်နိုင်ရန် စီစဥ်လျက်ရှိကြောင်း အသိပေးသည်။
ထိုအပြင် မကြာမီအချိန်အတွင်း Mytel တာဝါတိုင်များမှတဆင့် လက်နက်ကြီး၊ လက်နက်ငယ်များ အမျိုးအစားပေါင်းစုံ ထပ်မံထုပ်လုပ်သွားမည်ဖြစ်ကာ လက်နက်ထုတ်လုပ်မှုမှ ရဲဘော်များအား လက်နက်အတော်အသင့် တပ်ဆင်ပေးနိုင်မည်ဟု CDSOM က ခန့်မှန်းသည်။
![(စစ်အုပ်စုပိုင်ဆိုင်သည့် Mytel တာဝါတိုင်ဖြင့် လက်နက်များ ထုတ်လုပ်ရန် ဖြတ်တောက်နေစဥ်၊ ဓာတ်ပုံ - CDSOM)](https://i0.wp.com/www.ludunwayoo.com/wp-content/uploads/2022/06/286859423_398775822311876_7861448712308539952_n.jpg?resize=880%2C660&ssl=1)
Mytel တာဝါတိုင်များသည် လက်နက်ထုတ်လုပ်ရေးအတွက် အကောင်းဆုံးကုန်ကြမ်းဖြစ်သည့်အပြင် အဆိုပါ တာဝါတိုင်မှထုတ်လုပ်သော လက်နက်များသည် မဟာမိတ်စစ်ဆင်ရေးများ၏ အရေးကြီးသည့်နေရာမှ ပါဝင်နေ ကြောင်းထုတ်ပြန်ချက်တွင် ဖော်ပြသည်။
ထို့ကြောင့် Mytel တာဝါတိုင်မှတဆင့် လက်နက်ကြီး၊ငယ်နှင့် (မမ)များ ပိုမိုထုတ်လုပ်ပြီး တိုက်ပွဲဝင်နိုင်ရန်နှင့် ထုတ်လုပ်မှုတွင် ပါဝင်သော ဆက်စပ်ကုန်ကြမ်းများအတွက် ပါဝင်အားဖြည့်ပေးရန်လည်း CDSOM က မေတ္တာရပ်ခံသည်။
အာဏာသိမ်းပြီးနောက်ပိုင်း တစ်နှစ်အတွင်းစစ်အုပ်စုပိုင်ဆိုင်သည့် Mytel တာဝါတိုင် ၅၀၀ခန့်ပျက်စီးခဲ့ပြီး စစ်ကိုင်းတိုင်း၌ သုံးပုံ နှစ်ပုံကျော်အထိရှိကြောင်း Data For Myanmar က ထုတ်ပြန်ထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)