ရှမ်းတောင်ရှိ SSPPတပ်စခန်းကိုလည်း စစ်ကောင်စီနှင့် RCSS နှစ်ဖွဲ့ညှပ်တိုက်မည့် အခြေအနေရှိဟု အသိပေး
မိုင်းရှူးဖက်တွင်ရှိသော ရှမ်းပြည်တိုးတက်ရေးပါတီ(SSPP-SSA)၏တပ်စခန်းများကို စစ်ကောင်စီတပ်မှ တပ်ဆုတ်ခိုင်းသော်လည်း တပ်ဆုတ်ပေးမည်မဟုတ်ကြောင်း SSPP-SSA သတင်းနှင့် ပြန်ကြားရေးက ယနေ့ သတင်းထုတ်ပြန်သည်။
ရှမ်းပြည်နယ် တောင်ပိုင်းဘက်တွင် RCSS နှင့် SSPP စစ်ရေးတင်းမာနေချိန် SSPP/SSA ဌာနချုပ်လုံခြုံရေး တပ်စခန်း ၃ခုအား ဆုတ်ခိုင်းခြင်းဖြစ်သည်ဟု ဆိုသည်။
အာဏာသိမ်းစစ်ကောင်စီအနေဖြင့် ဇွန်လ ၄ရက်တွင် မိုင်းရှူးမြို့နယ်မြောက်ဘက်ရှိ SSPP/SSA ဌာနချုပ်လုံခြုံရေး တပ်စခန်းများဖြစ်သော)လွိုင်နိုင်းလမ်းခွဲအဝင်အနီးရှိ စခန်း၊ မန်ဝိန်းကျေးရွာအနီးရှိ စခန်း ၂ခုတို့အား ဇွန်လ ၁၀ရက်မတိုင်မီ ဖယ်ရှားပေးရန်အကြောင်းကြားလာခြင်းဖြစ်ကြောင်း ဖော်ပြထားသည်။
စစ်ကောင်စီတပ် ဖယ်ခိုင်းသည့် တပ်စခန်းနေရာများသည် SSPP-SSA မှ ဆယ်စုနှစ်တစ်ခုစာ အခြေပြုခဲ့သည့်တပ်စခန်းနေရာများ ဖြစ်၍ တပ်ဆုတ်ပေးရန်မဖြစ်နိုင်ကြောင်း ထုတ်ပြန်သည်။
“ ဒီဘက်က ကျွန်တော်တို့ ဌာနချုပ်လုံခြုံရေး တပ်စခန်းဆိုတော့ သူတို့ အာရုံလာနောက်ချင်တာ ။ ဒါကသူတို့ လုပ်နေကျအကွက်ပဲ၊ ဘာလို့ လဲဆိုတော့ တောင်ပိုင်းဘက်ဆနင်းတောင် အနီးနားတစ်ဝိုက်က RCSS နဲ့ ကျွန်တော်တို့ SSPP/SSA တပ်တွေ စစ်ရေးတင်းမှာနေတယ်လေ အချိန်မရွေး တိုက်ပွဲ ဖြစ်နိုင်တယ် ။ တစ်ဖက်မှာ စစ်ရေးတင်းမှာ နေတဲ့ အခြေနေရှိနေလို့ ၊ ဒီဘက်က ကျွန်တော်တို့ အာရုံနောက်အောင်လုပ်တဲ့အကွက်ပဲ ၊ ကျွန်တော်တို့လည်း မဆုတ်ပေးနိုင်ဘူး စစ်လည်းပြင်ဆင် ထားပြီးပြီ ။ မြန်မာစစ်တပ်ဖက်က စစ်စထိုးရင်လည်း ကျွန်တော်တို့ဖက်ကတုန့်ပြန်ဖို့အသင့်ပဲ”ဟု SSPP-SSA စစ်မြေပြင် တာဝန်ရှိသူတစ်ဉီးက ပြောကြားကြောင်း SSPP က ထုတ်ပြန်သည်။
လက်ရှိတွင် စစ်ကောင်စီတပ်က လက်နက်ကြီးများအပါအဝင် လူ၊ လက်နက်အင်အား အများအပြားဖြင့် SSPP ထိန်းချုပ်ရာ စစ်စခန်းများ အ၃နီး စစ်ရေးလှုပ်ရှားနေကြောင်း ဖော်ပြထားသည်။
SSPP/SSA ဖက်မှလည်း စစ်ရေးပြင်ဆင်ကာအသင့်အနေအထားရှိနေပြီး စစ်ကောင်စီဘက်မှ ထိုးစစ်ဆင်လာပါက တိုက်ပွဲဖြစ်နိုင်ကြောင်း၊ ရှမ်းပြည်တောင်ပိုင်းဖက်တွင်လည်း လွိုင်လင်၊ မိုင်းပွန် ဆနင်းတောင်ဘက် ကို RCSS မှ ထိုးစစ်ဆင်ရန်ပြင်ဆင်နေသည့်အတွက် မြန်မာစစ်တပ်နှင့် RCSS တို့ ၂ဖက် ညှပ်တိုက်မယ့်အခြေအနေရှိကာ စစ်ရေးတင်းမာလျှက်ရှိကြောင်း SSPPက ထုတ်ပြန်သည်။
