အမျိုးသားညီညွတ်ရေးအစိုးရ(NUG) ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာန၊ ပြည်ထောင်စုဝန်ကြီး ဦးလွင်ကိုလတ်နှင့် စစ်ကိုင်းနှင့် မကွေးတိုင်းရှိ အတည်ပြုပြီးသော မြို့နယ်ပြည်သူ့အုပ်ချုပ်ရေးအဖွဲ့(ပအဖ)များ ယမန်နေ့က တွေ့ဆုံပြီး အုပ်ချုပ်ရေးနယ်မြေများတိုးချဲ့နိုင်ရေးဆိုင်ရာများ ဆွေးနွေးခဲ့ကြောင်း ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာနက သတင်းထုတ်ပြန်သည်။
လက်ရှိအထူးဒေသတွင် ပြည်သူ့အုပ်ချုပ်ရေးဖော်ဆောင်နိုင်မှုအပြင် မိမိတို့၏အုပ်ချုပ်ရေးနယ်မြေများတိုးချဲ့နိုင်ရေးအတွက် အစဉ်တစိုက် ကြိုးပမ်းအားထုတ်ဆောင်ရွက်လျက်ရှိကြောင်း ပြည်ထဲရေးဝန်ကြီးက ပြောကြားသည်။
ယခု ထပ်တိုးအတည်ပြုထားသည့် စစ်ကိုင်းတိုင်းနှင့် မကွေးတိုင်းရှိ ပြည်သူ့အုပ်ချုပ်ရေးအဖွဲ့များအတွက် မြေပြင်အုပ်ချုပ်ရေးဖော်ဆောင်မှုဆိုင်ရာ ကိစ္စရပ်များအတွက် လိုအပ်သည့်ပံ့ပိုးမှုများကိုလည်း ဆက်လက်ဆောင်ရွက်ပေးသွားမည်ဟု ၎င်းက ဆိုသည်။
နယ်မြေအုပ်ချုပ်ရေးအတွက် အဓိကကျသည့် နယ်မြေလုံခြုံရေးခိုင်မာအားကောင်းစေရန် မြို့နယ်ပြည်သူ့လုံခြုံရေးအဖွဲ့များ ဖွဲ့စည်းဆောင်ရွက်ရေးကိုလည်း ဝန်ကြီးက ပြောကြားသည်။
ထိုနည်းအတူ ဒေသအတွင်း ရှိနေကြသည့် ပြည်သူ့ကာကွယ်ရေးတပ်ဖွဲ့များနှင့် ချိတ်တွဲဆောင်ရွက်ရန်လိုအပ်ကြောင်း ၎င်းက ဆိုသည်။
အစည်းအဝေး တက်ရောက်လာသူများမှ မြေပြင်တွင်ကြုံတွေ့နေရသော အခက်အခဲနှင့် လိုအပ်ချက်များကိုတင်ပြဆွေးနွေးခဲ့ကြောင်း ဝန်ကြီးဌာနက ထုတ်ပြန်ခဲ့သော်လည်း အသေးစိတ် အခြေအနေများ ဖော်ပြမထားပေ။
