အကြမ်းဖက်စစ်ကောင်စီတပ်၏ တမ်မ(၈၈) လက်အောက်ခံ ခလရ(၈၃)မှ ထွက်ပြေးလားသော စစ်သားနှစ်ဦးကို အရှင်ဖမ်းမိခဲ့ကြောင်း Eagles Army-HPDF က ယနေ့(ဇွန် ၁၂)အသိပေး ထုတ်ပြန်သည်။
ဖမ်းဆီးရမိသော စစ်ကောင်စီတပ်သားနှစ်ဦးမှာ တပ်သား သက်ကိုကိုထွေး ကိုယ်ပိုင်နံပါတ် တ-၅၇၀၅၇၂ နှင့် တပ်သား ရှိုင်းဝဏ္ဏအောင် ကိုယ်ပိုင်နံပါတ် တ-၅၇၀၅၇၃ တို့ဖြစ်ပြီး ၎င်းတို့နှစ်ဦးကို ဇွန်လ ၁၀ ရက်က မန္တလေး – ဗန်းမော်ဗျူဟာလမ်းပေါ် ဖမ်းမိခဲ့ခြင်းဖြစ်ကြောင်း ဖော်ပြ သည်။
“ခလရ(၈၃)ဆိုတာက ဗန်းမော်မှာ အခြေစိုက်တဲ့တပ်ပေါ့။ အဲဒီကနေ ထွက်ပြေးလာတာ။ တပ်ထဲမှာ ငွေကြေးပြဿနာရှိလို့ထွက်ပြေးလာတာလို့ သိရတယ်”ဟု Eagles Army-HPDF မှ တာဝန်ရှိသူတစ်ဦးက ပြောသည်။
Eagles Army-HPDF တပ်ဖွဲ့မှ မန္တလေး – ဗန်းမော်ဗျူးဟာလမ်း၊ လမ်းပိုင်းတစ်နေရာတွင် နယ် မြေရှင်းလင်းရေးလုပ်စဥ် စစ်ကောင်စီတပ်မှ တပ်ပြေးနှစ်ဦးကို ဖမ်းမိခဲ့ခြင်းဖြစ်ပြီး ၎င်းတို့အား ခေတ္တထိန်းသိမ်းစစ်ဆေးပြီးနောက် ပြည်သူ့ရင်ခွင့်နှင့် ချိတ်ဆက်ပေးခဲ့ကြောင်း အထက်ပါတာဝန်ရှိသူက ဆက်ပြောသည်။
