ကေအဲန်ယူထိန်းချုပ်နယ်မြေ လယ်ဒို(ကျောက်ကြီး)မြို့နယ် လိန်ပင်ကျေးရွာထဲကို မနေ့မနက်ပိုင်းက စစ်ကောင်စီတပ်က လက်နက်ကြီးပစ်ခတ်ခဲ့လို့ ရွာလုံးကျွတ်ထွက်ပြေးတိမ်းရှောင်နေခဲ့ရတယ်လို့ ကေအဲန်ယူက သတင်းထုတ်ပြန်ထားပါတယ်။
ကေအဲန်ယူ-ခလယ်လွီထူ(ညောင်လေးပင်ခရိုင်) တပ်မဟာ ၃ နယ်မြေ ကျောက်ကြီးမြို့နယ် ဒလဆိပ်ကျေးရွာအုပ်စု လိန်ပင်ကျေးရွာအတွင်းကို စစ်ကောင်စီတပ်က ဒီကနေ့မနက် ၉ နာရီ ၁၀ မိနစ်အချိန်ကစပြီး လက်နက်ကြီး ၁၂၀ မမ ပစ်ချခဲ့တယ်လို့ ထုတ်ပြန်ချက်မှာဖော်ပြထားပါတယ်။
စစ်ကောင်စီတပ်ဟာ စစ်တောင်းမြစ်အနောက်ဘက်ကမ်းရှိ အင်းပရိကျေးရွာကနေ အခြေစိုက်ကာ စစ်တောင်းမြစ်အရှေ့ဘက်ခြမ်းရှိ လိန်ပင်ဝဲကျေးရွာထဲကို လက်နက်ကြီးဖြင့် လှမ်းပစ်ခဲ့တာဖြစ်ပြီး ပစ်ချတဲ့အလုံးရေ အရေအတွက်အတိအကျမသိရှိရပေမယ့် ဒီလိုပစ်ခတ်မှုကြောင့် အိမ်ခြေ(၂၅၀)လုံး လူဦးရေ(၁၁၈၄)ဦးရှိတဲ့ လိန်ပင်ကျေးရွာက ပြည်သူလူထုတွေ နေရပ်စွန့်ခွာပြီး ရွာလုံးကျွတ်ထွက်ပြေးတိမ်းရှောင်နေရတာပါ။
တဖက်မှာလည်း စစ်ကောင်စီတပ်က ပိန်းဇလုပ်မြို့ကနေ အလယ်ကျွန်းကျေးရွာဘက်ကို တပ်အင်အားတိုးချဲ့လာသလို မုန်းဘက်ကနေ ကျောက်ကြီးမြို့ကို တပ်အင်အားဖြည့်တင်းဖို့အတွက် စစ်ကား ၇ စီး ဝင်ရောက်လာခဲ့တယ်လို့ ကေအဲန်ယူက ဆိုပါတယ်။
အဆိုပါစစ်ကား ၇ စီးမှာ တချို့ကားတွေဟာ အလုံပိတ်ထားပြီး တချို့ကားတွေမှာတော့ လူအင်အားအပြည့်ပါရှိတယ်လို့လည်း ကေအဲန်ယူက ဆိုထားပါသေးတယ်။
ဒါ့အပြင် ပြီးခဲ့တဲ့ ဇွန်လ ၁၀ ရက်နေ့က စစ်ကောင်စီတပ်က ဆိပ်ကြီးမှာအခြေချပြီး အင်းနက်ကျေးရွာအုပ် ငဗြက်အင်းကျေးရွာထဲကို လက်နက်ကြီးသုံးလုံးပစ်ခတ်ခဲ့ပြီး ဇွန် ၁၁ ရက်နေ့ မနက် ၁၀ နာရီခွဲအချိန်ကလည်း အင်းနက်ကျေးရွာအုပ်စု နရွဲပင်နဲ့ ကြို့ကုန်းကျေးရွာထဲကို လက်နက်ကြီးပစ်ချခဲ့သေးပြီး ပစ်ချတဲ့အရေအတွက်ကို အတိအကျမသိရှိရဘူးလို့ ထုတ်ပြန်ချက်မှာဖော်ပြထားပါတယ်။
ဒီလိုစစ်ကောင်စီတပ်က အင်းနက်ကျေးရွာအုပ်စုထဲကို လက်နက်ကြီးနဲ့ နှစ်ရက်ဆက်တိုက်ပစ်ချတာကြောင့် အိမ်ခြေအလုံး(၈၀)နဲ့ လူဦးရေ(၄၄၄)ဦးရှိတဲ့ ကြို့ကုန်းကျေးရွာ၊ အိမ်ခြေ(၁၀၈)လုံးနဲ့ လူဦးရေ(၅၄၈)ဦးရှိတဲ့ နရွဲပင်ကျေးရွာက ဒေသခံပြည်သူလူထုတွေနဲ့ ငဗြက်အင်းကျေးရွာက ဒေသခံပြည်သူလူထုတွေဟာ နေရပ်စွန့်ခွာပြီး ထွက်ပြေးတိမ်းရှောင်ရတယ်လို့ ကေအဲန်ယူရဲ့ ထုတ်ပြန်ချက်အရ သိရပါတယ်။
