▪️ဘုန်းကြီးဆွမ်းကပ်ပြီး ဒေါ်အောင်ဆန်းစုကြည် အသက်ရှည်ကျန်းမာစေရန် ဆုတောင်းပေးကြ
ထိုင်းနိုင်ငံ မဲဆောက်မြို့၌ ရောက်ရှိနေသည့် မြန်မာပြည်သူများက နိုင်ငံတော်၏တိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ (၇၇)နှစ်ပြည့်မွေးနေ့ကို ယနေ့ စုပေါင်းကျင်းပခဲ့ကြသည်။
အဆိုပါ မွေးနေ့ပွဲအခမ်းအနားသို့ ထိုင်းရောက်မြန်မာပြည်သူ ရာနှင့်ချီတက်ရောက်ခဲ့ကြောင်း မဲဆောက် အခြေစိုက်ကရင်အမျိုးသားမီဒီယာက ဖော်ပြသည့် ဓာတ်ပုံနှင့် ဗွီဒီယိုမှတ်တမ်းများ၌ တွေ့ရသည်။
မွေးနေ့ပွဲ၌ တက်ရောက်လာသူများက လက်ရှိအချိန်တွင် စစ်ကောင်စီ၏ ဖမ်းဆီးချုပ်နှောင် ခြင်းခံထားရသည့် ဒေါ်အောင်ဆန်းစုကြည် အသက်ရှည်ကျန်းမာစေရေး ဆုတောင်းခဲ့ကြသည်ဟု မွေးနေ့ပွဲ ရောက်ရှိခဲ့သူတစ်ဦးက ပြောသည်။
“မဲဆောက်မှာရောက်နေကြတဲ့ မြန်မာနိုင်ငံသားတွေကနေ လုပ်ပေးတဲ့ပွဲပေါ့။ ဒေါ်အောင်ဆန်းစုကြည် (၇၇) နှစ် မြောက် မွေးနေ့သူတို့ စုပေါင်းပြီးတော့ ကျင်းပပေးတာ။ သူတို့က ဘုန်းကြီး ဆွမ်းကပ်တယ်။ ဒေါ်အောင်ဆန်းစုကြည် မွေးနေ့မှာ သက်တော်ရာကျော်ရှည်ပါစေ ဆုတောင်းတယ်”ဟု ၎င်းက ဆိုသည်။
ကရင်အမျိုးသားမီဒီယာက ဖော်ပြသည့် ရုပ်သံတွင်လည်း အခမ်းအနားတက်ရောက်သူ တစ်ဦးက “ကျွန်တော်တို့ မျှော်လင့်တာက အမေစုအသက်ရှည်ပြီး အမြဲကျန်းကျန်းမာမာ နေနိုင်ဖို့ဆုမွန်ကောင်းတောင်းပေးပါတယ်”ဟု ပြောကြားခဲ့သည်ကို တွေ့ရသည်။
လူထုခေါင်းဆောင်ဒေါ်အောင်ဆန်းစုကြည် မွေးနေ့ရောက်တိုင်း မြန်မာပြည်သူများစွာက ၎င်းမွေးနေ့ပွဲကို ကျင်းပခဲ့ရာ ယခုနှစ်တွင်လည်း ပြည်သူများစွာက ဒေါ်အောင်ဆန်းစုကြည်နှင့် မတရားဖမ်းဆီးခံထားရသည့် ပြည်သူများအချုပ်အနှောင်မှ အမြန်ဆုံးလွတ်မြောက်ရန် ဆုတောင်းကာ ဒေါ်အောင်ဆန်းစုကြည်၏ မှတ်တမ်းဓာတ်ပုံများ၊ ရုပ်သံမှတ်တမ်းများကို လူမှုကွန်ရက်၌ ဖော်ပြခဲ့ကြသည်။
